محاذير قبل الطلاق و حقوق بعد الطلاق

حبيباتي
أنا الحمد لله اتكلم من واقع علم وخبره
وليس لي غرض يشهد الله الا فائدة الاخوات المطلقات او من تفكر بالطلاق وتوعيتهم ...
1- لاتلجأي للطلاق الا بعد التفكير مليا بقدرتك على الاستقلال بابناءك وتوفير حياة كريمه لهم ( عذرا العودة لبيت الاهل لايعتبر البيئة المناسبه للمطلقه واطفالها لاسباب كثيرة )
2- في حال كان الزوج / الطليق له سوابق في الادمان او الضرب تأكدي من اثباتها سواء بشهود او بتقارير طبية في حالة الضرب ( هذا في حالة رغبتك الطلاق )
اما في حال وجود أمل بالاصلاح فيما يتعلق بالادمان هناك حاليا مصحات وان كان بعضها خاص ( تواصلت مع مصحه في جدة لا اعلم عن بقيه المناطق ) لكن المهم التأكد ان الشريك يرغب التخلص منه وهنا يجب عليك الوقوف معه ومساعدته .


3- دائما ضعي لك مبلغ في حساب ادخاري سواء على شكل نقود او ذهب ..حتى لو كنتي موظفة 10% من راتبك المفروض تكون ادخار.. ماتعرفين يمكن تحتاجين مستقبلا ولو مااحتجتي زيادة الخير خيرين.


4- إذا رأيتي الطلاق لابد منه وامر حتمي أولا فكري بنفسك لو ماكان عندك دخل كيف ممكن تسوي لك مشروع صغير .. تذكري مواهبك المدفونه من زمان وارجعي الاشياء اللي تحبيها وسويها , ادخلي دورات عن التجارة الالكترونية والعمل عن بعد .


5- اياك والنظر للخلف والرسايل والذكريات وكرامتك ضعيها فوق كل اعتبار ياما مطلقات توسلوا لازواجهم يرجعوهم ورجعوهم بلا مصروف ولا كرامه وجلسوا بعدها معلقات لانهم رضيوا من البدايه على انفسهم


6- اهلك جامليهم لكن حياتك ملك لك وحدك .. مو لازم تتزوجي عشان تحسي نفسك كامله... ربي عيالك وعيشي معهم بحب واستمتعي بهدوء البال .. جاك ابن الحلال ودرستيه من كل النواحي خذيه ماعجبك لاتضغطين ع نفسك وتقبلين بشي غلط عشانك مطلقه انتبهي ..


7- نفقتك على زوجك واجبه إذا كنتي على ذمته وتقدرين تطالبين بها أي وقت حتى لو معلقك 5 سنين او 5 شهور تطالبين بها وانتي راسك مرفوعة .


8- نفقة عيالك من يوم انتي حامل الين يتوظفون على ابوهم ... لاتقولين ماابغى مشاكل اخاف ياخذهم مني .. ارتاحي الاطفال ما يؤخذون من الأم الا في حالة واحدة فقط ( غير مؤهله اما مريضه نفسيا او اخلاقيا مسوية مصايب طبعا باثباتات يقبل بها القاضي ) غير عن كذا لو يحب السماء ماياخذ بنتك او ولدك .. والولد بعد 7 يخيرونه والنظام الجديد البنت بعد 15 تخير .. ف ريحي جمالك ولاتشيلين هم ياحلوة واطلبي مصروف عيالك وباستقطاع شهري .. وترى هذا حق لعيالك الله شرعه مو من حقك تتنازلين عنه .
9- بعضهم الظروف تجبرها سواء اهل او زواج انها تترك العيال لابوهم .. الله يعينها .. إذا غصب عنها تقدر تطالب بهم حتى لو بكره ( الحضانه حق متجدد ) يعني مثلا غيرتي رايك وتبينهم او تزوجتي وبعدها تغيرت ظروفك وحبيتي تاخذينهم او مثلا توظفتي وصرتي تبينهم أي وقت من حقك ترفعين قضيه للمطالبه فيهم )
10 - ابوهم مايجيبهم للزيارة ... أبد حبيبتي الحين الانظمة تقص الظهر مرة ماجابهم المره الثانيه بيسوون له إيقاف خدمات والمره الثالثه ماجابهم بالصك اللي عندك على محكمه التنفيذ ويجيبونه بالقوة الجبرية . راحت ايام قفل جوالك ولاعليك فيهم :)
11- لو لاحظتي اجحاف ف الحكم الصادر ضدك من أي محكمه في اي موضوع يحق لك رفض الحكم وطلب تغيير القاضي وطلب الاستئناف
12- لاتسكتين عن حقك , تذكري ان الحقوق تؤخذ ولا تطلب ..