ماشاء الله عليكم كذا صفحة ...الله يوفقكم ويديم عليكم الهنا والسعادة يارب

على سيرة البحر وما بحر انا بجالفستون كان البحر قريب كتير على بيتي فكنت ايام العطل اترك زوجي بالبيت نايم واطلع الصبح بكييييير مشي واخذ معي هالاولاد ولعب الشاطئ ونلعب ونغطس رجلنا ونبسط على الاخر والبحر فااااضي الا من كام واحد ونرجع والمسكين اساته نايم
بس بصراحة بس غطست رجلي ما فكرت انزل بكل تيابي ههههه ماشاء الله عليكم جريئات

ومشان المناظر ذكرتوني مرة رحت على المول واخذت معي بنتي وولدي ولما دخلت فيكتوريا سكرت غمضوا عيونهم طول ماهم ماشين بعدين بنتي قالت ماما ما عم اقدر ما اشوف وين ما اطلعت بلاقي عيب.. فطلعت من المحل

يلا تروحوا وترجعوا بالسلامة لكل المسافرات والله يعينا على قعدة البيت للي ما مسافرات

ملاحظة لساجدة : والله مو قصة سفر شام بس الله وكيلك هالاجازة والاولاد وزوجي بالبيت ماعم افضى واذا فضيت وجيت امسك الكمبيوتربلاقي الحرب العالمية قايمة عندي بالبيت وكل واحد عم يصرخ دوري فبقول اروح اساوي لي شي شغلة تانية احسن لي

ولما بمسكه بعد ما الكل بنام وبجي لاقرأ كام كلمة بنام عليه ....

يلا اتحملوني لتبدأ لمدارس والحمد لله هالسنة كل ولادي عندهم دوام كامل ماعدا اتنين الصغار

على فكرة كل سنة بحكي هالحكي ولما بتقرب السنة بلاقي عندي واحد كمان ههههه الله يحفظهم كلهم

ليكون الاتنين الصغار حسوا عم احكي عليهم فقاموا يلا سلام

ومشان الله سامحوني لان ما عم شارك كتير

وسلامتها شامو يا نور ... معتز هالايام دايقة خلاقو كتير كتير وواقف على لقة واذا واحد حكى معه بيبكي ....يمكن حتى هالصغير الي لسا ما طبق سنة مزعوج من قعدة البيت بقى كيف نحن الكبار ..... الحمد لله

مراحب..............عروس الشام ............زوالله الاولاد هنن يلي عدوني واميارح على سيرة شوبات الخليج ............طلعت من البيت مع انو صوتي مو طالعبس كرمال اية لانو رح تنفجر من الملل وبين المكيف وبرات السيارة رجعت عالبيت سخنانة ولليوم ماراحت عني السخونة............اما البحر نفس القصة مرة رحنا انا وجوزي عالبحر بس انا جوزي ما حب الروحة قال حس الناس عم يزوروه اديش متخلف هو عم يسبح ومرتو واقفة بالحمى .............على كل نحنا بعد اسبوعين باذن الله رايحين عالبحر وانا شارطت جوزي انو بدي انزل عالبحر ............هو جوزي مو موافق قال حتى بالعباية بس اطلع من المي بتلزق تيابي قلتلو فورا بلبس وحدة تانية فوقعا.............والله رح ينطف قلبي على نزلة البحر..........اتخيليني بالحمى واقفة عم اتفرج

دانية حبيبتي كيفك ولا على بالك نقي لتشبعي .............بس ملحوظة صغيرة .............انت بس جربي تقعدي شهر بلا جوزك شوفي كيف رح تشتاقي خلص اتعودت عليه صدقيني صح رح تكوني مبسوطة مع اهلك بس اكيد رح تفقديلو وبالاخص عندك ولاد ما بتموني على حدا يساعدك فيهن غير زوجك........هيلين حبيبتي .......انشالله بتوصلي بالسلامة..............فتاة وشك ولا ضو القمر ..................اشتقنالك............والله هالاولاد كلن مالين انا عندي نور لازم ضل حاملتها 24ساعة هداك اليوم عم اطببخ بايد وهي عاليد التانية.................زنور سلامتها شام والله انا كمان اية ونور مرشحين ....................يلا سلام للجميع ........ساجدة خانم طولي بالك وجاجة تتذكري الذي مضى وانت اكيد صخرة على قلب العدا

مرحبا حبيباتي كيفكن .. اشتقتلكن والله
فايته بالزور عالإنترنت يضرب شو بطئ وحالته حاله!!

حابه طمنكن إني الحمدلله وصلت بالسلامة والأهل كلن بخير وعم يسلموا
ووالله دعيتلكن كلياتكن وحده وحده وماتركت حدا إلا ودعيتله من جواة قلبي

سامحوني تأخرت عليكن بس والله كل يوم من قرنه لقرنه وإنشالله بعد شي يومين طالعين عاللادقية ..
والشام يقبرني ترابها مافي أحلى من هيك .. الله يطعم كل وحده شوفة أهلها وحبابها

بتعرفوا بنات كتير مدايقة وقلت مالي غيركن فشلوا قلبي قال شو أختي وجوزها طالعين بعد شي أسبوعين تلاته على تركيا والبابا جاي عبالوا إنو نطلع معن والله رح طق !! عم فكر إنو ضل بالشام ببيت ستي الله يخليلي ياها وبذات الوقت الماما والبابا عم يقولوا لازم تيجي معنا ما بتسوى السفرة بلاكي والماما كمان عم تقلي شو فيها منرجع مره تانية عالشام ،، بس بتعرفوا رح تكون نص الإجازه طارت
إدعولي حبيباتي إنو الله يخترلي الخير لك ماصدقت على الله إمتى رحت عالشام وقاعده عم إحلم بس بالظاهر بالآخير رح آكل هوا !!
حاجتي لعي وجعتلكن راسكن بس شو أعمل والله من قهرتي
وهلأ مالي عرفانه شبدوا يصير .. عم قول يارب أخترلنا الخير

شغلة لا كانت عالبال ولا على الخاطر .. المهم أنت كيفكن كلياتكن حبيباتي
والله رح اشتقلكن .. الله يجمعنا عالخير يارب
يلا بخاطركن ،، بحبكن في الله يا أحلى صحبة

مرحبا بنور الدرب.. معناتها انتي بكندا.. وين؟ مونتريال؟ رفيقتي مبارح سافرت على كندا اجازة شهر زمان حاكم معها الجنسية و درست جامعتها هونيك و بتحب تروح تشوف رفقاتها بالصيف لأن شتويتكم بررررررد.. الله يعينكم..

دانية... مو معقول شو غيورة.. الله ستر و ضليتي مع جوزك.. ولي لو سافرتي و عيونو راحو هيك و لا هيك شو كنتي عملتي؟؟
لك بيني و بينك, الرجال الا ما يقارن مرته مع النسوان يللي بيشتغلوا معو.. اسأليني أنا.. من قهري من هالقصة نزلت موضوع بالحياة الأسرية بركي حدا بيلاقيلي حل.. انو صعبة لما يكون جوزك شبيب و مو مبين انو متجوز.. جاي على بالي علق على ضهره لوحة كبيرة اكتب فيها متجوز و عنده ولاد.. بركي بيهربوا هالبنات من قدامه!!
احمدي ربك انو الصينيات مو حلوات و فايتين بستين حيط.. أنا يللي عم يلحقوا جوزي سوريات!!! و بيضلوا بيقولوا, ابن بلدي.. دخيل الله, لو بقدر كل وحدة منهن اسفقها قتلة حشك لبك ..آه بس..
مرة في وحدة اتصلت بجوزي آخدة الرقم من رفيقه قال.. المشكلة الاخت متجوزة و عندها ولاد و عم اسمع صوت ولادها وراها!!!!!!! طبعاً جوزي ضغري عطاني التلفون بيعرفني شريرة :)
المهم, مسحت فيها الأرض و السقف و الحيطان و قلتلها انتي خاينة, مسكين جوزك يللي مأمنك على بيته و ولاده.. و هالولاد المساكين يللي أمهم فلتانه على حل شعرها ما عندهم قدوة.. بالآخير حسيتها حتبكي و قالتلي خلص, أنا ماني متصلة مشان اتبهدل.. ما عاد دق.. و الحمدلله, من يومها ما سمعت صوتها..
فخليك مع جوزك أحسن لك.. ما حدا بكرة بينفعك لو لعب الشيطان بعقله و دقها جوازة تانية.. بس خوفيه كل شوي متل ما أنا بعمل.. بحسس جوزي اني شريرة و لو اتجوز حاقتل مرته و اشرب من دمها و يمكن يروح هو كمان بين الرجلين :)خليه على أعصابه :)


هيلين.. ذكرتيني بالأسواق.. ناقصني هزة بدن أنا؟؟
لك ولي على حظي, وين ما اتطلعنا بينهز بدننا.. ما في نظارات بتخفي هالأشكال من الدنيا؟
مساكين ما معون مصاري يشتروا قماش أكتر من هيك.. يا دروب كفوا المصاري يجيبوا ربع متر.. عم فكر اتبرعلون بشوية مصاري بركي بيطولوا أواعيهون؟

فتاة سورية.. ما شاء الله كم ولد عندك؟ اذا الأولاد رايحين على المدرسة ما عدا تنين؟؟؟؟
اي أنا كل يللي ناوية عليه تنين ان شاء الله!!!!!
و الله انك بطلة معناتها, قاعدة بغربة و عندك كل هالأولاد (الله يخليلك ياهم) و لسه عم تقدري تفوتي على المنتدى؟؟
و الله بدك زلغوطة :) أنا حاسة بس جيب التاني رح انقبر بالحياة و انسى شكل الشارع..شوفوا بالصور بس..هدا اذا ما نسيت اسمي..
و ما أطيبها بنتك, قال عم تسكر عينها مشان ما تشوف العيب تقبش قلبي ما احلاها :)
من هلأ عم حاول علم ابني يقول عيب لو شاف حدا عم يشلح.. هداك النهار خالته (اختي يعني) لابسة كنزة شوي فتحتها كبيرة, صار ابني يرفعلها كنزتها و يقلها عيب :) يكفني إلهي..

آية.. معناتها سلامتك و سلامة الاولاد... و ما تطلعي بالشوب.. هدا يللي بيجيب المرض و الله.. بتعرفي أنا بالليل ما بفتح مكيف غرفتي و لا غرفة غسونتي.. بفتح مكيف الصالون و المطبخ و بسكر كل البواب ما عدا باب غرفتي و غرفة ابني.. و بيصير الجو مقبول.. لا شوب و لا برد.. و بالنهار نفس الشي, اذا قاعدة بالصالون بفتح مكيف غرفة النوم و بطفي تبع الصالون.. المهم ما يكون المكيف جاية مباشرة علي و على غسون.. لأن لو مرض (بعيد الشر) أنا باكلها.. و الصراحة بيتقطع قلبي عليه يقبرني اذا مرض.. الله يبعد عنا المرض أجمعين..
و عادي.. ياما واقفة بالحمى تحت الشمس عم اتفرج.. صار شي طبيعي بالنسبة الي.. و على فكرة أنا حتى اشلح كندرتي و طرطش رجلي ما فيني.. جوزي غيوووووووووووووووور كتير.. حتى أصابيع رجلي بيعصب لو حدا شافون..
لك لو حدا من رفقاتي صورني و أنا لابسة حجابي جوزي بيعملي قصة.. قال بركي شاف الصورة أخوها و لا جوزها؟؟ طب ما أنا لابسة حجابي! قال حتى لو, ممكن يقعد يتأمل الصورة و يدقق بملامحك!!!


شفتي غيرة أكتر من هيك؟
و لو حضرت عرس لازم اقعد بآخر كرسي جنب الباب مشان ما اطلع بالغلط بتصوير الفيديو.. مع انو عرس محجبات!!
بس يلا.. بعد كل هالوقت تعودت على غيرته.. و عندي أمل تخف شوي..
حتى لو رحت اشتري شي من السوبر ماركت ما بيخليني حاكي الهندي.. بيغار على صوتي كمان!!!
شي بيطقق..بس شو بدي أعمل؟؟ بحبهههههههه.. مجنونة بعرف..


هلا هنودة.. حمد الله على السلامة..
اي يا ستي, روحي على اللاذقية دوقي هالشوبات لقلك :)
و لك روحي على تركيا و انبسطي.. بالعكس أحسن لك.. و حلو انو رايحين مجموعة, بتتسلوا..
بيقولوا الطبيعة بتاخد العقل بتركيا خصوصي بالأناضول (الله يرجعلنا ياها)
أنا جاي على بالي اطلع على تركيا يومين و بلشت مسلسل النق على جوزي.. لبين ما نوصل على الشام بيكون استوى و بيوافق ان شاء الله :)

اي بيكفي لعي...
صايرة قرارة.. بس و الله من قلة الحكي بالبيت.. طول النهار لحالي ما حدا عم يحاكيني غير غسونتي..
فتحملوني اذا بتقدروا تتحملوا :)
بشوفكم على خير صبايا..