مثل ما وعدتكم ...قصة ولادتي من الالف الى الياء...

السلام عليكم
الحمدلله والشكر لله
الحمدلله الذي بحمده وشكره تدوم النعم
طبعا انا سبق وبلغتكم بخبر ولادتي من المستشفى وقلتلكم بحكيلكم قصة ولادتي عشان تستفيدون منها...
بداية القصة رحت يوم السبت العصر عندي موعد مع الدكتورة نضال في مستشفى دله ..وهي كانت باجازة لمدة اسبوعين فلما رجعت رحت لها وقاست كم مفتوح الرحم وكان واحد سانتي بس...وطبعا انا ما فيني اي بوادر ولادة او طلق..وكنت بالاسبوع ..39...وسوت لي توسيع وقالت روحي امشي ونامي مع زوجك وان شاء الله بكره بعده بالكثير وانتي والده ...بعدين قالت لي الدكتورة بسوي لك تخطيط للجنين نطمن ع الحركة..قلت اوكي..دخلت غرفة التخطيط اللي هي السي تي جي..وحطت لي النيرس الاقراص وركبتها على بطني وقلت للنيرس افصخ العباية قالت لا ما يحتاج ارفعيها بس...انا على بالي التخطيط عشر دقايق وخلاص...شوي الا الدعوة طولت فوق الساعه انا حسيت بكتمه وتحركت وقمت اصارخ على النيرس بديت ادوووووخ دخلت علي وحده الله يجزاها خير من المراجعات ونادت لي النيرس وجت...طبعا التخطيط صار فيه نزول لان الاتصال انقطع مع الجنين ...المهم النيرس اختبصت ونادت الدكتورة ورجعت ركبت الجهاز وخلوني تقريبا ساعه ثانيه ...ورجع ضبط التخطيط...لما خلصنا لقيت الدكتورة مجهزه ورقة تنويم وتوليد بالطلق الصناعي...وقالت لي تجين الليله الساعه 12 تنويم عشان بولدك ...قلت دكتورة ليه ؟؟؟انتي تطمنتي على الحركة ولسا باقي لي اسبوع...قالت لا انا اخلي مسئوليتي من اي شي يصيب الجنين ...انا بصراحه خوفتني هالكلمة مررره ...قلت اوكي ورحت دفعت 500 ريال حقت الدكتورة ورجعت للبيت عشان استخير ..واعلم زوجي....لما قلت لزوجي قال خلاص نروح انتي ليش خايفه اساسا البيبي كبر وهذا وقته والدكتورة ابخص...والتعب فيك فيك طلق طبيعي والا صناعي...واستخرت كم مره ..وجلست اقرا بالنت عن الطلق الصناعي الاراء فيه كثيرة ناس تقول عادي وناس تقول لا...مؤؤؤلم ونار ولازم ابرة ظهر...فعرفت انه مؤلم وتوقعت الاسواء...جهزت شنطة ولدي عشان الروحه لبيت اهلي وشنطة المستشفى وتحممت وتنظفت وجلست اصلي وادعي ربي بالهون والتسهيل ...علمت شغالتي وقلت لها اذا نومت ولدي بقومك عشان بروح المستشفى ...نومت ولدي واستودعته ربي وتعشيت انا وزوجي وعالساعة 1 انطلقنا لمستشفى دله ...رحنا للتنويم واخذت الغرفة ودعني زوجي وراح...ركبوا جهاز التخطيط ...من الساعة 2 الى الساعة 3 ورجعوا ركبوه من الساعه 5 الى 6 ...جت الدكتورة المناوبة وقاست لقت الرحم 1 ونص سانتي ...وحطت تحميلة الطلق الاولى ....غفيت شوي وما حسيت باي اعراض طلق ...عالساعة 8 ونص يوم الاحد مروا على مجموعة دكاتره من ضمنهم لمياء اسماعيل وساميه وحنان...وجلست تتفلسف علي لمياء تقول عنق الرحم عندك لين واحتمال ما تحتاجين تحميلة ثانية((يازينها ساكته بس))..طبعا الله لايوريكم قعدت المستشفى طفش...خصوصا اني ما علمت احد لا امي ولااختي ولا احد بس زوجي وشغالتي ...واهلي يتصلون علي وانا بس اكذب ...استغفر الله بس ...هدفي كان ما اشغلهم معاي...المهم عالساعه 3 العصر جت الدكتورة وحده سودانيه شابه ..وجلست تحوس وهي تكشف تقول عنق الرحم عندك مدري وينه !!! روعتني الله يهديها...لما لقت عنق الرحم قالت لسا 2 سانتي...يارب رحمتك ...حطت التحميلة الثانيه وقالت لي امشي...لبست عبايتي وجلست امشي بهالممرات ...جتني الدكتورة وقالت باذن الله الليله وانتي والده ...مرني زوجي وولدي وجلسوا عندي وجلست ابكي ابكي ....احس اني ورطت نفسي واشتقت لولدي وبيتي ....عالساعة 7 بديت احس بالطلق بس مو مره قوي ...طلعت الساعة 9 وجلست امشي ...عالساعة 10 خلاص مو قادرة امشي من الطلق جت الدكتورة دعاء مصرية الله يسعدها يدها زي الريشه ما تحسن فيها وقاست قالت الحمدلله 4 سانتي خلاص ولادة وحطت لي النيرس حقنة شرجيه ورحت لغرفة الولادة عالساعة 11 وشوي...على بال ما جهزوا غرفتي وركبوا العده والمغذي كانت الساعة 12 وجت الدكتورة المناوبة كلثوم...وقاست ولقت الرحم مفتوح 3 سم بس!!قلت د.دعاء تقول 4 قالت لا يدها صغيرة !!!المهم فتحت موية الراس وحطوا لي الطلق بالوريد ...عالساعة وحده بدا يحمى الطلق ..طلبت الابرة المسكنة ...وعالساعة وحده ونص بديت اقط بخيط وخيط وما اصحى الا عاالطلقة...بدا الطلق يشد وبديت اصرخ قاست الا الرحم 6 س قالت ساعه وان شاء الله تولدين ...وحطت لي الاكسجين المخدر...واذا جت الطلقة صرخت ودعيت باعلى صوتي ...كل الناس سمعوني وسمعوا دعواتي هههههههههه الله يقبلها بس...ع الساعه 3 بديت احس بالدفع ...والممرضة تقول لا تدفعين ..وامسك نفسي...قاست لقته 8 سم ...بس الراس بعيد...يارب رحمتك...عالساعه 3 ونص وهو ياذن الفجر صرخت صرخة تروع واحس اني بدفع خلاص ...قاست الا 9 ونص...نادوا الدكتورة نضال ونقلوني لغرفه ثانية وانا بالممر للغرفة الثانيه وعلى السرير الا ام جايه مع بنتها ...وتطل في وجهي وانا اصرخ وتقول لا حول ولاقوة الا بالله وتدعي لي الله يجزاها خير وتدعي لبنتها...في الغرفة الثانيه جهزوا سرير البيبي وعده القص واللصق قصدي الخياطة...المهم قالوا للدكتورة الراس بعيد... جت وحطت رجولي على جنب وقالت ادفعي كانك تتبرزي وانتوا بكرامة ..دفعت دفعتين ..وشافوا شعر البيبي ..وعالساعة 4 الا عشر تقريبا جت الدكتورة ووسعت ودفعت كم دفعه لين طلع وليدي وسمعت صياحه وجلست اصيح الله لايحرم احد من هاللحظة ودفعت عشان المشيمة ونظفوا البيبي ونظفوني لاني تبرزت الله يكرمكم من قوة وحرارة الطلق الصناعي حتى الدفع يكون رباعي قصدي شدييييد...خلصت من الخياطة عالساعه 4 ونص...ونقلوني غرفة الملاحظة ولقيت فيها تلفون معلق وطلبت من النيرس تدق لي رقم امي...لان جوالي طفى...دقيت على بيت اهلي وردت بنت اخوي قلت لها تراني ولدت علمي امي ..كلمتني امي وهي تصرخ متى ؟؟؟ وشلون ؟؟؟ورا ما علمتيني....كلمت خالتي ام زوجي وعلمتها ...وطبعا زوجي وولدي بالبيت نايمين ...ارسلت مسج لزوجي وعلمته...
الدرس او العظه والعبرة اللي تاخذونها من قصتي...لاتسمعون كلام الدكتورة على الفاضي والمليان ...انا اقولها الحركه كويسه وهي تقول لا لازم طلق وتنويم ومدري ايش...الشي الثاني الطلق للصناعي عذاااااااااب ...عذااااااااااااااب الله لايحوج احد له ...ولادتي الاولى كانت بطلق رباني ...وكان متعب بس مهوب ورااااااا بعض زي الصناعي...
الدكتورة نضال جدا رائعه وحبيبه ما توقعتها كذا ...بس حسيت انها استعجلت علي كثيييييير يعني انا بالاسبوع 39 ما بعد عوشرت...ليش الطلق الصناعي والعذاب ...بس الحمدلله اني كنت مستخيرة..والخيرة فيما اختارها الله ...

بالنسبة للمستشفى ..طبعادله شهادتي فيه مجروحه لاني ولدت ولادتي الاولى فيه وعاجبني...عندهم الممرضات اللي بغرفة الولادة رائعات من قلب...وحتى الممرضات اللي بالغرف...فيه كم وحده نفسها خايسه بس الاغلبيه كويسات..طبعا ولادتي كانت الاثنين الفجر وجلست الثلاثاء والاربعاء عشان يختنون ولدي..والاربعاء المغرب طلعت...


وسلامتكم..واي استفسار انا حاضرة