متضايقة من حركة دووم يسويها زوجي .. من حقي اتضايق او لا؟

السلام عليكم ورحممة الله ...
بنات ابي اخذ رايكم في شغله و هل اني غلطانه لما ازعل منها او لا ..


اليوم جت ضيفة البيت لاهل زوجي ولما طلعت شافتني و سمعتني كلمتين ضايقوني لدرجة ان لساني نشل وما قدرت ارد عليها و كلامها كان اهانه وتجريح ...


المهم عقب زوجي شافني عقب و عرف اني متضايقة من الضيفة سالني شنو قالت مارضيت اقول و عقب قلت له اذا ركبنا فوق بخبرك .. لاني كنت اسوي عشا في مطبخ عمتي ..


لما ركبنا نتعشى رد سالني ابتسمت وضحكت قلت له ما قالت شي ومافيني شي كنت ابيه يتعشى و ما يتضايق ..


خلصنا عشا وكل شي ولا سالني ونسى الموضوع اساسا واني كنت متضايقة عدل لدرجة لما يدخل الحمام اقعد اصيح بس ما كان يلاحظ عليي .. المهم انه لاحظ اني متضايقة ووجهي متغير سالني قلت مافيني شي سالني شنو قالت الضيفة قلت له ما قالت شي .. بعدها دمعت عيوني .. و عرف ان اني متضايقة منها وانها قالت لي شي يضايق .. قال ليش ماتبين تقولين قلت له لاني احبك ومابي اضايقك قال ليي تكلمت عني ورد دمعت عيوني وفهم انها متكلمة عليه .. بس ما كلمني ولا شي بس قال لي لا تتضايقين وجذي ..


وطلبت منه يطفي الليت حتى ننام مع ان الوقت كان من وقت و ما ننام هالحزة احنا .. قال لي تبين اطفي حق تصيحين وماشوفش ؟ و دمعت عيوني ومسحها وقال اذا تحبيني لا تصيحين و طفى الليت و نااام و لحد الحين اني قاعده و صحت وشبعت صيياح و نسيت امرر هالضيفة ..
بس الا مضايقني حركة زوجي .. يدري اني متضايقة ويدري انه بينام واني بتم اصيح و كل مرة تصير بينا مشكلة اتم اصيح و ينام عني و يوم ثاني يسالني ليش متضايقة مع انه يعرف السبب ..


تعبت نفسيا ... ابي احس بزوجي يداريني ويراضييني لو يوم واحد !!


وعلى فكرة احنا نعتبر معاريس جدد لان صار ع زواجنا مجرد سنة و جم شهر .. بس هذي حالتي وياه من زمان و كل مرة نخلص من مشكلة اقول له لا تسوي جذي .. اني مو زعلانه احيانا بس انطرك تسمعني كلمة تراضييني فييها بس تنام عني وتخلييني طول الليل اصيح بس مافي فايده ..
اهو يكون عذره انه تعبان و يبي ينام ..


اذا زعلت اكون غلطانه ؟