ما خاب من استشار ادخلي وابدي رايك

حبيبتي انسي فكرة انك تعمرين باسمه
الله لا يهينك عندك فلوس وتبغي تضمني مستقبلك خلي واحد من اخوانك او ابوك يساعدك واشتري لك ارض وقسطيها
وفي نفس الوقت ادخلي جمعيات واحفظي فلوسك واذا عالايجار كلنا بايجار غير الناس بنكون ؟!
مثل ماقلت لك اشتري ارض وقدمي على صندوق التنمية العقاري يعني ان شاء الله على ماتكوني خلصتي اقساطها وقتها يكون دورك باستلام القرض وصل وعمري شوي شوي بحلالك ولا تستعجلين وتدخلين شريك بعدين مستقبلا تعبك وشقاك بدل مايكون لعيالك رح يكون لعيالك وعيال زوجته الثانية فعلى الاقل اعملي بالاسباب واحرصي من هذه الناحية....

واذا خلصتي عمار وودك تسكني واطاعك كان بها والا اجريها وخبي فلوسها لك ولعيالك ما تدرين عالاقل تأمني مستقبلهم والأمان بيد الله اولا واخيرا .... وحده من قريباتنا عمارتها من حر مالها ولارضيت يدخل معها بريال وبعد عمر طويل تكون لعيالها اما عيال شريكتها فمالهم الا حلال ابوهم لانه بعد فتره عمر بيت والاكيد لعيالها كمان نصيب من ابوهم ... ومع هذا رفض انها تنقل لبيتها واصر تجلس بشقه 4 غرف وصاله مع ان بيتها قصر من كبره بس عمرته نظام شقق عشان كانت حاسبه حساب اذا كبروا عيالها يصير لكل واحد شقة ويرتاحوا مستقبلا من الايجارات واجرتها بالعافيه ما شاء الله لاقوة الا بالله لها فوق 6 سنوات ودخلها ينزل بحساب خاص ما تصرف منه ابدا وممشية نفسها بالراتب ومبسوووووووطة والاهم مرتاااااااااحة من النكد والقنقنة وهذا لي وهذا لك وتعبي وتعبك وليه وماليه....فهمتي...

الاكيد زعل واعترض بس قالتها بصراحة اذا مت بتكون لعيالك يعني ما انت خسران ومع الوقت تعود وخلاص

هذه تجربه صارت وكمان في المقابل فيه اللي ساعدت زوجها بالبناء وشرت لها سياره وضرب بها عرض الحائط ولاكأنها سوت شيء

وفيه الوفي وهذولي ندره صعبه تلاقيهم بذا الزمن


عاد فكري والله ييسر لك

انتبهي تعبك يصير باسمه تضامن احسن عن الشك وعن يوم يجي تندمي ولايفيد الندم الحق حق ولاتتنازلي حتى السلف لا تسلفيه من غيرورقه يثبت حقك واذا كتبها لا تخليها في البيت عند اهلك الرجال ما لهم امان مهما قال

خلي البيت مشترك بينك وبينه احسن واضمني مستقبلك ما تدرين عن الدنيا يمكن يعرس والثانية تشاركك في ورثك
بعدين وكلي امرك لربك وعيشي حياتك ولا تخلين هاجس العرس تسيطر عليك اللي ربي كاتبه لك بيصير
والله يسخرة لك

لوشريتي ارض او عماره انتبهي تكتبينها باسمه
الرجال مالهم امان

اشتريها بفلوسك وخليها بأسمك اذا قال شي قولي انا ابيها لي لو يصير لك شي يورثون اخوانك معي عشان كذا خلها باسمي احسن ولاتجيبين له طاري انك تتزوج على