السلام عليكم ورحمة الله وبركاته
إلى من أحب زوجته وبادلته المشاعر الصادقة
وبعد العشرة والحب يقسو عليها
فقد ذكرنا المصطفى صلى الله عليه وسلم
بالرفق بالقوارير
بعد ما كنت تهواها وحبك أقوى من زلزال
كيف ترضى على نفسك يموت الحب في عينك
غريبة كيف هي صارت في عينك أشبه بتمثال
أبد لا تحسب أنها هي يا قاسي لعبة في ايدينك
تراها مثلك إنسانه لها تفكير وعندها بال
وأنا أحلف مشاعرها تنافس عطفك ولينك
واذا انك كنت ما تدري تراها مضرب الأمثال
جميله والجمال أخلاق فكر الله لا يهينك
لا تتمادى وتتركها حرام اتعيش على هالحال
لا تهجرها ولا اتذلها عشان العصمة بإيدينك
ترى الله قادر يبدل حياتك من فرح لأهوال
لا تنسى إنها تحس مثلك ولا تنسى الحق بعد ينقال
تعوذ بالله من الشيطان ترى يفرق محبينك
تبدل حبها بقلبك وصارت ما تساوى ريال
بعد ماكانت الدنيا في عينك وأجمل سنينك
أبد لا تغيرك الدنيا ترى تتغير الأحوال
مثل ما تنسى أحبابك بتلقى الكل ناسينك
حرام اتعيش مستانس وهي تبكي دمعها سال
تبي تحيى مثل أي بنت وأنت الحل بيدينك
تخيل لو تفاجأها تبدل غيبتك بوصال
بتلقاها من الفرحه نست ما بينها وبينك
ويرد الحب يجمعكم كثير أقوى من الزلزال
ويحيى من بعد ماكان ميت في وسط عينك
للشاعر : طارق المحياس
كلمات الشعر منقولة من مجلة الديرة
تم حذف الرابط الصوتي لضمان حقوق المنشد فالشريط مازال في الاسواق