مجرد فضفضه لرد دين

كيفك حبايب قلبي :heart:

لي في هذا المنتدى مابين زائره وعضوه ومن خلف الكواليس عشر سنوات مريت خلالها بمراحل عده وتشكلت شخصيتي مابين نصيحه عضوه او اخرى لازلت ترتسم اسماء في مخيلتي لا تعلم كم دعوه دعيتها لها في محنتي فشكرا لكل من اعطت من وقتها للمنتدى شكرا لك من اعطت رايها ونصحت وشاركه اخواتها في الحياه :26:

قررت اليوم اعطيكم من وقتي القليل ماراح يوازي ما اخذته من عالمي الشامخ كلامي راح يكون ملخبط جيبوا اي شئ يعدل المزاج:f226: عاد جيتم لاوووم الهذره راح اتكلم عن حياتي الزوجيه لانه اكثر مرحله تعبت فيها جدا بسم الله على بركه الله اربطوا الاحزمه

تزوجت زواج تقليدي جدا وتنازلت عن كثير من امنياتي علشان لا اسبب مشاكل بين امي وابوي لكون امي رافضه العريس وابوي مصر زوجي قريبي من عائله ابوي ومرت سنه واكتشفت خلالها خيانه زوجي لي الحمد لله كماينبغى لجلال وجهه وعظيم سلطانه عمري ماحسيت نفسي ضعيفه كنت اذا احتجت راي احد جيت هنا وكنت زائره اتنقل بين المواضيع ادور نصيحه من اي احد كنت اذا انخنتقت اكتب ولازلت احتفظ بخواطري لتلك الفتره والاعظم كنت افرش سجادتي وابكي شعور قاسي ترسمين صوره لشخص وتطلع عكس وانت تمثلين على الكل انك عايشه حتى عليه واستمر الوضع سنه سنتين وثلاث واربع بعدها برساله وحده انهيت معاناتي مع زوجي سنوات مره ومن عمري اخذت بس اعطتني قد الي اخذته واكثر
خذت مني الراحه مع زوجي بس عطتني لذه القيام بين يدي الله في ظلمات الليل
خذت مني نفسي اهملتها اهمال مو طبيعي كاني كنت اعاقب نفسي وشفت الهمز والمز من حولي بس عطتني رغبه قويه فالحياه
خذت مني الشعور بالامان مع زوجي بس خلتني الحين اقدم نفسي على كل شئ
علمتني اعز نفسي علمتني احب نفسي واقدرها
اما كيف كنت اتصرف مع زوجي خلال كل هذي السنوات فوالله ماكنت ادور وراه مو غباء لكن تعز علي نفسي دموعي تنزل على شانه ارسلت له مره رساله بعد مادقت عليه الله يهديها في يوم اجازته تبون تعرفون ايش كتبت كتبت اتق الله حيثما كنت ورجع على طول رد ايش قصدك قمت ارسلت له ------و-----و------الحين عندك بنت فاتق الله حيثما كنت طبعا اسماء بنات كانوا عنده والله ثم والله اني ماعمري مسكت جواله بقصد افتحه وادور وراءه اصلا له رمز طبعا مدري انصدم مدري ايش حس فيه لكن انا متاكده انها كانت صفعه قويه له يفكرني مو فاهمه وهو الذكي المهم بعدها ارسل لي زي لو يهددني والله لاوريك الناس كيف عايشه وكلام كثير انا رجعت رديت با اتق الله وقفلت جوالي ورجعت نمت بس بعد ها الاربع سنوات انهيت كل همي بثلاث رسائل بتقولون بابرودك اقولكم قلبي مات اول عيد فتحت اخته الصغيره جواله بتطلع شئ منه المهم لقافه الله يصلحها فتحت الصور وشافت صور بنت في جواله كانت قريبه مني مدري انصدمت المهم على طول قالت هذي مين الحمد لله الي ربط على قلبي قلت اشوف الا وشفتها قلت لها يؤؤؤه الله يصلحه شكله نسي يمسحها صوره بنت صاحبه البحريني تصدقون عمرها 13سنه الي يشوفها ياقلبي يقول 20ووريتها البنات الي كانوا معانا :32::32::32:هباله غباء جهل سموه الي تسمونه المهم صورتي قدام الناس تفضل زي ماهي ماتجي وحده تكسرني بعدها مات قلبي وقدرت اكمل السنوات الباقيه
علاقتي في زوجي بعد المحنه مشروع العطاء المستمر من جانبي وقف حقوقه كامله توصله لكن بعد راحتي صرت اهتم بنفسي مره واثنين وثلاثه انتكس ارجع المهم ما اقصر على نفسي فتره طويله
ابشركم حياتي مستقره بفضل الله وكرمه وفضله وزوجي قطع علاقاته الله يهديه ويثبته

همسه (زوجي دوامه مختلط رغم انسانيه دوامه الا انه في كل مجتمع السئ والجيد فدائما التمس له العذر مهما قصر (مخ رجل مو زي مخ بنت انت فكر انت افهم )هههه دعابه دعابه الي اقصده انك تكوني واثقه في نفسك مسلمه امرك لربك وبلاش جولات تفتيش بلديه كل يومين )

خلال المحنه كانت علاقتي بعيالي متوتره وجلست فتره حتى بعدها ما اتحملهم ابد بس اعصب عليهم قبل فتره بسيطه سمعت الشيخ المغامسي الله يسعده وينوره ويوفقه يقول لو استحضرت عند غضبك ومحاسبتك لغيرك وقوفك بين يدي الله لكنت تحب ان يتجاوز عنك الله فتجاوزا واحتسبوا انه الله يتجاوز عنكم وطبقته يارب ياكريم اصلح له ذريته بنات طبقوها روووعه والله غصب تهدين :26::26::26:للقروب العصبيات

خلال المحنه علاقاتي بقرايبي ومجتمعي كان عنوانها الطيبه لحد الغباء وشفت الهمز والمز والحسد ياربي تصلح حالهم وترزقهم اضعاف مايرووونه عندي صدماتي فيهم خلتني الي عزني اعزه الف مره واكسبني قناعه انه رضى الناس غايه لاتدرك والله ماعمري شلت في قلبي على احد بس مدري انا صرت حساسه زياده والا كان على عيني شئ اشوف العالم ملائكه يارب انزع الغل الذي في قلبي على احد من خلقك تغيرت تخلصت من اشخاص كنت اعدهم خوات واستبدلتهم بقلوب طاهره مايهمها ايش البس والا وين اسافر والا ايش عندي والا ليه مرتاحه البال ماعندي هموم مادروا ان وراء ضحكي الف دمعه

مدري عندي كلام كثير مدري ايش اقول فيه ولا ادري ايش كتبت بس الاكيد انه في يوم كنت امر من هنا ادور تجربه وحده من تفيدني نصيحه تطلع من قلب موضوع فضفضه حبيت اذكر كل وحده انه الحزن لايمكن يدووم وان غيرك عنده هم اكثر منك وساكت وانك اذا تمسكتي بحبل الله كان الله في عونك قناعتي بنفسي اني اميره خلتني اوقف في وجهه المحنه واقلبها لمنحه قناعتي اني ماغلطت ولاقصرت مع زوجي اكسبتني القوه قناعتي انه يمكن في يوم وحده تمر على موضوعي وتستفيد منه انها راح تدعي لي

فضفضه حبيت اذكر بس فيها اي وحده كتبت موضوع انها كانت سبب في تماسكي وفي حياتي بعد توفيق الله فشكرا بحجم حبي لكم فاعطوا من قلبك النصيحه والي عندها موضوع مفيد تنزله وتحتسب الاجر والي عندها مشكله تعد للمليون وتتقرر تنزل مشكلتها اول لا وراعوا يابنات جديه المواضيع