متزوجة وعندك بنت ممكن تجاوبي على سؤالي ؟

لنفرض بنتك كبيرة تقريبا في سن مراهقة ، بنتك دي جدا جدا بارة بك ومطيعة وتلبيلك طلبك حتى من قبل لاتطلبي وحاسة فيك وتحاول ماتبين لك حزنها لأنها عارفة بظروفك وبمشاكل البيت فماتبى تزيد همك همين ، بس المشكلة إن هي حساسة زيادة عن اللزوم وسارت في عالم ثاني من التفكير وماتنام الليل ، وانتي منتي حاسة فيها حتى لمن تقوم وعيونها مفقعةتحسبيها مفقعة نوم وهي أصلا ماذاقت النوم من البكى .


لنفرض إن يوم من الأيام اتغيرت معاملتها لك ، سارت ترد عليك ، ترفع صوتها ، تصارخ وحتى اخواتها مايمر يوم إلا وهي متضاربة مع وحدة فيهم ، وهي البنت دي حست بنفسها ، حست إنها بتروح للغلط خطوة بخطوة ، سارت تكلم أولاد ، تحب بنات وتفكر في ........


لكن كل دا مو حاسة بيه ، لأن البنت ماتتكلم ولا تقول ، وأنت كنت سبب وصولها لدي المرحلة لكن هي خايفة تقلك ، خايفة لأنك تحمليها دايما أخطاءك وتستهزأي بمشاعرها و خوفها الأكبر إنك تسيبي البيت لو عرفتي ، لأنك دايما تهدديها بدا الشي عشين تسمع كلامك .


إلي سار إن هي راحت وكلمت المرشدة الطلابية وقالتلها بعض الأشياء الي تحس فيها ، وعلى غير العادة فهمتها أكثر منك ، وطلبت إنها تكلمك مع العلم إن بنتك إنسانة متفوقة يعني محد قدها ، فاستدعتك المرشدة وفتحت معاك الموضوع ، كيف حتكون ردة فعلك ؟
بغض النظر عن نوع الموضوع إلي انفتح معاك ، كيف حتكون ردة فعلك مع المرشدة ومع بنتك نفسها ؟


هل حتزعلي وتقولي للمرشدة تبعد عن بنتك لأن هي مافيها شي وان هي الي بتلعب في راسها ؟
ولا حتشكريها لأنها كلمتك وتكوني على اتصال معاها ؟
وبنتك هل حتكلميها بكل هدوء وتعتذري وتقوليلها إذا في شي تقلك وماتروح لأحد تاني لأنك هنا عشانها ، عشان تحليلها مشاكلها ؟
ولا تحمليها الخطأ كالعادة وتستهزأي بيها وتمنعيها تكلم المرشدة تاني في أي شي ؟


ملاحظة : القصة فقط ضرب من المثال ، وليس لها أي من الصحة