متزوجه جديده وعندي اسئله

في البداية اقلك مبروك وتتهنون يارب
اول مشكلة مو مشكلة
عادي قومي انتي وجيبي الاغراض الناقصة لانه شغلك وقليل من الرحال مستعد يسوي اي شيء بالبيت
فلا تسوين منها مشكلة

بس المشكلة الثانية فهذي مصيبة
معقوول رجال يستهين بأمه؟
احس لو زوجي بهالشكل حخاف على حياتي معاه
الي مافي خير بأهله مافي خير بالناس
لازم تنصحيه بوجه وتقوليله عيب هذي امك ماتخاف لما نجيب عيال ولادنا يعقونا؟


المشكلة الثالثة والله مدري وش اقلك
لان كثير شباب في بداية زواجهم يستهينون بأشياء بس بعد فترة تلاقينهم تبدلوا والغيرة زادت
مثلا زوجي حسيت انه يغار علي مزبوط بعد سنة من زواجنا
فانتي لا تستعجلين عرزقك
وسوي الي يمليه عليك دينك وماتنتظرين حد ينصحك او يغار عليك

الله يووفقك ويسهل امررك رفع

انا مع كلام الاخت لولو

المشكله الاولى
عادي ردي عليه باسلوب لطيف انك ماتحبين احد يقطع عليك وجبتك واطلبيه هو يجيب اللي ناقصه
الا ان كان اللي ناقص المفروض تكونين حاطته عالسفره هنا انتي جيبي له

المشكله الثانيه
اغلب الشباب كذا يحبون امهاتهم لكن مايهتمون
انتي دورك كزوجه انك توجهينه كيف يبر ب امه
مثلا مثل موقفك اللي ذكرتي ادخلي عليه الغرفه واطلبيه يجي يجلس مع امه وان خاطرها منكسر ودها تسهر معه
اطلبي تطلعون معها تتمشون او تزورونها واساليها اذا ناقص عليها شيء قدام ولدها عشان يتعود يخدمها ويبر فيها

المشكله الثالثه
اتوقع لان زوجك مو من النوع اللي يدقق بالحريم بالاسواق والاماكن العامه
فمو شايف سبب واضح لانك تمسحين الكحل
واصبري مع الايام والمواقف بتبدأ الغيره

وعليكم السلام ورحمة الله وبركاته
المشكلة الأولية ياقلبي عادي كلنا كذا واتوقع البيت شقة عادي مافي مسافة وعودي نفسك انتي على هالشي
بس عشان لاتقومين كل شوي إذا جهزتي السفرة إسأليه فيه شي أجيبه قبل أجلس
لأنه ترا إذا جلست ما أحب أقوم لأنه غذا قمت خلاص تنسد نفسي عن الأكل (تراني زيك يالغلا ومع ذلك زوجي نفس طريقة زوجك) بس عالجتها بالطريقة اللي قلت لك عليها ليش عشان إذا جلست ماعاد يفكر يطلب ياكل من اللي قدامه وخلاص هذا في بداية زواجي
لين كبروا عيالي وصاروا يقومون يجيبون لي أنا اللي ناقص هههههههههه
أعودهم قبل لايكبرون على نفس طريقتي لأني أشوفها نكدت علي حياتي :(


أما الأم برضه عندنا وعندك خير بعض الشباب سبحان الله ما ينبسط بسواليف أمه يمكن لأن أمه طيبة بزيادة
أو مشكلجية بزيادة أو نوع سوالفها مايهمه فتلاقينه يحشمها ويحبها ومايرضى عليها وحتى لو سوالفها زينة ومثقفة
بس هو ينبسط مع ربعه أكثر وهذا لأنه رجل إهتمامته مختلفة وأنا اشوف عيالي وأخواني
مهما جلسوا معنا إلا انهم يحبون جلسات ربعهم اكثر وهذي طبيعتهم أنا بعد إذا طولت الجلسة مع أخواني وعمامي
أشتاق لجلسة النسوان نوعية سوالفنا حتى لو هي نفس سوالف الرجال إلا ان أسلوبنا وطريقتنا تختلف

أما الغيرة
بعضهم عنده ثقة وبعضهم يشوف نفسه ماينتبه للشي فيظن الناس مثله
ومن وجهة نظري الكحل مافي شيئ إلا إذا كحل مبالغ فيه
وأصلا النقاب المفروض يادوبك يطلع منه فتحة العين مو نقاب مططلع جزء من الخدود
وأصلا المفروض فيه قطعة فوق النقاب تنزلينها على عيونك تكون مثل مظلة الكاب :) ماحد يشوف منها شي
وعموما أنتي أغرف بنفسك ولاتسوين مشكلة من لاشي يغار مايغار راجع له وأنتي إلا تغصبينه يغار
ترا غالبا الغيرة تبع من الشك وعدم الرضى ولوشاف أحد مسوي حركة بالشارع قام حط اللوم كله عليك
فأنتي إستري نفسك عشان الله مو عشان يغار أو مايغار
والله ييسر لك أمرك يارب ويرزقنا وياكم رضاه وطاعته والعفو والعفاف والعافية والجنة
اللهم آمين يارب العالمين