أهلين حبيبات قلبي.. لولوليش مالي مصدقه حالي .. والله تروحن قلبي برجعتكن!! إيه هيك هه ارجعوا طمنونا عنكن
.. حبيباتي فايته سلم عالسريع
مزون حبيبة قلبي الله يهون عليك فترة الوحام ويجعل كل تعبك بميزانك وتقومي بالسلامة إنشالله

ميس حبيبتي سلامة علي يقبر قلبي ماعقلبه شر إنشالله الله يسامحهن والله ومنيح يللي غيرتيله الحضانه
حبيبة قلبي كل سنة وانت سالمة ياعمري وإنشالله عقبال 100 سنه بالطاعة ومرضاة رب العالمين
(كل عام وانت إلى الله أقرب وعلى طاعته أدوم ولنيل جنانه أرغب)

سوسو حبيبة قلبي يسلملي هالتم إنشالله .. الله يجبر بخاطرك ياحق
الله يعطيك ألف عافيه ويقويك إنشالله

مرحبا حبايبي ما حقول كل وحدة بأسمها ماشاء الله كتار الله يزيد ويبارك بس بدي قول مبروك لساجدة على البنوتة ولو متأخرة تتربى بعزك يارب وهنودة تسلميلي دايما انت السباقة فينا والباقي كيفكون بسلم عليكم وحدة وحدة اما اخباري بعد صبر طويل انتقلت وبالقطارة كل يوم شغلة وتعذبت كتير بسبب ظروف زوجي ماقدرت جيب كل شي للبيت شغلة ورا شغلة بس المهم انتقلت امور زوجي اتعقدت اكتر الله يفرجها يارب لهيك قلي انزلي للشام ريحي اعصابك وفعلا سافرت يوم الاربعاء 4 الشهر ورجعت يوم الثلاثاء 17 الشهر ماقعدت كتير زوجي تضايق من قعدته لحاله المهم شفت اهلي بخير صار شوي مشاحنات مع بيت حماي وكمان عملت لابني طهور جديد لان ماكان ظابط هلأ اتركنت اكتر ناقصني كم شغلة بالبيت بسيطين وكمان باقي بس غرفة الاولاد هي جاهزة بس بدي فلوس ان شاء الله الله يصلح الحال انا مرتاحة والحمد لله انا وزوجي تمام بس شغله في خطر وهو بلش يغرق ووصلت الامور للمحاكم بس انا لسا عندي امل بان الامور تتحسن ونعيش بأمان وراحة بال يارب بدل لا سمح الله ينسجن وارجع لبيت اهلي او نضر نهرب واو يحصل شي مكروه الله لا يقولها بس مابعرف انا قلبي مطمن وزوجي لسا عم يكابر بس الله يهديه ويعرف يمشي اموره صح يارب والله يبعد عنه اولاد الحرام ويلي عم يضحكه عليه ويستغلوه ان شاء الله يارب يختار لنا يلي فيه الخير انا عايشة بحالة قلق مابعرف شو بكرة مخبي لنا بس نفسيتي مرتاحة بالبيت ونظمت وقتي بس الله يكملها معي ويرتاح بالنا عن قريب هي اخباري ياريت تدعولي بظهر الغيب لعل الله يستجيب منكم دعوة صادقة احبكم في الله بامان الله سلام

السلام عليكم
انا ضيفة عليكم مصرية لكن اموت في السوريات و اغلب صديقاتي في الغربة من سوريا و باشعر انكم شعب قريب من المصريين جدا
و حبيت اتعرف عليكم و انضملكم في تجمعكم هذا اذا سمحتولي طبعا
و ارجو اني ما اكون ضيفة تقيلة عليكم

أهلا رواء الإسلام ، بيسعدني كون أول واحدة ترد عليك و ترحب فيك.

أهلا و سهلا فيك و بكل المصريات ، و نحنا كمان منحبكن كتير و خفة دمكن الكل بيشهد لها.

ساجدة و هنودة ، تسلموا حبيبات قلبي ، الحمد لله علي صار أحسن و فكينا القطب من كام يوم ، و الحمدلله الدكتور قال أسنانه مو متأثرة
و امبارح كان كتير مبسوط بالحضانة الجديدة ، و الله كنت خايفة يتضايق و ما يحب التغيير ، بس الله سترها معنا ، الحمد لله .

حبيبتي بكرا أحلى ، الله يطمن بالك و يوفق زوجك بشغله و يرزقه الرزق الحلال و بيعد عنه أولاد الحرام .