**كرات الدجاج المحشية...chicken stuffed balls...اروع مايكون بجد يعني تسلم ايديا جدا الحمد لله:)
**المقادير:
نص كيلو دجاج مخلي او بانيه مفروم (ني مش مستوي مفروم فقط)مع نص بصلة صغيرة لازم بصلة صغيرة عشان متنزلش مياة كتير+بطاطساية مسلوقة تمام وتتهرس مع الدجاج حتى نحصل على عجينة متماسكة ونبهرها بكاري وفلفل وملح وكمون وحبهان
**الحشو :
فلفل اخضر+بسطرمة+جبنة نستو او كيري متقطعه قطع صغيرة+جبنة موزاريللا++زيتون اسود مخلي +قليل لحم معصج...
**الطريقة:
*ناخد كورة بحجم متوسط من خليط الدجاج والبطاطس ونكورها ونفردها ونحط حشو جواها ونقفلها كويس من كل ناحية
*نضعها بالفريزر نص ساعه ثم عندك اختيارين ياتشويها ياتقليها انا هنا قلتها بالبيض والبقسماط وتقلى في زيت غزير على نار متوسطة ودي النتيجة ...رائعة في الطعم مختلفة جدا عن البانيه ممكن تعملي منها كمية وتجمديها وتطلعيها عند اللزوم وفي البيض والبقسماط وتكون احلى وجبة قدمتها مع رز اصفر بالكركم وسلطة زبادي وملوخيه معرفش ايه علاقة الملوخيه بس اهه خضار :)........جربوها هتدعوالي من هنا للسنة الجاية
***********************************
ارز الباربيكيو ...
**المقادير
بصلة ضغيرة مقطعة صغير
كوب رز بسمتي و ممكن مصري لو مش متوفرالبسمتي ملعقة كبيرة باربيكيو صوص..ملعقة كبيرة صلصة....ملح وفلفل ...كوب ونص ماء مغلي
... الطريقة
**في ملعقة كبيرة زيت نذبل البصلة ثم نضيف صوص الباربيكيو والصلصة والرز والملح والفلفل
**نضيف الماء المغلي ... ونهدي النار حتى نضج الارز...يقدم وعليه ملعقة من صوص الباربيكيو...لو اضفت قطع دجاج متبلة ستحصلين على رز الريزو بالباربيكيو بنفس طعم كنتاكي
********
سلمون مشوي...السلمون مفيد جدا جدا انصحكم تضيفوه لاسماككم المفضلة..لان بحس ان مش واخد حقه عندنا نحن العرب
المقادير
**شريحتين سلمون حوالي 400 جم...تبلتهم ب _ربع م صغيرة ملح وربع فلفل اسود وربع كاري وربع بودرة توم)...كفاية التتبيل ده على السلمون لانه طعمه حلو ومش عايزين يغطيه اي بهارات زيادة
**وفي طاسة تيفال او عالجريل تركته يشوى في قليل من الزبد (ملعقة صغيرة) اخد لون و غطيت عليه يكمل نضج ..تقريبا عشر دقايق .وانتهى السلمون الرائع اصبح جاهز للتقديم
********
هنا عملت سلمون في مرة اخرى بصوص الزبدة والكسبرة الخضرة روعة الصوص عليه...بمقدار 50 جم زبدة تذوب ثم يوضع عليها ملعقتين لبن حليب ليس اكثر ثم نضيف 2 فص توم مفروم وحزمة كسبرة خضرة مفرومة وملح وفلفل...فقط..عند التقديم يصب الصوص على السمك وينفع هذا الصوص مع الدجاج او السمك الفيليه وانت ابداعك رائع في الطعم جدااااااااا وبالف هنا ....
**********************************************
جمبري مشوي بالاسياخ مع رز بسمتي بالبسلة السوتية وبطاطس بيوريه
اولا الجمبري:
**المقادير والطريقة
نص كيلو جمبري بالقشر ومفتوح من الضهر ومتنضف
*معلقة ملح صغيرة+نص م ص توم مفروم او بودر+معلقة بهارات مشكلة من ملح وفلفل وكاري وحبهان وكمون+عصير ليمونة+معلقتين باربيكيو صوص او صويا صوص (لو مش متاح يبقى صلصة طماطم)...يتبل الجمبري ويضع في الاسياخ مع الخضر المرغوبة ويدخل الفرن لمدة ربع ساعه حتى النضج
**ارز بسمتي بالبسلة الحلوة
**كوب رز بسمتي مغسول...ملح وفلفل وحبهان
في قليل زيت نضع الرز مع البهار ويضاف عليه ماء او مرق حوالي كوب ونصف وعلى نار هادئه حتى النضج
**البسلة...كانت فروزن frozen...نوع اسمه بسمة ...ممتازة ومسكرة جدا شوحتها في قليل زيت مع ربع كوب مائ وطفيت فورا لان حبوب البسلة كانت مسكرة وجميلة ومكنتش عايزاها تفقد طعمها في السوا الزيادة
بطاطس بيوريه...تسلق البطاطس ويضاف لها زبدة وتوم بودر ولبن حليب ...وتبهر بملح وفلفل فقط طعمها روعة
***************************
فتة الشاورما
**فتة الشاورما:(اللي هيجرب الطريقة دي هيبطل يجيها من برة نهائي عشان مفيش مقارنة)
**المقادير:
**رز بسمتي حسب عدد الافراد..(في قليل زيت نشوح البهارات قرفة وحبهان وقرنفل وكركم ولومي مطحون..ونضيف الرز البسمتي بعد نقعه 10 دقايق في الماء...نضيف الماء والملح ونتركه حتى تمام الاستواء)
**دجاج مخلي ومقطع مكعبات صغيرة ومتبل بزبادي وحبهان وفلفل اسود ةملح وعصير لمون وبصلة مفرومة ناعم وتوم بودر او مفروم وقرن صغير فلفل اخضر. وصلصة طماطم
ثم نتركه على النار حتى ينضج تماما...وممكن نحمره بعد ذلك في زيت حامي جدا حتى تاخذ لون جميل
**خبز شامي مقطع مطعبات ومقلي في الزيت او محمص في الفرن بقليل زيت...
**علبة زبادي عليها فص توم مفروم وقليل فلفل اسود
في طبق التقديم...نضع الخبز الشامي وعليه الزبادي رشات خفيفه ثم الارز البسمتي ثم الدجاج...ورشة بقدونس وتقدم مع التومية ..
*****************************************
بط بالبرتقال
...الوصفة دي بتاعة الشيف حسن جربتها صاحبتي الانتيم وانا عملتها وطلعت تجنن عملتها كذا مرة والنهردة عملتها مع كسكسي وملوخية كانت حلوة جدا زي كل مرة والفضل لله على فكرة ياجماعة هي سهلة والله بتحمريها وترميها في الفرن وتنسيها خالص والكسكي الجاهز جميل جدا ومبيخدش عشر دقايق يعني مش قصة :)
**المقادير...بطة محترمة انا بتعتي دي صغننه ومقطقطة :)
**بهارات اهم حاجة فلفل اسود وحبهان وروز ماري
**كوب عصير برتقال+معلقتين عسل كبار (لو مش عايزين عسل متضيفوش للي مبيحبوش طعم الحلو والحادق سوا)
**دقيق وزيت
**خضار بطاطس وجزر يتقطع سميك(تخين)
**شرايح برتقال للتزيين
**الطريقة:
**نخلط الملح+بودرة بصل+الروز ماري حوالي معلقة(ده سرالنكهة الروعة مع البرتقال)+فلفل+حبهان...ونفرك بها البطة من برة وجوة كويس طبعا بعد ماتتغسل كويس
*نضيف دقيق عالبطة ونحمرها في زيت على نار حامية عشان تاخد لون وطبعا نربط الجناح عشان منلاقيش كل واحد طاير في ناحية :)ونحط شرايح برتقال جوة البطة...
**في صينية تيفال نضيف قطع الخضار اللي عندنا ونحط البطة فوقها عشان متلزقش في الصينية وفي نفسالوقت الخضار ده بياخد من نكهة البرتقال والروز ماري وبيكون طعمه حلو جدا
**نصب نص كمية عصير البرتقال عالبطة من فوق وتحت وبشر برتقال كمان...ونضيف 2 كوب ماء كمان
**نغطيها بفويل بعد منعمل فيه فتحة بالسكين لازالة البخار الزائد...ونحطها في فرن من تحت بس على 200
ونسيبها براحتها خالص من ساعة ونص لساعتين عشان تكون استوت خالص ونفتح الفويل ونحطها تحت شواية الفرن تحمر وتطلع نكون سخنا نص كمية ةالعصير الباقية عشان تتقل ونصبها عليها اول متطلع...
**الكسكسي الجاهز...طريقته سهلة وحلو جدا الباكت تجبيه وتضيفي عليه 2 كوب مرق دافي بس مش سخن عشان ميعجنش او بحيث انه يغطي الكسكسي بحوالي سم كده... وتغطي عليه ونضيفله طعة زبدة وبس نظبط ملحه وخلاص ...ونسيبه وبعد كده نفلفله بالشوكة...ونحط البطة عليه....اكله جميلة جدا
******************
وفي النهاية ربنا يسعدكم في الدارين ويرزقنا الجنة بلاحساب ولاعذاب...والسلام عليكن ورحمة الله وبركاته