.
.
النص ريال اول ما نسمعه على الطاير يتبادر للذهن
انه واحد سلك خويه بمحش،هرجة فاضية مالها داعي، استحقار لاحد!! (زي الي يقوله وجهك كأنه نص ريال!)
نسمع في الدنيا كلمات زي:
"هذا الشي ما يساوي نص ريال"(استحقار) أو " مسوي زحمة على نص ريال"(محش) او "يبويا كلها نص ريال" (استهتار!)
ولكن الهرجة اذا زادت نص ثاني وصار "ريال" !!
تختلف اشبك في فرق! هذا نص ريال يعني ولا شيئ هع اما الثاني غيير اسمه رياااااااال!!
بصراحة وكلنا عارفين الأغلبية كيف ، ما هو النص ريال (الـ50 هللة) بالنسبة لنا؟؟
تروح البقالة وناوي تشتري أشياء معينة وما تبغى تصرف زيادة تسمع البياع يقولك : الحساب سبع ريال ونص
يااااا الله تلاقي وجهك قفل واي شيئ ، وترجع العصير او الشيئ الي زايد نص او تزود نص وتمشي
اهم شيئ النص هذا يتصرف
او هات لبان وآخرها ارميها في السيارة كم يوم وتشوف الشمس اعطته طاقة خلت اللبان يلصق في اي مكان في السيارة!!
وتخليه زي الكمين بمجرد تحركه الله يعينك تلاقي على يدك والدركسون والبريك لين تحس انك سبايدرمان!!
بس أهم شي.....انك ماشلت النص ريال!!
يا ناس ترا الغلا الي حاصل هذا مالو سبب الا البطرة الزايدة والكشخة الي مو في مكانها
ايام زمان الـ70 الف زمانكم تساوي عندهم؟؟
الـ70 كأنها يمكن مليونين وشوية الي معاه 70 الف يعتبر عايش في عز
واليوم تلاقي واحد معاه ملايين لا هو مينعليه
وجتى لو كان عنده 7 ملايين مابيقول الحمدلله!!
لو تسألوا اهاليكم تعرفوا قيمة الهللات والقروش هذه،، انا الوالدة عندي كان مصروفها اقل من ريال!!
كم بالضبط مني متذكر بس اقل من ريال مصروف كامل ويبقى منه كمان
ياناس الأسعار ارتفعت فووق لا اذكركم بذكرى النيدو السيئة !
شركة السعودية سدافكو زودت كل منتج من منتجاتها 50 هللة (نص ريال)
المشروبات الغازية كلها زادت نص ريال كذا، ما زادت ريالين زادت نص عشان يوقف في الحلق لين نعترف به كعملة!!
عشان الواحد لا ينحشر قدام،، يمكن يعبي حق البنزين زيادة نص ريال واخينا على طفران
ووقتها كالعادة يقول له "يبويا كلها نص ريال" ووقتها ما يمشيه الرجال (الزمن تغير!!)
ويلا اشحت نص ريال ولا شفلك احد يقطلك شوية هللات!!
منعا للاحراجات المستقبلية نصيحتي لكم:
اي وحده ما معاها هللات في جيبها اقرب بقالة اعطيه 5 او 7 ريال وخليها هللات (أنصاص) ويحطها في المحفظة
والي عنده محفظة ما فيها الا جيوب للريالات والبطاقات حسن له يرميها ويغيرها!!
اشتروا محافظ تعترف بالنص ريال ،،، الـ50 هللة