متى تستوعبون انتي وياها !

السلام عليكم ورحمه الله وبركاته


ابيكم تفهموني لمتى هالخلافات والمطاقق بالردود انتي وياها
لمتى يعني بتضلون تتحرشون ببعض وتسبون بعض وكل وحده تجرح بالثانيه
هذا وحنا من ورا شاشات اجل لو قدام بعض اكيد بتصير معط شوش
يابنات لازم نتعلم اختلاف وجهات النظر شي طبيعي
موضوع ماعجبك او فكر وحده مايعجبك مو شرط تناشبينها علشان تثبتين رايك وكلمتك
عندك راي ، رد ، قوليه .. وخلصنا
بس ليه نجرح بعض ونتهم بعض ونتلفظ على بعض !
هل اذا رديتي وناقرتي بيرتاح ضميرك ويتطمن بالك ؟
طيب وش انتي خسرانه اذا كان ردك بادب ومايجرح احد
والله يابعض ردود عفست نفسيات وخربت بيوت وشتت عوايل
ياخي لاتستهينون بهالكلمه اللي تكتبونها
يمكن تهوي فيكم بالنار وانتو مو حاسين


حنا هنا بعالم افتراضي ويكفينا بعالمنا الحقيقي الذنوب والاثام الله يعفو عنا
مو ناقصين نستاثم بخلق الله وناس مانعرف عنهم سوى يوزر فقط
بالله وين تلاقون هالناس علشان تستسمحون منهم وتطلبون الحل ؟


تو اقرا موضوع نعي عضوه هنا في المنتدى الله يرحمها ويغفر لها
موضوعها قديم لكن شاء ربي انه يرتفع الموضوع علشان اكتب لكم هالكلام
تاثرت كثير من كلامها وهي تطلب الحل من العضوات اللي ممكن تككون غلطت عليهم بقصد وغير قصد
تاثرت كثير وتذكرت خلافاتكم اللي ماتخلص وخصوصا في هالقسم
داااايم دااايم بكل موضوع احصل مناقره
والله هالدنيا ماتسوى شيء على ايش ارفع ضغطي واغلط في الناس علشان بس موضوع انكتب
ترا كل شي مكتوب وكل كلمه طلعت منك جرحت احد هي عند ربي وبيحاسبك عليها
وشوفي كم شخص تضرر من وراها


ضبطو اعصابكم ضبطو اعماركم احسبو لكل كلمه تنكتب الف حساب
لانها بتضل تشهد لكم وبتضل بهالمنتدى انتي بتموتين والكلمه بتضل مخلده


خلونا مسلمين بافعالنا واقوالنا بخلاقنا بكل تصرفاتنا
ياخي ارحموا بعض ساعدو بعض وجهو بعض
حنا هنا في هالمنتدى متنفس لنا وساحه ناخذ منها الفايده والمشوره والراي السليم
محنا هنا علشان نفش غلنا ببعض ونحط حرتنا في بعض !
خلينا مثل الخوات اي وحده تكتب مشكله والا موضوع نعدها مثل اختنا ونساعد من قلب وننصح من قلب ونوجهه من قلب بلاش نغلط ونسب ونتهم بعضنا


والله من حبي لكم وخوفي عليكم قلت هالكلام
اسال الله ان يشرح صدورنا وصدوركم ويصلح الاحوال