متعقدة نفسيا من شكلي.. لأني قبيحة../ قديم

السلاام عليكم ورحمة الله وبركاته

انا اختكم في الله
ابغى افضفض ابغى احد يسمعني.. ما اقدر افضفض لاقرب الناس لي.. لانه صعب..

انا الأن هديت شوية لأني قبل ساعة كنت ابكي بكاء مو طبيعي..

مشكلتي انا من صغري.. وانا اعاني من شكلي.. استغفر الله العظيم.. ما اعترض.. على خلقة ربي.. لكن..

المشكلة فيا انا ما عندي ثقة بالنفس في مسألة الشكل وايضا نظرات الناس ليا الي يطالع فيا كاني جياة من كوكب تاني.. ملامح وجهي ما فيها شيء من الجمال.. لكن في نفس الوقت انا اهتم بلبسي وعندي ذوق وجسم طيب وشعر طويل.. مو مشكلة لكن انا اشوف ان الملامح احس الناس تهتم فيها كتير.. انا الحمدلله متزوجة مع اني كنت ما اتخيل اني في يوم اتزوج.. كنت اقول مين دا الي بياخذني ويرضى بيا وكنت اشوف اي واحدة مهما كان شكلها برضو احلى مني.. كنت قبل الزواج دبة وبشرتي دهنية ومليانة حبوب.. كنت ما اختلط بالناس كتير حتى في الجامعة ما اتداخل كتير والسبب اني اخاف ما يتقبلوني.. رغم ان صحباتي وهم جدا قلييلين ما يتعدو اصابع اليد.. يعرفوني ويحبوني وبجد يعزوني لأنهم عارفين اخلاقي وطبعي وطيبتي ((جدا جدا طيبة وهذي عقدة تانية.. طيبة بزيادة ونياتية))

لكن رغم اخلاقي برضو احس النقص فيا وكل ما امشي بثقة شوية ارجع تاني لنفس الحالة لما اشوف نظرة من النظرات الاليمة والجارحة ليا.. في كل مكان في الجامعة في الافراح والمناسبات واذا روحنا لناس ما نعرفهم واول مرة نشوفهم..

بعد ما اتزوجت..
.. الحمدلله صرت احسن بكثير عن اول.. من ناحية الثقة بالنفس احسن شوية بس لا تزال العقدة دي موجودة..

زوجي يحبني ويموت فيا يحترمني ويقدرني وما يرضى على زعلي.. انا احبه مووت وماا اقدر استغنى عنه.. بس دايما اسأل نفسي ليه الحب هذا كله.. ايش يحب فياا..

وكم مرة سألته ايش تحب فيا يقولي احب فيكي قلبك.. ؟؟!!!

صحيح الحمدلله البس واتشيك واهتم بمظهري.. لكن في داخلي احس ان في شيء غلط.. في شي ناقصني.. خصوصا اذا شفت معاه في التلفزيون مذيعة ولا ممثلة حلووة ابدا احس بالنقص..

نتابع برنامج وتجي واحدة مذيعة ولا فنانة حلوووة.. لما يطالع اغااار واقوله لا تطالع.. وهو يقول ليش تسوي كدا.. مع انه ما يقصد شي...

غيرتي زااايدة عن حدها.. اي واحدة لما يطالع فيها في السوق ((عيونه زايغة)) اتضايق.. واسوي مشكلة..

مررة اتزاعلنا وصارحته طلعتله الي في قلبي كله.. قلتله ليش تطالع في الحريم انا ماني ماليا عينك.. والا مانت شايف فيا شي حلو.. ((انا في داخلي اقول في نفسي طبعا اكيد لاني ماني حلوة((
واحزن عليه انه يستحمل يشوفني كل يوم((

هوا يقولي والله العظيم مو قصدي بس ازا واحدة ملفتة للنظر الكل بيطالع فيها.. بس مو معناته اني اعجب فيها او احبها.. بس نظرة عابرة والاولى لك والتانية عليك.. (( دايما يقولها.((

ودايما يقول اني ماليا عيني وما ابغى احد في الدنيا دي غيرك..

والهرجة الي خلتني امس ابكي بكاء شديد.. انو امس كنا نتكلم عن ايام الملكة والخطوبة ونسترجع ذكريات زماان.. وكان يحكيني انو كيف لما بدا يفكر يتزوج وايش مواصفات شريكة حياته.. قالي انه كان نفسه في وحدة بيضة وشعرها طويل..

وقال انه الحمدلله حصل اللي يبغاه..

سألته السؤال دا: يعني انت ما كنت تدور على الجمال؟؟

قالي لا ما كنت ادور.. قالي الحلوة كل واحد يطالع فيها ((وانا اقول في نفسي يعني ماا تشوفني حلوة-- انا عارفة اني ماني حلوة بس عالأقل ابغى زوجي يحسسني بدا الشي على الاقل يجاملني او يتغزل فيا بس هوا صريح جدا)) .. وبعدين قالي حديث الرسول صلى الله عليه وسلم: ((من تزوج المرأة لجمالها أذله الله ، من تزوجها لحسبها زاده الله دناءة ، من تزوجها لمالها أفقره الله ، فعليك بذات الدين تربت يداك((

وقالي انا الحمدلله حصلت ذات الدين.. وقالي ان الجمال جمال الروح..
وقالي سبحان الله الارواح جنود مجندة وانا احبك..
ومن الكلام دا..

بعد ما خلصنا .. حطيت راسي وبدأت ابكي من غير ما احس.. ابكي بكاء شديد.. قالي ليش حبيبتي تبكي.. قلتله.. نفسي تشوفني في عينك حلووة.. زعل وقال.. لو فهمتي كلامي
كان قلتي انك احلى وحدة.. ,وكمان قالي انا عزيتك بالدين

يا نااااس يعني هوا ايش يشوفني... ليش يحبني .. انا متعقدة من شكلي.. وزوجي ما يشوفني حلوة.. ويقولي اني ماليا عينه.. انا فاهمة ان الجمال جمال الروح.. بس برضو جمال الشكل بالنسبة للرجال مهم..

صحيح انه مبسوط معايا ويحبني..لكن كل الرجال يهمهم الوجه الجميل والحسن.. والدليل انه يحب يطالع وعيونه زايغة.. ماادري احس اني متلخبطة ماني عارفة ايش ابغى..

ابغى اكون واثقة من نفسي

ابغ احس اني فعلا حلوة ابغ اكون واثقة من نفسي..

سامحوني طولت عليكم. بس انا من جد ابغى افضفض ما اقدر اقول لاقرب الناس لياا.. لانه شي محرج ومعقد بالنسبة لياا...


..