كانت الليلة الأخيرة لي في بطن امي .. لأن مدة الإقامة انتهت و أنا ما دفعت الاجار هاهاها .. و بدأت آلام الطلق تدّهر .. شقلوني مع علباي وشاتوني للدنيا .. أطيح وأطيّح .. طلعت للدنيا بصرخة .. وبعدها بدأت أشهق وابتسي .. على فكرة كوولنا صرخنا .. لا تحاولون .. محدش احسن من حد .. ما عدا مريم وابنها عيسى عليه السلام .. قال صلى الله عليه وسلم : ( كل بني آدم يمسه الشيطان يوم ولدته امه إلا مريم وإبنها ) ..
<- هذه أنا عقب ما سكت من الصيااااح .. بس مااااش .. اهاوش على الدكتورة ليش تطلعني من بطن امي ..
بعد الطفرة والإنفتاح اللي مدري وش يبي .. صار من ضمن ابجديات التمدن الإحتفال السنوي بهذا اليوم .. بكيكة يركزون عليها شموع بعدد السنوات اللي عاشها هالنفر ( عاد الحرمة من توصل عشرين تصير عدد شموعها ثابته ) .. ولاّ لو الناس يحتفلون به على ايام الفقر كان ركزوا عود كبريت على حبة اقط وانتهينا .. المهم و يعزمون لفيف من الأصدقاء اللي ما احد منهم يعتب الا وهو متأبط هديته <- ازين مافي الدعوىىىى .. عاد تالي الليل لين طسوا المعازيم يبدأ الواحد يشق من هالتغاليف ويشوف وش جايبين له .. و يطفون الانوار و يغنون ( هابي بارتي تو يو .. سنة حلوة يا جميل ) <- عاد يجاملونه في الحفلة .. وبعدين يصفقون و ياحلالاة من صفّقهم .. و يهف الشمعة وانتهينا ..
عاد تصدقون خيره اننا ما نحتفل به .. بغض النظر عن حرمته دينياً .. لاني ما عرفت تاريخ ميلادي الا على كبر .. أسأل عنه يقولون .. اصصصصبري ..:04:. يوم ننزل في ذا البيت وانتِ تحبين :hahaha:.. يوم عرس محمد وانتِ في بطني :hahaha:.. حنا ناس ما نعترف بالتواريخ .. لااا .. نأرخ بالأحداث .. ثانيا بالله من بينفخ الشمعة .. نص المعازيم بزران مشافيح .. و كلهم بيقطون في ذا النفخة من باب المشاركة الأخوية .. ومهب بعيدة نلقى كريمة الكيكة في الجدار من قوي الخشش .. ثالثا مدري وين قريت فيه ان الاحتفال بيوم الميلاد وهو احتفال بقرب الواحد من الشيب و الشيخوخة والقبر والأعمار بيد الله .. ودكم واحد يستخف دمه في الحفلة ويقول ( وووش الشيء الذي اذا زاد نقص ؟ )
في النهاية .. نختم الموضوع بقصة أوردها ناصر الحجيلان .. يقولكم انه واحد من الشباب ينطبق عليه المثل اللي يقول ( تطورت منفوحة ) قرر الاحتفال بهاليوم .. نصى المملكة مدري الفيصلية وحجز له ذيك الطاولة في مكان مميز .. و عزم اخوياااه و قاطع على الكيكة .. و فلّوها ذيك الليلة بالردح و التوووويووو اللي شوي وتظهر مع اذانيهم من كثر ما رددوها .. وعقب دقّوا في السمك والجمبري .. و يوم جت الفاتورة فتحها و من زود الصدمة سكرها على طول .. وبدأ يتعبّر ويصيح .. انصدموا اخوياه .. وش السالفة ؟ اعتقدوا انه ضايق صدره علشان الحفلة بتقضى .. لكنهم اكتشفوا الحقيقة المره اللي زلزلته .. قيمة الفاتورة 6000 ريال .. وما في جيبه الا 300 ريال .. وش السواة الحين ؟ فزعوا له و تقاطوا و كملوا المبلغ وطلعوا يجرون اذيال الخيبة ! وهم يرددون وافشيلتاااااااه ! ..
مع السلامة تويو ..
:04: