حلوة طريقتك ما شاء الله واكثر من وحدة تتبع نفس الطريقة واحسها حلوة واقرب للاعتدال اللي هي صيف وشتاء وعيد ...ولو طرأت مناسبة ما يمنع من شراء لبسة لكل طفل..
ومعاناتك مع أولادك نفس معاناتي مع اولادي الله يحفظهم وخاصة الكبير والله اشتري من الغالي والرخيص والنتيجة وحدة إذا ما تشققت الركب بهت لونها...بالإضافة لنموهم الله يحفظهم ويصلحهم يعني أوقات أكون عاملة حسابي على مجموعة ملابس معينة ولين جيت ألبسهم أفاجأ انها صغرت فأضطر أنزل السوق علشان أجيب مجموعة ثانية من الملابس...وهذا اللي مخليني أبغى أشوف طريقتكم في التنظيم حتى ما نكون من المسرفين.


جزء من طريقة الوالدة الله يحفظها متبع عندي وهو الاحتفاظ بالملابس ذات الحالة الجيدة للطفل القادم خاصة في عمر السنة لأن الطفل يكبر والملابس ما استهلكت أما بعد السنة خلاص لكن اللي اخالفكم فيه الاكتفاء بستة غيارات لأن الطفل في هذه المرحلة يحتاج غيار بصفة دائمة فأنا أشوف ان 6 ماهي كافية والله أعلم.



طريقة سديدة شاكرة مرورك.

مرحبا يا أمهات..

نظامي مب نظام بالمعنى الدقيق .. يعني طبعاً لازم اخذه لولدي فديته شي يديد في العيدين .. بس مع الملابس الجاهزة لازم بعد اسوي له كنادير .. (لازم يقابل الناس وياخذ العيدية بالزي الوطني :))

أما في الأيام العادية فمالي وقت معين .. طبعاً أكيد مع بداية الصيف والشتا لازم نشتري ثياب يديدة بس في الأساس المسألة مرهونة بنمو وطول ولدي .. لأنه الله يحفظه يطول بسرعة .. يعني أحياناً أشتري له شي يديد وعقب شهر اشوفه قصر عليه فديته فلازم اشتري له ثياب أكبر .. عشان جذي أضطر أحياناً اشتري في الصيف أو الشتا أكثر من مرة.

أما الملابس الداخلية اللي هي الفانيلة اللي تتسكر من تحت .. فما أبدلها إلا يوم تضيق عليه.

وقت السفر طبعاً ما اشتري له شي يديد .. لأني مقتنعة ان السفر فيه شوية بهدلة من كثرة الحركة والروحة والرجعة .. فماله داعي اشتري ثياب يديدة حق السفر إلا إذا دعت الضرورة .. يعني مثلاً إذا سايرين مكان الجو فيه بارد فأكيد باسير أخذه له شي حق البرد.

بالنسبة للكمية .. فيوم كان صغير وما يتحرك كنت اشتريله على الأقل ست بيجامات .. بس الحين مع كثرة الحركة واللعب فلازم يكون عنده على الأقل ثمان أو عشر بيجامات لأنه ما شاء الله يبدل أكثر من مرة في اليوم .. وبالنسبة لملابس الخروج فتقريباً يكون عنده ما بين خمس أو ست أطقم .. وأحياناً ما أطقم .. يعني اشتري له مثلاً بنطلونين جينز أزرق وبني وخمس تيشيرتات يلبسهم على البنطلونين .. ويتم يلبسهم لين يصغرون عليه..

صراحة انا ما اشوف فيه فايدة من الملابس الوايدة للأطفال .. يمكن لأن عندي ولد .. يعني لو الله رزقني ببنت احتمال أزيد لها في الثياب شوي .. وما اشوف فيه فايدة من شراء ملابس غالية لهم بعد .. وعشان جذي انا عمري ما اشتريت لولدي ثياب من محلات الأطفال الموجودة في المولات .. ولا حتى من مذكر كير إلا يمكن مرة واحدة وبالصدفة وكان عندهم تنزيلات بعد .. يعني الطفل ينمو بسرعة وحجمة يتغير خلال فترات قصيرة وبالكثير بيلبس القطعة شهرين وإن كثّر ثلاث .. فليش اروح اشتري له قطعة سعرها 200 والا 300 درهم عشان يستهلكها خلال فترة بسيطة .. صراحة حرام.

أنا شخصياً من انصار البيبي شوب :)

ومن أول ما بديت اشتري لولدي الله يحفظه وانا اخذ له كل شي من عندهم .. صدريات .. ملابس داخلية ـ بيجامات ـ تيشيرتات ـ بنطلونات ـ وانتو بكرامة دلاغات وجواتي .. واحيانا اخذ الدلاغات والجواتي من شومارت (ترا نفس الشي تقريباً بس شومارت تشكيلته أكبر) .. يعني كل شي عندهم وأغراضهم حلوة وتعيش وأسعارهم معقولة .... بس بصراحة ما اشتري في التنزيلات لأني ما أحب الزحمة اللي تصير عندهم.

بالنسبة للملابس اللي تصغر عليه .. فزوجي الله يخليه كان يقول لي خليهم للبيبي الثاني إن شاء الله .. وأنا فعلاً حاولت في البداية اني اخزنهم .. بس مع زيادة الملابس ما صار عندي مكان للتخزين .. طبعاً هذا السبب المعلن :) .. ومع انه سبب صحيح وصادق بس فيه سبب ثاني .. بصراحة غمضني البيبي الثاني وقلت ليش يعني البيبي الأول يلبس كل شي يديد والبيبي الثاني يلبس ملابس مستعملة .. يعني المفروض مثل ما سوينا للأول نسوي للثاني .. وعشان جذي فكل ملابس ولدي القديمة نوديها للجمعية الخيرية.

م الهتون

مشكورة عيوني ما شاء الله عليك شرح مفصل

رجعت مرة ثانية
حبيت ازيد اني تجيني حالة اكتئاب لو اشتري قطعة وماتنلبس وانواع تانيب الضمير
لازم البس القطعة الفخمة على الاقل 6 مرات واطلع حرتي فيها لو بالبيت بعد ماتقدم
ولفتت نظري اختي ام الهتون على نقطة ملابس الطفل الاكبر انا شلت ملابس ولدي الكبير ويوم جاني الثاني بعد سنتين وبنفس الوقت المقاسات صيف بالصيف وشتا بالشتا لبسته وبعد شريت له جدد فصار عنده اكثر من اخوه بالضعف
الحين بنتي البسها احيانا بجايم اخوانها اللي تكون جيدة ويونيسكس ماتبان وافرح احسها تعيد الذكريات خخخخخ