السلام عليكـم ورحمة الله وبركاته..
كيفكم يا حواائيات ؟؟
ممم: شسمه أبي اقولكم سر بس عادي تقولونه لأحد
ودي تقرون كلامي للأخير ماراح اتكلم بأسلوب وشسمه بتكلم بأسلوبنا كـ بنات..
بنات.. مره رحت لمسجد صلاه القيام .. شفت بنات كثير بأعمارنا من 16 الى العشرينات و اكبر ..
بنات لبسوا عبايات كتف وبناطيل ووو لكن ايش ! .. ،تركو السوق والتلفزيون والاغاني وجو للمسجد ..
شمعنى هذا..!
انه فيهم خير كل شخص فيه بذرة خير مو معنى انو بس المسجد يمكن صليتي في بيتك ورفعتي يدك ودعيتي من قلبك..
وبـ ذلك بكيتي والشيخ يدعي..
تسمعين الشيخ يقول ..{ يارب ندعوك دعاء المسكين من كثرة ذنوبه وقلة حسناته }
وتسمعين { سبحان من ستر القبيح واظهر الجميل },,
تسمعين يقول: { سبحانك تطاع فـ تغفر وتعصى فـ تغفر }..
تبكين من قلبك او يعورك قلبك ..
صح كذا تحسين فجأه انك ولا شي !
تحسون معاي والا أنا أحس لحالي ؟؟ أنا شسويت شي يشفع لي عند ربي ؟
يعني وش سوينا نحس ان حنا مغترين بأنفسنا..
تدرون في احاديث للرسول صلى الله عليه و سلم وأقوال للصحابه ان في زمن ان الرجل يصلي ستين سنه وماتقبل له سجده وحده ..
معقوووووول.!
ايه ولا سجده يعني تركعين وتقومين وتسلمين ماتدرين كم صليتي وترقعينها بالسهو ..
بنات إلى متى انا وانتو كذا..
قسم بالله مو حاله طبعاً يجيني أوقات اقول ودي اني بعهد الصحابه..
الى متى وحنا بغفلتنا ؟
نصلي ونبكي ووو.. يجي العيد وبعد العيد ونرجع لخنبقتنا وننسى ..
طيب انا وانتي خلينا نفكر بـ شي من الحين دام الهمه فيني وفيك الحين..
مثلا نسوي صندوق بالبيت او بغرفتك كل يوم حطي ريال ..
بدل هالشيبس اللي كل يوم نجيب 4 للشله ..
نتبرع بريال للصندوق ... وريال على الريال تصير 10..
تدرين ليه ريال عشان ماتثقل عليك واللي لها قدره الله يجزاها خير..
وعطيها مثلا اللي ينظفون بالأسواق و الا سواقكم و الا شغالتكم ..
تراهم ماجو هنا الا للحاجه.. واذا كانت تتنعفق أو تنافخ ..
خلي قلبك اكبر واكسبيها بأجر ربي ومأجوووووووووره,,
ولسانك .. اللعن ..
زي العاده ..
شفتو فلانه الله ..... تستهبل هي و واجباتها..
ولا الدكتور/هـ ودي اذبحها الله .........
ولا اخوي الحمـ.... فصل النت الله ....... .
و الا وحده بس تلعن في الجوامد ... !
شتستفيدين ؟ من انتي عشان تلعنين وتطردين من رحمة الله ؟
عودي نفسك تتركين العاده لأن أي وحده حولك قلبها صاحي بتشمئز من الكلمة وبتستسخفك وبترثي حالك
اذا لعنتي فجأه عاقبي نفسك واستغفري 40 مره مثلا =)
واحسني خلقك مع أي احد اذكري الله كثير وحلي لسالك بالكلام الجميل اللي يقربك للناس ..
و بعد تدرين الابتسامه لها اجر.. تمر وحده من جنبك .. لاتمدين الكشره متر .. لا ابتسمي ..
انا مره رحت مكان ماعرف احد فيه وفيه بنت ابتسمت لي تمنيت اني هي..
وعطتني دافع أبتسم .. ابتسمت و أكيد شاركتني الأجر أجر ابتسامه .. تحسونه شي بسيط ؟
أجر الإمتسامه اللي ما تكلفك ممكن ترفع منزلتك يوم القيامه الابتسامه لها دور في تقبل الشخص و ارتياحنا له و لها دور بالأجر ليش نبخل على نفسنا بالدنيا و الآخره ؟
عبايتك ..
انتي عارفه خطأك اكيد بس خليني اقولك على شي..
مره كانت فاطمه رضي الله عنها بنت النبي صلى الله عليه و سلم تبكي من قلب وتصييييييييييييييييييح..
جتها عائشه رضي الله عنهم أجمعين .. تقولها مابالك .!
اعلمك وش قالت ..؟!
قالت بمجمل كلامها .. الحين إذا أنا مت وشالوني الرجال بييبن جسمي وبيبان خصري
يعني شكل جسمي بيبان..
اذا فاطمه بنت الرسول صلى الله عليه وسلم كذا تفكيرها
وهي بذاك العهد قبل المخصر و المطرز والفراشه والخفاش
وحنا العبايه واسعه لكن مع الشنطه وشد العبايه مع الخصر يبان كل شي
مممم خليني أسألك: انتي تلبسين عباية ستايل ليه ؟.. تقولين تجمل و أحلى و أخف و أريح أوكي أنا معاك أحلى و أريح بس على الأقل لا تلبسينها في السوووق درجي نفسك شوي شوي اتركيها في الأسواق بترتاحين
بنات تكفون خلونا نتغير .. وربي ماراح ينفعنا شي..
تدرون انو النار سوداء وكل شي مانشوفه .. النار يوم القيامة ما نشوف فيها شي غير السواد والعذاب الله يجيرنا منها
واللي ابتلت بجوال مع الشباب و الا ع المسن..
تأكدي هالشخص اذا انحطيتي بقبرك وجاك ربي يقولك وسألك ليه سويتي كذا ؟
وش ردك عليه..! بنات والله ماينفعك..
تدرين ليه اقول كذا .. لاني اعرف كثير وعارفه هالشي صعب بس من ترك شي لله عوضه الله خير منه..
ما اتدخل طبعاً لكن احبك حتى لو ما أعرفك درسنا نحل مشاكل فمن واجبي تجاه هالظاهره اني أترك لها حل
وبدورك اتركي هالشخص اللي بنيتي معاه علاقتكم بالظلام و بغموض ووضحي له انك تعدلتي
و ادعي ربك قولي ( اللهم اني تركت فلان لوجهك الكريم أبدلني عنه بالزوج الصالح الذي يحبني ويخافك فيني ويرحمني)
وربي مايخيب ظن عباده ولا يرد من دعاه وترك معصيه لوجهه
اكثري الاستغفار وادعي بالزوج وبيتحقق مناك أفضل و أستر من علاقه فاشله تاخذ من عمرك كثيررررر على الباطل ، صح علي.. ؟
حاولي و حاولي وحاولي..
وادعي ربك قولي يارب لاتعلق قلبي بأحد وجنبني المعاصي والفتن واهدني اني احذف اللي عندي وارزقني من قوتك قوه وأكرمني بالعزيمه..
بنات.. تكفون .. =)..
عدلي لو شي واحد وادعي ربي لنفسك دائم..
صح ولا انسى الاغاني والافلام العربي والامريكي والكوري<~ يارب صبرنا وأعنا..
أنا ماني خاليه من الذنوب وعندي معاصي مايعلم بها الا الله لكن خلونا نكافح ونوقف بوجه ابليس اللي فرحان وسعيد بلهونا
أنا أنقهر اذا سويت معصيه أتخيل ابليس ينط ويرقص وأحاول أقهره ..
جمدي قلبك و اتركي الملهيات اللي تقدرين عليها بالتدريج لأنك اذا انحطيتي بقبرك ماراح يٍسألوا عنك .. بتنحطين بقماش انتي بلحدك وذنوبك معك..
حاولي انك دايم تذكرين صاحباتك بالجنه والاشياء اللي تعينكم على الخير حتى لو منتي ملتزمه أكيد فيك خير
تخيلوا من كم يوم سمعت عن قصه ..
في اثنين أصحاب كانو قاعدين بمكان <~ اجل وين
المهم.. قاموا يتكلمون عن الجنه والنار والخ.!
واحد دمعت عينه بذكر النار خاف منها.. بعدها بمده توفى صاحبنا .. وجا لخويه بالمنام ..
قاله صاحبه: يافلان شخبارك..؟
قال: اخباري.. انا بالفردوس الاعلى اعلى شي بالجنه..
قاله: صديقه ليه..؟
قال: تذكر يوم نقعد نسولف انا وانت وذكرنا النار ودمعت عيني.. هذا اللي دخلني الجنه ووصلني الفردوس ..
شفتي ربي قد ايش كريم و رحمن رحيم غافر الذنب قابل التوب .. سبحانه
بنات.. طولت عليكم..
بس وربي فيني تكه ضايق صدري على حالنا البايخ..
نطارد ورا الدنيا قال وقيل وأسواق وسفر وماركات وفساتين وبذخ بذخ .. كنها بتدوم لنا هالدنيا
أعرف واحد بلحظه وبفاجعه ماتوقعناها ابتلاه الله بمرض مع انه كان سليم ما شاء الله ..
قلنا لعله خير وسبحان الله الواحد يتعض من شفت حاله ومريت بأزمته وحزنت عشانه بس شيفيد الحزن هذا ابتلاء من ربي عشان نحسن وضعنا ونبطل لهوووو
خلينا نعمل دين ودنيا ماتتمنون مثلي انو تتهنون بنعيم الجنه "فيها مالا عين رأت ولا أذن سمعت ولا خطر على قلب بشر" تكفون خلونا نتحمس سوى ونتعدل مع بعض..
الله يخليكم.. لي طلبه اخيره..
احنا نشرنا هالكلام عبر الايميلات ورح أكون مسروره لو انتشر أكثر عل الله ينفع به أحد ويجمعنا بجنات النعيم
اذا اعجبك الحكي وعارفه اسلوبي مدري وش يبي بس انسخيه و ارسليه لاقرب شخصه لك .. اللي تحبينها وتخافين عليها من نار جهنم..
لا يقولك هالسخيف<~ تقصد ابليس
لاترسلين مشوار انسخ و ألصق وكذا
إذا متعنيه ترسلين أو منحرجة توصلين رسالتك لأحد عشان مايحسونها دقه عليهم عطيني الإيميل على الخاص و أنا أرسل ايميلات للعدد اللي تبون
و اشركيني بالأجر الله يتوب علي وعليك ويرحمنا برحمته
واذا بغيتي تحطينه بمنتدى ثاني بتصيرين بطله الله يجزاك خير
يلزم عليك تسجيل الدخول أولًا لكتابة تعليق.
ammouneh
•
ما اجمل كلامك الله يعطيك العافية ورزقك الجنة ،،،
بس مستغربة من عنوان موضوعك يستحق عنوان اقوى واجمل من هيك حتى الجميع يقرا ويستفيد
بس مستغربة من عنوان موضوعك يستحق عنوان اقوى واجمل من هيك حتى الجميع يقرا ويستفيد
بارك الله فيك كلام مؤثر ولك الاجر عليه
ادعيلي معاك ربي يرضي عني ويفر همومي ولاحول ولاقوة الابالرحمن
ادعيلي معاك ربي يرضي عني ويفر همومي ولاحول ولاقوة الابالرحمن
الصفحة الأخيرة
وجعله في موازين اعمالك يارب