السلام عليكم كيفكن يا أحلى بنات
الحمدلله بلشت احفظ سورة هود من هون والخانم شرفت لعندي من هون الحمدلله
سورة عن جد بتجنن يالله شو فيها من معاني بتاخد العقل بتعرفوا حبيباتي قلت لحالي خليني أقرأ بكتاب الخواطر لعمرو خالد قبل ما بلش بالحفظ .. لك ما شاء الله وقت خلصت قراءة خواطر هالسورة حسيت حالي كتير متلهفه لأحفظها الله يجزيه كل الخير يارب ويجعله بميزانه والله كلامه فات لقلبي وسبحان الله حسيت قديش الآيات بتحمل جواتا دروس وعبر ربي يرزقنا حفظ كتابه والعمل به على الوجه الذي يرضيه عنا .. آميــن ..
حبيبتي نور الدرب كيفك وكيفن بناتك الحلوات ربي يحميلك ياهن
حبيبتي إنشالله بس نخلص منرجع نكمل سوا الحفظ .. ربي يديمها علينا نعمة..
حبيبتي أنا عمري ضاع ربي يسلمك من الضياع سبحان الله كل واحد إلا ما تيجي عليه أوقات يحس حاله ضايع بس ربك بيعين وبيسلم.. ولا تدايقي مشان دراستك بتقدري تعملي أيا شي يعوضك حاولي مثلا إنك تروحي على دار قرآن إذا في قريب منك لك ما في أحلى من علوم القرآن وربي يعوضك كل الخير ويجبر بخاطرك
HELEN حبيبتي تسلميلي شو مذوقه والله عم تخجليني .. عليم الله إنكن كلياتكن متل إخواتي بقى لازم اطمن عليكن وحده وحده
المزه حبيبتي كيفك يا حبابه وكيفو ابنك ربي يحميلك ياه يلا شدي الهمه بالحفظ وربي يباركلك
شــــــــام يا أحلى شام بس بطلع على إسمك بتذكر الشام وبحنلاّ ربي يبارك فيها هي وأهلها وكل ياللي بيحبوها.. يسلمو عطريقة الكنافه بالقشطة لك والله الواحد بهاد الجو مافي قدامه غير الأكل .. الله يستر الرجيم ياللي عملته من مده واتعذبت فيه الحمدلله راح بالهوا!!
لك سبحان الله مالي عرفانه شبني صرلي مده حاسه حالي عم اتفشش بالأكل الله يستر وما أصفى متل الدبه!!
لك حتى الرياضه كتير متكسلنه عنها لأن الجو عنا مو مساعد أبدا أبدا وأنا ربي يعافيكن ويعافي جميع المسلمين معي إلتهاب بالمفاصل والحمدلله كتير عم اتعذب بهاد الجو
مزون حبيبتي كيفك .. حبيبتي لك والله لا تدايقي حالك وكتري من الإستغفار وكمان من ذكر لا إله إلا أنت سبحانك إني كنت من الظالمين وإنشالله ما بتشوفي حالك إلا أحسن وأروق.. أما بالنسبه للأكل لا تشكيلي ببكيلك !! بالظاهر هدا من تأثير الجو!!!
lolia كيفك حبيبتي وشو أخبارك طمنينا عنك ..
بطوط .. لك يا مية أهلا وسهلا نورتينا من جديد ربي يهني قلبك كمان وكمان
شو بدك تصيري تركيه عن حق ما شالله بدك تتعلمي اللغة التركية .. الله يعينك وإذا بدك مساعدتي أنا حاضرة ..عم بمزح معك أنا بعرف تركي عالخفيف إلي رفيقه هون بمصر تركيه واسم الله حولها شو حبابه وكربوجه بتاخد العقل من كونيا تحديدا من قرية بكونيا اسمها دربوجك وكنت من فتره عم اتعلم منها تركي لأني كتير بحبها لتركيا سبحان الذي خلقها بتاخد العقل
رب العالمين يسعدلك قلبك ويجبر بخاطرك وبتبقي تخبرينا شو صار معك
نايس سمايل كيفك حبيبتي بالظاهر العالم كله صاير كتله ثلجية!! الله يجيرنا ويمرء هالإيام على خير
حبيبة بالنسبه للحفظ .. منشان ما تتكسلني ادعي رب العالمين بصلاتك إنو يعينك عالحفظ ويباركلك بوقتك وإنشالله ما بتلاقي حالك إلا بلشتي بالحفظ وداومتي كمان لأني هيك كان عم يصير معي بالأول
بس الحمدلله كنت بخصص دعاء بالسجود إنو رب العالمين يعيني والحمدلله هلأ مداومة ربي يديمها علي
سا جده وينك يا حبابه طمنينا عنك .. وآيه وفتاه وكل البنات.. رب العالمين يجبر بخاطركن ويسمعنا عنكن كل الخير
سامحوني طولت عليكن كتيـــــــــــــر ما تواخذوني
بس شو بدي أعمل بحبكن من كل قلبي بالله..
أمانه حبيباتي لا تنسوني بصالح الدعاء بهالإيام المباركة
الله معكن حبيباتي..
Roro
•
مراحب اخواتى اسفة للانقطاعةعنكون بس كنت كتير مشغولة ولى رجعة بس الرجاء الرد على موضوع اختىoula81:26: وهو بعنوان نداء لسوريات .......قبل و بعد?????ولى رجعة بعون الله
الصفحة الأخيرة
كيفكم و كيف أيامكم
و الله أنا مشتاقتلكم كتير و بصراحة عم فوت و أقرأ الردود و أطمن على أخباركم بس من قلة المروة ما عم رد..و لا تسألوني ليش لأنو ما بعرف...:hahaha:
الدنيا عنا برد كتير تلجت من شي جمعة و لهلأ ما كان يدوب التلج و الدنيا زمهرير يمكن بقلب النهار ما عم تطلع الحرارة عفوا البرودة عن الصفر و الله بيعين
على أساس بدي أحفظ قرآن بس الله لا يورجيكم ..الله يعفو عنا كل ما إجي بدي أحفظ بتلهي بشغلة تخيلو على أساس هدا الشهر حاطة ببالي أحفظ سورة البقرة و لهلأ ما حفظت غير 10 آيات منها
الله يعفو عنا و يغفر لنا يا رب....