مجرد فضفضة

سلام عليكم
مالي بالمقدمات باحكي لكم مشكلتي و ما ابغى غير دعوة انو الله يكتب لي الي فيه الخير

انا متزوجة لي سنتين و نص و عندي بنت
بداية زواجنا كانت من اروع ما يكون تصير بيننا مشاكل زي اي متزوجين و نرجع زي السمن عالعسل

بس من فترة مدري ايش صاب زوجي على اتفه سبب يزعل و يهدد بالطلاق
تغير تفكيره صارت الزوجة عنده كأنها جارية ما عليها غير تنفذ اوامره ممنوع اقول لا ممنوع ارفع صوتي لدرجة احيانا اكون اسولف معاه و من الحماس يعلى صوتي و انا اهرج فجأة ما اشوفه غير قام و عصب ليش ترفعي صوتك و انت ما تلزميني و ساعات توصل انه يرميني بيت اهلي بالايام عشان رفعت صوتي !!
طبعا ادور اعذار لجلستي من تحت الارض عشان ما ابغاهم يحسوا بشي و اتصل عليه و اجلس اراضي فيه و معليش كله عشان بنتي ما ابغاها تعيش مشتتة ام في جهة و ابو في جهة

و مرة طلبته يوديني عزيمة في بيت خالتي في رمضان و كلمته قبلها بكم يوم و قالي طيب و يوم العزيمة و انا اتجهز قالي مافي روحة طبعا انقهرت و تهاوشنا و كالعادة انقلعي بيت اهلك بس المرة هذي ما سكت و علمت ابوي بكل شي و دق عليه ابوي و جا جلس معاه لوحدهم قلب ابوي علي و صار الحق علي و رجعني ابوي معاه و حتى ما رضي يسمع مني

المهم رجع هو راضاني و جاب لي هدايا و معليش و حقك علي الخ
و مرت الايام عادي و عيدنا على خير و برضو جاب لي هدايا في العيد و كنا مبسوطين و الحمد لله

امس جيت عند اهلي زيارة دقيت عليه يجينا قال لا خليك عند اهلك جاني خوي و راح يجلس عندي يومين و صعبة تكوني في البيت و انا عندي دوام خليك عند اهلك احسن
قلت اوك بس جيب ملابس و كم غرض احتاجهم و بطاقة الصراف حقتي لو احتجت شي اجيبه بنفسي و انت خليك مع ضيفك صعبة تقعد رايح جاي علينا كل ما نقص شي تجيبه
المهم جاب الاغراض حطها عند باب البيت و دق علي الاغراض عند الباب قلت له افتح لك الباب و ادخلها
قالي طيب بسرعة و دخل لا سلام و لا كلام و مكشر و حالته حالة ما علقت عالموضوع رمى الاغراض بالصالة و طلع

الفجر دقيت اصحيه لصلاة الفجر اعطاني مشغول قلت خلاص اكيد صحي

و رجعت دقيت عليه بعد الفجر كنت محتاجة غرض من البيت رد علي قال مالك شي عندي و قفل في وجهي

بعد رده ذا حسيت انو لو قدامي باذبحه
ارسلت له خلاص يا ابن الناس اكثر من كذا انا ما اتحمل كل حي يروح في حاله و جزاك الله خير على كل الي سويته

رد علي طيب بس و الله لاندمك و اجننك و بنتك تحلمي تشمي ريحة حضانتها


بعد رده سويت له حضر بالواتس و حطيت رقمه بالبلاك لست

طبعا ابوية كلمه و حلف بالله انه ما غلط علي و انصدم من رسالتي و هو ما سوى شي و طبعا زي العادة انت تاج راسي و انت زي ابوية و اعز و انا راضي بحكمك و بنتك مدري ايش فيها علي الخ الخ

جاني ابوية الرجال ما غلط و انت تكذبي علي قلت له جيبه قدامك و بيني و بينه كتاب الله يحلف عليه ما غلط علي و بكل الاحوال انا خلاص عفته و ما عاد بارجع له
طبعا ابوية زعل مني ليش قلت كذا بس امي واقفة معي و هو دق على ابوية و اعتذر ما يقدر يجي الا بعد ما يسافر ضيفه

المشكلة يا بنات ماني متخيله اني ما عاد بارجع لبيتي و لزوجي و كل شوية اضعف و باتصل عليه اتعذر منه و انهي الموضوع بس امسك نفسي في اخر لحظة

ادعوا لي ربي يقوي قلبي و ما اضعف قدامه:(