prelcream @prelcream
عضوة
ما راح اقولج بتتغيرين بين يوم وليله بس
السلام عليكم بنات و حريمات
طبعا كلنا عارفين انه هالقسم صار خلطات في خلطات ،،، اليوم مدحوا الخلطه ووصلوها السما و حلفات وايمان غليضه وباجر نزلوها سابع ارض ،،،،
عني انا ما استغرب هالشي لانه عارفه هالخلطات الغريبه العجيبه اللي توعدج تتغيرين ما اتييب نتيجه
ليش هالثقه اللي عندي؟ تعالي اخبرج
انا وحده عندي قناعه مطبقتنها في حياتي و علمتها بناتي انه الاهتمام بالنفس ما ايي بين يوم وليله ما راح تنقلبين لوحده ثانيه من خلطه استمريتي عليها اسبوع او شهر وتتوقعين جسمج او شعرج او بشرتج تنقلب 180 درجه لا حبوبه
الاهتمام بالنفس والجسم والبشره والشعر هذا شي لازم يكون دائم لازم يكون جزء من جدولج اليومي و روتينج اما انه تكونين مهمله نفسج و تبين خلطه تحولج من ،،، الى فاسمحيلي انتي عارفه وانا عارفه انه هالشي ما راح يصير
شي واحد مب فاهمتنه في منتدى حواء ،،، وهو الخلطات الغربيه اللي مكوناتها ما يخصها في بعض يعني وحده تقولج خلطه فيها فكس طبعا الفكس يهون عند خلطة وحده فيها تانغ (يييس تانغ ما غيره العصير اللي طعمه صناعي) امممممم انزين يعني انا بالله كيف الاخت اكتشفت انه تانغ يفيد البشره؟!!! لا واللي تقولج حطي حبة مانع الحمل في الشامبو ولا الخلطات اللي متروسه كريمات مادري يعني الاخوات انقلبوا دكتورات ولا شو
ومن كثر الخلطات اللي مكتوبه بعدها المشاكل نفسها نفسها في القسم ،،، عدم توحد لون بشرة الجسم ، خشونه في بشرة الجسم ، حبوب ، مشاكل ثانيه
انزين اباج تتخيلين ويايه وحده تهتم بنفسها واهتمامها بنفسها يومي يعني نظافة يوميه ، سكرات للجسم ، كريم الجسم يوميا واهتمام بالشعر واليد والقدم وطبعا بشرة الوجه عندها الكريمات المناسبه ،،، تتوقعين هذي مشاكلها مثل مشاكل اللي ما تهتم بنفسها. ما اتوقع
انزين خلوني اقولكم عن جدولي اليومي
طبعا اول اليوم بدايته شاور عني انا استخدم نوعين من الصابون اول شي لازم الصابون الجامد مع الليفه سواء ليفه مغربيه او ليفه طبيعيه طبعا الصابون اشكال وانواع اختاري اللي يناسبج وافضل الطبيعي في هالمرحله الاولى من الشاور مثل صابون الطاووس او صابون لوكستيان بالحليب او الصابون النابلسي وفي الصيف صابونة ديتول عشان التعقيم ،،، بعد ما اغسل الصابون من على جسمي احط الصابون السائل عشان يعطي ريحه حلوه لانه اكيد ما ينظف مثل الليفه والصابون الجامد
بعدين وانا جسمي رطب احط شوية فازلين على الاماكن الجافه مثل الركب ،، الكوع، المنطقه اياها ،
بعدين اختياري على حسب مزاجي اذا بحط نقاط من مسك العروس وافرك فيه جسمي كامل
طبعا اكون غاسله شعري قبل ما ابدا اغسل جسمي وارفعه
بعدين اتنشف واحط كريم للجسم عادة انا ما احط الكريمات المعطره ما احس منها فايده لجسمي الا اذا كان عندي مناسبه فاغلب كريماتي كريمات مرطبه للبشره
على منطقة البطن والارداف احط زبدة الشيا
احط بودي بتر (زبدة الجسم وبعد تكون غير معطره مثل سيباميد) على منطقة الركبه والكوع
البس تيشيرت لين يمتص الجسم الكريمات اشرب كوفي وابدا في كريمات بشرة الوجه واحط تونيك على شعري وبعدين احط شوية بودرة على جسمي تكون ريحتها خفيفه ونظافه البس الاندروير و ارش بودي ميست على جسمي كامل واحط مسك على اماكن النبض
بعدين البس ثيابي
لله الحمد ما اعاني من مشاكل غير بعض الخطوط اللي طبعا اتي بعد الحمل و خفت لاني مهتمه فيها وشغلي الشاغل انها تروح (على فكره جربت البايو اويل كم شهر ما فاد فلا تخسرون فلوسكم عليه) زبدة الشيا احسن بمراحل
ايدي احط عليها زبدة الشيا فليل وبعد ما تمتص ايدي زبدة الشيا احط كريم ثقيل بتر من بودي شوب (مش اللي فيه عطر اللوز ) والصبح احط كريم خفيف لليد وخلال النهار كل ما اغسل ايدي حطيت كريم
ريولي دايما الدلاق لابستنه وفليل احط كريم للقدم سواء من فازلين او ايفون كلهم حلوات
شعري ازيته على الاقل مرتين في الاسبوع ومن تجاربي خلال سنين وايد و بعد خذت من زيوت البنات وخلطاتهم اكتشفت انه غير الزيوت الهنديه انسي احسن شي دابر املا ، رامتيريه او اي زيوت هنديه ثانيه وكلها بنات اصليه لا تقولون التقليد والاصلي بالله من متفيج يفتح مصنع عشان يقلد منتج اصلا ب 5 دراهم؟
صبغ ، كيرل ، سيشوار ، تمليس او تجعيد هالاشياء كلها مش في قاموسي لانه تضر الشعر وحتى المنتجات مثل مثبت الشعر والموس والجيل وهالاشياء استخدمها في اضيق الحدود يمكن ما تعدي 3 مرات في السنه
مكياجي استخدمه من احسن الماركات عشان ما يضر بشرتي ،،، الفراشي اللي استخدمها من ماك و بوبي براون لانه نوعيتهم ممتازه واغسلهم مره في الاسبوع عشان ما تنتقل الجراثيم لبشرتي
كريمات بشرة ويهي ما استرخص واخذ الكريمات الرخيصه بالعكس اخذ كريمات معروفه واكيد قبلها اكون مسويه بحث عشان اعرف شو المناسب حقي ولا اروح للبياعين (لانهم عن تجارب ما يفهمون كوعهم من بوعهم خاصه الاخوان الشوام فلسفه عالفاضي ولا يتعبون نفسهم انهم يتثقفون عن المنتجات اللي يبيعونها لا بيتفلسفولج ويقولولج اشياء اصلا غلط بتخسرين فلوسج وما ينفعج المنتج اللي يتكلمون عنه) ، طبعا اسوي سكرب لبشرتي مرتين اسبوعيا بسكراب ناعم مش الخشن ستيفنز وغيره حق بشرة الجسم مش الويه ،، طبعا فيه اشياء كثيره اسويها بس اكتفي اخبركم عن الاهتمام العادي للي تبا تبدا تهتم بنفسها
رموشي استخدملها زيت الخروع
فليل شاور ثاني يكون خفيف بشاور جيل بروائح مريحه مثل الافندر او الفواكه مثل المنجا وغيرها
اخذ حبوب مالتي فيتامين و زيت كبد الحوت يوميا
النظافه يا بنات النظافه اهم شي واللي لاحظته واسمحولي في هالكلام لما تتكلمون عن الدوره والنفاس والله وانا ورا الكمبيوتر تلوع جبدي اللي تقولج يومين ما اسبح واللي تعميها تقولج كم يوم وعوار والحاله حاله لا ويدمرونها ويشربون حلبه واشياء تطلع ريحه ،،، حرام عليكم النظافه من الايمان اهم وقت اسبح فيه هو وقت الدوره تراها نظافه كيف يعني ما اسبح يمر عليه 24 ساعه من غير سباحه ؟!!! ونحن اهلنا علمونا صراحه على النظافه خاصه وقت الدوره ما احيد امي او يدتي قالت لا تسبحون بالعكس مشالله عليهم صحتهم مافي احسن منها ولا سمعنا خراب ولا عقم ولا غيره ونحن على دربهم مشينا وبناتنا نفس الشي والحمدالله لا اشتكينا خراب ولا عقم ورياييلنا لله الحمد لا حد خان زوجته ولا حد تزوج عليها الا يحبها بزياده عسب نظافتها وكلنا اتينا اوجاع في الظهر وهذا شي طبيعي مع الدوره بس ما اتشلل ولا اتكسح عشان اعطي عمري عذر للوساخه اني يوم يومين ما استبح بنات جد ما اتخيل بس اللي متعود على النظافه ما يهدها ،،، نحن معروف عندنا من الوحده تولد تدلع نفسها ساعه عقب الولاده على ابو انها تستريح عقب شاور سيده خل تجابل نفسها بنظافه اصلا كيف بقدر ايلس وانا حاسه اني ولدت وما سبحت
كلامي هذا ما بيعجب جيل الحلبه والحلتيته (ما اعرف شو هو بس قريته ههههه) وجيل لا تسبحين لين تشوفين العفن طالع والشعر قمل وصيبان عشان ما يستوي خراب هذيل ما بيغيرون تفكيرهم اللي عايشين فيه ،،، نصايحي حق الجيل اليديد لا تسمعون انه النظافه متعبه او اتييب امراض لا الوساخه اللي اتيب امراض واكتئاب
اسمحولي اذا كان كلامي جارح بس يعلم الله اريدلكم الخير واحس فيه بنات بسيطات ودهم يهتمون بنفسهم بس مب عارفين كيف ويعتقدون هالخلطات هي طريقهم للاهتمام
46
6K
يلزم عليك تسجيل الدخول أولًا لكتابة تعليق.
سوسوz
•
تسلمين على اروع موضوع قريته
الله يجزاك خير على هالكلام اللي مابعده حكي
صدقتي في كل اللي قلتيه
ونظامك روووووووووووووووعه
الله يجزاك خير على هالكلام اللي مابعده حكي
صدقتي في كل اللي قلتيه
ونظامك روووووووووووووووعه
الصفحة الأخيرة
تسلمي على الموضوع المفييييييييييييد
كلامك 100%
,,,,,,,