الله يفرج عليك ياقلبي

بعد هذا العمر بتغيرين طبعك نصيحه مني روحي راضي زوجك حتى يرضى عليك ربك واهم شئ انك مع عيالك والله يسخره لك

الله يجزاك عن صبرك الجنه وتعبك ماضاع بلاش عند كريم مقتدر مايضيع والحمد لله جبتي العيال والبنات الي بيعوضونك عنه وهو الله يهديه ويسخره اضنه على قولتك تعود عليك اتراضينه من اول علاقتك فيه عودتيه

فانتي اصبري وكملي المعروف لعله يموت وهو راضي عنك

بس تقربي منه بدون ترجي زياده وهو تلقينه مهو مصضدق بس مسوي نفسه يعني ماهمه والله يسخره لك
الله الله في صحتك لاتنعدم من الهم ترى ماعاد احد بنافعك بسم الله عليك تجيك جلطه ضغط

خلاص ريحي نفسك والا عاد تهمينه ان جا اهلا ون راح مع السلامه نفسك نفسك وبس

السلام عليكم ..
كل أخواتي اللي ردو علي سألت الله لكم في هذه الساعه
ان يجعل لكم من كل هم فرجا ومن كل ضيق مخرجا ,,,

اسعدتني ارائكم حتى اللي تحاملت علي
وصدري يتسع لكل الأراء

اختي اللي تقول اتركي البيت وروحي لأهلك ؟؟
قالولي بناتي يمه ازعلي وروحي لبيت جدي يمكن اذا غبتي عنه يحس ويفقدك
لكن انا مااااالي قلب ماأقدر ابعد عن عيالي هم الحياة بالنسبه لي خصوصاً ان عندي 2 صغار وشي ثاني ماودي اشتت
عيالي ابيهم يركزون على مستقبلهم ماأبي بهذا العمر ابهدلهم وابهدل نفسي ,,

الاخت اللي تقول عودته .. ادري تعود لكن من غير قصد
تعرفين شعور الانسان لما يكون طول الوقت خايف ممكن يسوي اي شي
حتى لو يضره هالشي في سبيل انه يحس بالأمان !!
تصدقين من الخوف وصلت لدرجة انه اول مايقوم من النوم اطالع وجهه واتابع نظراته واعرف انطباعه
تصدقين من الخوف اول مااسمع صوته يوجعني بطني ويجيني توتر
خليها على الله جابلي الامراض النفسيه



انا مشكلتي الآن داخليه خووووف من الله ولا هو ماعاد له اي قيمه عندي غير الرحمه فقط خايفه يكون علي ذنب بهجره !!
ودي اريح ضميري ويرضى ولا ودي اهين نفسي اروح اترجاه وانا ماسويت خطا ابي احافظ على اخر قطره من كرامتي اللي سنين وهو هاينها يعني صراع داخلي
احياناً والله اني اوقف على باب غرفته ثم ارحم نفسي من المذله وارجع
وعيالي يوم يقولون لاتراضينه .. ماهوب كره لابوهم لاوالله يحترمونه ويخدمونه ويدعون له بصلاح الحال
ياعمري عليهم حتى هم متأذين منه وشره واصلهم ومتعدي مايعرف يكلمهم الا بتهزيء وشتم ويحرجهم حتى مع اصدقائهم

والبنات اااااااااه ياعمري على البنات لو تشوفون شلون يعاملهن تقولون جاريات
اقسم بالله العظيم اذا صرخ ونادى احد البنات انهن يتراجفون مثل الدجاج وهن كبار
وش اقول وش اخلي زرع بقلبي وقلب بناتي الخوووف منه وهذا اكثر شي مخلي قلبي شايل عليه
تصدقون انه يسأل البنات انتي بأي سنه تدرسين وانتي يافلانه وين وصلتي بالدراسه من قل اهتمامه فيهم
مايدري عن هوى دارهم
اساساً هو يكره خلفت البنات ودايم يقولي احمدي ربك صابر عليك وانتي جايبتلي 5 بنات !! على الرغم اني جايبتله اولاد الله يحفظهم وهم الكبار بس يبي كل خلفته اولاد كأن الأمر في يدي واذا ولدت في المستشفى ودرى اني جبت بنت يزعل ويخليني بالمستشفى حتى قولت الحمدلله على السلامه مااسمعها منه ولا يجي الين اتصل عليه وهو زعلان وينافخ
وتشوفينه كأنه في عزى حتى اللي يهنونه ويباركون له يقولهم لاتباركون لي تباركون لي على بنت ؟؟ يعني البنت ماتستاهل اللي يبارك فيها !! للمعلوميه على هالعقليه اللي عنده تراه انسان مثقف ثقافه عاليه جداً لكن افكاره مازالت رجعيه مو بس رجعيه الا جاهليه .. يوم كنت ادرس كانوا بعض البنات يكتبون حكمه على السبوره وهي ( العلم في الراس مو بالكراس ) يستهبلون ماكنت أؤمن بالهالحكمه الين تزوجة هالانسان لقيتهم صادقين فعلاً العلم في الراس وما يحوي من افكار وليس العلم بالشهادات والاوراق ..

ساااامحوني خواتي اشغلتكم معاي وكتبت اشياء غير مفيده وغير مرتبه لكنها في خاطري ومضييقه صدري
ومدامكم لاتعرفوني ولا اعرفكم خل اطلع اللي بقلبي وارتااح شوي من الضغط

الله يسعدكم مثل مااسعدتوني بتجاوبكم وكانت فرصه اطلع اللي بقلبي
في النهايه قررت استخير الين الله يجيب الفرج ويختار لي الصالح من امري
احبكم كلكم في الله

خنقتي العبرة
وش هالحياة وش هالخوف وعدم الامان مع الانسان
الاجدر انه يكون لكم ستر وغطا وحب وحنان

الله يكون بعونج يا اختي

الحل انج تكلمين احد اهلج يجيكم ويتفاهم معه
ليه معيشكم برعب وخوف ليه!!

بكرة يكبر ويضعف ومابيصير حوله الا انتي وعياله
ع باله بيجلس قوي !!

الله المستعان