السلام عليكم
كيفكم يابنات
بدخل بالموضوع على طول كتبت موضوع طووووووووووويل بس انحذف للاسف تعبت فيه ... والله مو عارفه من وين ابدأ تعبت من كثر التفكير والهم والحزن دخلت ابغى انام ما جاني نوم
انا متزوجه من 6 سنوات تقريبا وعندي بنت عمرها 4 سنوات الله يخليها لي وانا الحين حامل بالشهور الاخيره وزوجي انسان طيب وحنون ومكافح ويحبنا ويحاول يوفر لنا اللي يقدر عليه .... يشتغل شغلتين عشان يلحق بس مو ملحق شي وراه اجار وديون وقروض ومدري ايش ... راتبه اول ماتزوجته 3000 والحين الحمدلله تحسن وصل 5000 ومع راتبه من شغله الاضافي يصير 6000 ومع هذا كله مايبقى لنا شي كل شي نفسي فيه ما اقدر اوفره حتى اتفه الاشياء كل طلعاتنا عشان بنتي بس نوديها الالعاب نشتري لها العاب اللي تبي بس احنا لاااااااا برغم اني مجنونة تسوق لكن ما اقدر اشتري لي شي حتى لو رحنا مجمع وجعت ما اقول ابغى اكل او اشرب شي بس نطالع ونطلع ... جواله خربان مانقدر نشتري جوال جديد ... سيارته كل يوم والثاني عطلانه ونخسر عليها بالهبل ... ابغى اقضي للبيبي مافي فلوس اضطريت اخذ من فلوسي الشخصيه من حسابي من عند ابوي يحطهم لي واقضي منهم خفيف مع اني ماودي احركهم ابد ابي اعتمد على زوجي وبس انحرج من اهلي الى الحين متزوجه واخذ مصروف منهم ... هو اللي اصررررررررر على موضوع حملي من كان عمر بنتي سنتين وانا ارفض والحين وافقت وفرحت بحملي بس ما اتهنيت فيه بسبب ظروفنا وحتى هو ما احسه فيه فرحه اللي كنت متوقعتها لنفس السبب حتى لما شرينا الاغراض احسه ماله خلق ابددددد ولا يختار معي شي ولما اساله اقوله ليش كذا يقول لانه مو من فلوسي ...
صاير حزين ومهموم بس وش اقدر اسوي له كافي اني صابره ومتحمله وفوق هذا كله ابغى اتنفس عند امي لازم فلوس ... وناويه اقدم على شغاله ايجار امي ماتقدر على شغل البيت لحالها البيت كبير وهذا غير الضيوف اللي رايحه جايه ويبغالها احد وامي مافي احد يساعدها مايهون علي اشوفها تتعب وانا جالسه بولادتي ببنتي تعبت امي حييييييل لدرجه انها ضعفت حيل وماودي هذا يتكرر
ومن سوء ظروفنا تركت شقتي الاجار وتنازلت عنها وسكنت عند اهلي 7 شهور تقريبا عشان تخف ديونه على قولته وقولة اهله وعشان يقدر يبني لنا شقه في بيت اهله اللي يبنوا فيه بس ولا شي من هذا صار وانا طفشت وطلبت ارجع لشقه لحالي مثل قبل وطبعا اهله عارضوا ومارضوا له بحجة انه لازم يخلص ديونه اول بس انا اصريت ومع االحاح طويل اخذنا شقه واستقرينا الحمدلله من شهرين بس ... والحين كل مانروح لهم يقولوا نبغى فللوس للبيت الجديد 5 الاف والا ادخل في جمعيه والا اخذ قرض وابني لنا وهو مايرفض لهم أي طلب وهو ماعنده من وين يجيب آآآآآآآه بس
انا الضحيه انا اللي اتحمل كل هذا
وياليت الى هنا وبس كل ماقربنا نخلص من دين راح وتسلف اكبر منه والحين ناوي ياخذ قرض مئة الف ياناس من وين راح يقدر يسددها من وين وانا رافضه واهاوشه واقوله شلون بس مستحيييييييييييييييييل يسمع مني اصير عدوته اذا نصحته ساعات اقول خله يتعلم من اخطائه بس مايتعلم ابد يزيييييييد في العناد وانا وبنتي اللي نضيييييييييع واحنا اللي بننرمي في الشارع مثل قبل لما ضاقت عليه وداني بيت اهلي
ساعات اقول بروح بيت اهلي وازعل بس راح يفسرها اني اتخليت عنه وهو في عز ضيقته ... هو على طيبته مايقدر وقفاتي وصبري معه للاسف هذا غير ذهبي اللي بعت نصه عشانه شقووووووووول بس والله كأن احد داعي علينا
احيانا اقول يمكن من اهله لانهم مو راضين ناخذ شقه وعلاقتهم معي صارت مو ذاك الزود لهالسبب مع انه هذا حقي الشرعي اللي هو السكن
قولوا لي كيف اتصرف معه كيف اغير عقليته معقولة هو صح وا نا خطا فهموني يانااااااااس والله راح انجن
موضوعي هذا كتبته للفضفضه لاني ما اقدر اقوله لاي شخص وعذروني على خربطة الموضوع
نور النور 1 @nor_alnor_1_1
محررة فضية
يلزم عليك تسجيل الدخول أولًا لكتابة تعليق.
نجوم القوايل
•
ياقلبي الله يفرج همك ويرزقك
حياة1428
•
ياقلبي الله يفرج همك ويرزقك ماعليك إلا دعاء في صلاتك وثلث الاخير والاستغفار وصدقه وقراءة سورة البقره
الصفحة الأخيرة