ما بين همومي والمسؤليه ارجو المساعده ؟؟؟؟؟؟؟؟

ما بين همومي والمسؤليه ارجو المساعده ؟؟؟؟؟؟؟؟
خواتي بنات حواء انا عندي مشكله واتمنى انكم تعطوني بعض مقترحاتكم ونصايحكم عشان استفيد منها لاني فعلا محتاجه للي يرشدني لبعض النصايح
خواتي انا مزوجه من ست سنوات وعندي ولد عمره اربع سنوات ونص وبنتين وحده عمرها ثلاث سنوات ونص والصغيره عمرها سنه ونص توفى عني زوجي في حادث طياره اثناء اداء مهمه رسميه في العمل وانا الحين في العده .....
يا خواتي مشكلتي هي في عيالي طبعا هم مايعرفون معنى الموت بس ولدي الكبير احس انه فاقد ابوه بس ما يعرف كيف يعبر عن شعوره وصاير عصبي وايد وعنده حب تملك وايد يعني يحب ياخذ العاب غيره مع انه متوفر عنده كل شي ومن النوع اللي يصارخ وايد حتى لاموربسيطه واذا حد جانا لزياره من اهلي او من الجيران يقول بروح معاهم انا احس انه يريد يطلع ويا اي حد لاني انا ماقدر اطلع وياه
وبالنسبه لي انا حالتي النفسيه وايد تعبانه لانه مب شي هين اني افقد بو عيالي انا نحرمت من الزوج وعيالي انحرموا من ابوهم وهذا طبعا صعب جدا بس هذا اللي قدره علينا رب العالمين وانا راضيه بقضاء الله وقدره بس تعرفون يا خواتي كبرت المسؤليه وحملها كبير والحاله النفسيه لها دور وما اعرف كيف اتصرف ويا عيالي وكيف اخليهم يتربون تربيه صحيحه خاليه من العصبيه والمشاكل واحس بالحزن يوم اسمع من الاطفال ينادون ابهاتهم جدام عيالي بس ما اقول غير اللهم اجرني في مصيبتي واخلفلي خيرا منها والحين ياخواتي ما ابغي منكم الا كيف ترشدوني كيف اربي عيالي التربيه الصحيحه واللي تخليهم يسمعون كلامي بهدوء من غير عصبيه لان الحين الكل يقولي انتي امهم وابوهم في نفس الوقت واهم شي العصبيه اللي في ولدي كيف احاول اقضي عليها والله يجزيها الجنه اللي بترد علي وترشدني ....................