بنوته واموره @bnoth_oamorh

عضوة نشيطة

مجرد فضفضه ................

السلام عليكم ورحمة الله وبركاته
انا بها اللحظه اكتب موضوعي وانا نفسيتي في الحضيض تعبانه حيل وهي مجرد فضفضه لان للأسف في بيتنا كل واحد لاهي بنفسه ومالي احد اشكي له همي وافضفض له واحكي انا مابيه يعطيني حلول بس الكبت يولد الانفجار والشكوى لغير الله مذله احنا للأسف حياتنا بالبيت كل واحد عايش لنفسه الدنيا نستهم ان لهم اخوان ونست الاهل ان لهم ابناء انا البنت الكبيره في البيت والمسؤله عن كل شي ابوي همه كيف يجمع فلوس وامي همها الناس والمناسبات والعزايم امي مو متعلمه لكن اللي يشوفها يتوقع انها متعلمه لان رب العالمين منحها طلاقه باللسان واسلوب حلو بس للأسف اسلوبها وطلاقة لسانها للناس بس يعني احنا عيالها للأسف مانلنا شي من هذا امي تفضل اختي اللي اصغر مني علي رغم اني انا الكبيره اللي مسؤله عن كل شي وهي تعتمد علي بكل كبيره وصغير بس للأسف المعزه كلها لاختي وانا ولاشي راضيه بنصيبي بتقولون انتي تتخيلين بقولكم لا انا لما رسبت بكم ماده بالجامعه
تعبت وانهرت ومحد حس فيني أما اختي لمارسبت قالت ان كنت حاسه انا حلمت فيها وجتني قالت روحي انتي واختك تمشوا خليها تغير جو وترتاح شوي خافت عليها وعلى نفسيتها وانا يوم رسبت محد عبرني ولا عطاني وجه .... تخيلوا المناسبات (الزواجات) لازم الدخول ببطاقه شخصيه مره كان عندنا زواج واختي ماكان لها بطاقه طبعآ امي خبت بطاقتي علشان ماروح للزواج لان اختي ماكان لها شي ... صار زواج ثاني ونفس الحركه الاولى اختي ماكان لها بطاقه بس هالمره امي ما أمداها تخبيها لاني شفتها ولما خالتي كلمت اختي تسألها اختك اللي هو انا بتروح الزواج قالت وبكل ثقه امي مارح تخليها تروح لان انا مالي بطاقه ... هينا من جد انقهرت ولما قلت لامي هالكلام قلت قدامي مجنونه مدري هالبنت متى رج تعقل للكن تدرون وين الصدمه الصدمه انه يوما الزواج طلبت امي من جدتي بطاقة خالتي اللي مارح تروح عشان اختي تدخل بها يعني اختي كان واثقه من اللي امي بتسويه وللأسف امي كانت تمثل علي
نجي لموضوع ثاني انا عمري 24 سنه لما يتقدم لي احد تجلس تلح علي لدرجة اني احس انها تبي الفكه مني حتى لو كان اللي متقدم ماعجبني او مافيها مميزات او اي شي من اللي انا احلم فيه واتخيل لو ان اللي متقدم لاختي بتكون معاملتها لها احسن من كذا وتجرحني مدري هي تقصد وتتعمد تجرحني ولا ترمي الكلام علي بدون ماتفكر فيه
مره عزمتني صديقتي لحفلة بمناسبة تخرجها ومارضت تخليني اروح ... لكن اختي لما انعزمت خلتها تروح مدري وش اسوي انا كل يوم اعيش بعذااااب وقهرررر وقلة حيله جالسه بالبيت بعد ماتخرجت حتى الوظايف اللي اقدم عليها لما يجربوني اعجبهم بس مدري ليش مالي نصيب في شي حظي للاسف ردي انا تعبانه مابي منكم شي .. بس حبيت اني افضفض واكتب اللي تحب تدعي لي او تقدم لي نصيحه الله يسعدها واللي تحب تقرى بدون ماترد بعد الله يسعدها وفي الاخير تقبلوا خالص تحياتي ....................................

782

يلزم عليك تسجيل الدخول أولًا لكتابة تعليق.

تسجيل دخول

##ام الهنوف## • 15 سنة

ياقبي عليك والله حاسه فيك حبيبتي هذي هي الدنيا مو كل اللي نتمناه نلقاه حاولي انت تتقربي من امك وحاولي تسوين لك جو في البيت حتى لوالكل مشغول عنك وترى مو كل الاهل اذا صدوا عن عيالهم معناته كره احيانا الاهل كذا طبعهم جاف لاكن مستحيل ام او اب يكره عياله وترى انا ام واقولك من واقع تجربه احيانا الام سبحان الله لازم واحد من العيال يكون مقرب اكثر من الباقين خاصة اذا هم كثار بس مومعناته تظلم الغير 00000000 وسعي صدرك حبيبتي ويارب تتهني بشبابك ويهتمون اهلك فيك ويجيك عريس ان شاء الله فيه كل احلامك وتفرحين اللهم امييييييييين

**طفله حنونه** • 15 سنة

اختي بنوته
شوفي اذا امك فعلا تعاملها بهالطريقه معاك روحي يوم من الايام لعندها وقولي يمه بقولك شيء وفضفضي عندها..
قولي يمه انا لي مشاعر واحاسيس وادري بكل شيء..وطبعا اذا جتك العبرة ابكي عندها خليها تحس فيك

فسوي مثلي وان شاءالله امك تتعدل يا قلبي..وصدقيني بعدها راح تسوي على نفسها كنترول وتنتبه انها تجرحك
غير كذا احنا مطالبين بالبر وبالصبر والله يغفرلنا كل زله بحقهم

واذا على الوظيفه يا قلبي كلن مثلك واردى انا الان عمري اكبر منك بأربع سنين ومالقيت بعد التخرج وظيفه والحمدالله لعله خير لي ولك..
ولحكمه ما نعلمها تأخر امر زواجنا والوظيفه اللي نتمناها

ولا تقولين حظي ردي قولي هذا الخير وهذا ماقدره ربي وانا راضيه بحكمه

اسمعي قران وهدي نفسك بترتاحين والله

الله يسعدك ويفرجها عليك

موفقه يا اختي

بنوته واموره • 15 سنة

الله يسلمكم خواتي ماقصرتوا بس للأسف امي ماتاخذ وتعطي معي وتقول اني حساسه بزياده

واني اعطي الموضوع اكبر من حجمه بس زي ماقلت لكم هي كانت مجرد فضفضه
وشكاوي لله سبحانه وتعالى هو أعلم بحالي .......... تقبلوا تحياتي

امل واعد • 15 سنة

الله يفرجهـــا ويحنن قلب امـــــــكـ عليــك
يااقلبي والله مــحد مرتــــااح لكن نحمــد الله عالصحــه والعــافيه
لمن ادخل هالقســم واشوف وحــده تبكـي فااقــده ابوهــا ولا محــروومــه من عيــالها
او انهــاتبي زوجهــا او تشـكــي من ظلم أخوانهـــا قســم تهون عنــدي 100مصيبــه
الحمــدلله على كـــل حـــاال وانتي هونيهــا ماتضيق الا وتفــرج بأذن الله

قلبي بالرياض • 15 سنة

بنوته واموره :

الله يسلمكم خواتي ماقصرتوا بس للأسف امي ماتاخذ وتعطي معي وتقول اني حساسه بزياده واني اعطي الموضوع اكبر من حجمه بس زي ماقلت لكم هي كانت مجرد فضفضه وشكاوي لله سبحانه وتعالى هو أعلم بحالي .......... تقبلوا تحياتي

الله يسلمكم خواتي ماقصرتوا بس للأسف امي ماتاخذ وتعطي معي وتقول اني حساسه بزياده واني اعطي...

ماأدري ايش اقول ..... لكن الله يحنَن قلب امَك عليك يااااااربَ

ومثل ماقالت الأخت ##ام الهنوف## حاولي انتي تعملي المبادرة و تتقربي من امك و تسوين جو في البيت واحتكَي فيهم وان شاء الله يتغيَروا معاكي

الله يوفقك دنيا واخره آمين :26: