محتاجة لكم بعدالله زوجي يخوني

السالفة طويلة يوم الاربعاء بالمغرب وصاني زوجي اشحن الايفون حقه ويوم شبكته بهاللحظة تطلع رسالة فوق يعني تنبيه رسالة انستجرام يقول ماراح انساك يا حبي 
انا من الصدمة ما ادري وش اسوي فتحتها لاني موب مصدقة وقول ظالمته واقرا الكلام رساله بينه ووحدة مكتوب تقول هي 
ما راح انساك فديتك عمري والله وحاطة فيس يصيح 
امانه عليك خلك بحالك خلك طبيعي 
وهو يقول ما راح انساك وستضلين شاغلة بالي وحاطي فيس يرسل بوسة 




بنات زوجي راعي صلاة وما يسمع اغاني وما اصدق فيه شي 
هو يحب التصوير ومن شهرين من ايام الامطار اقول نزل صورك بالانسجرام خل اسوي لك حساب يقول لا عادي تبين انتي نزليها بحسابك
وانا صدقت الخبلة ما دريت ان عنده حسب فيه حول 200صوره ومقفل بعد انا حساباتي تويتر انيستجرام فيسبوك ولا واحد قفلته ومعلمته كلمة المرور لان ما فكرت اخونه ابد اصلا احبه ليش اخونه 
بس يوم شفت المصيبه قمت ارجف و انهرت الا شوي رحت شربت مويه وتوضيت وصليت و انا اقكر اواجهه او لا وخايفة عاللى البيبي اللي ببطني وثنين نايمين بالصالة ما ابي يحسون بشي 
انتظرت بالمجلس وانا طول الوقت اذكر الله وقبلها يمكن لي اسبوع مداومة عالذكر والاستغفار ابي بيت ملك بس ربي فضح سره وانا منب من الزوجات اللي مسوية مباحث مع زوجها لا عادي واثقة ثقة عمياء وكنت دايم لا جا سيرة قصص خيانه اقوله مستحيل افتش بجوالك او اشك فيك اذا فيه شي ربي بيفضحه 
المهم تذكرت قصص الاستاذة ناعمة انه لازم يكون معك دليل مادي عالخيانه اذا اخترتي تواجهين زوجك وانا خذت جوالي وصورت الكلام اللي بينهم 
عشان احطه امام الامر الواقع.
المهم جا بعد الصلاة وانا جالسة بالمجلس توني ما طويت سجادتي وقلت تعال ادخل الله يعافيك 
قال شفيك تعبانه قلت ايه مرة قلت افتح المكيف فتح المكيف قلت رد الباب عشان البراد لا يطلع وانا ابي العيال ما يسمعون لو اشتد النقاش وهم نايمين دعيت ربي ما يقومون لين اخلص منه والحمدلله تم واجهته وريته الصورة قلت شف قال وش هذا قلت انت اللي علمني من هذي اللي راسل لها قال ما ادري هذا مهوب انا قلت اجل مين  وصار ينكر قلت دام مهوب انت بجيب المصحف الشريف وتحلف عليه انك نا تعرفها وانه موب انت عيا قال ما يحتاج احلف قلت لو حلفت انا بقفل الموضوع ولو انت كذاب حسابك مع رب العالمين وانا قمت اصيح و اشاهق من الصياح قلت رب العالمين اللي كشفك الحمدلله ومل شوي اذكر الله قدامه عشان يعرف المصيبه موب خانني وبس الا هو مسوي ذنب وصرت اقوله انا صاينتك وعافتك كل شي اسويه لك ان مان بالبيت او بغرفة النوم قصرت معك بشي وانا اصيح وهو يحاول يضمني يقول لا تبكين وهو يبكي انا قلت يعني هو خايني هو ما يبي يعترف ويبي اصدق ان مافيه شي ( انا متابعة ل ناعمة وحاولت اطبق ) حاولت اصيح اكثر لانه ما عمره شاف دمعتي انا موب دلوعة واصيح على اي شي حتى لو زعلانه بس هالهم ما قويته جلست اناقشه انا مقصرة بشي شكلي موب حلو وكله يقول لا قلت اذا غلطت بشي علمني بس لا تدور غيري و صرت  اسأله زوجتك هي قل لا خطيبتك قال لا قلت حرام عليك انت مصلي وحجيت وراعي طاعة ليش تسوي كذا انت محصن وهي تدري انك متزوج من كلامها لك من هي عشان تقولها وش بينكم واحاول فيه يعترف يقول بس هالكلمتين قلتها لها قلت اسامحك لو بينكم شكرا وعفوا لو بينكم حلو تصويرك ومن هالقبيل بس انت تقول ما راح انساك وش سوت عشان ما تنساها وجلست اصيح وصار يضمني ويقول خلاص لا تصيحين وسمعنا صياح بنتي قمت لها وانقطع الموضوغ طلعنا بذاك اليوم لاني واعده الاولاد بطلعه ورجعنا و الموضوع طبيعي ويوم نامو العيال ونام هو وانا بجنبه تذكرت وكل شوي افتح الصورة واقعد ادعي باليل واصيح صحى وقام وش فيك قلت مجروحة و تناقشنا انا اعاتبه وهو يقول ما بينا الا هالكلمتين قلت اللي بينكم اكبر من كلمتين انا موب مصدقه انا احبك وكل شي قدامك مفتوح وانت تسوي حساب وتقفله عني وانا كل ما نزلت صورة اوريك وانت ما توري الا هذي شف حسابها ما فيه اضافات الا انت لانهامسوية وفيه ترا الصور بالحساب من ضمنها صور له وهو وسيم عشان كذا خقت عليه قلت تذكر البنات الزاحفات اللي تزعجني بسوالفهم انت تكلم وحدة منهم علقت على وحدة من الصور وما عاد دخلت وش دخلك فيها ليه تشغل بالك بها تقرب لك تقول بسافر ليه تقول ترجعين بالسلامه ليه ترجع لمين بصراحة مرة تعبت يوم الجمعة مر كأن ما فيه شي احاول انسى العصر تذكرت وانا اغسل المواعين وانا اللي اجرها صياح انظف واصيح وهو يسمع برا جا يهدي وانا الف وجهي قال لا يلعب عليك ابليس قلت انا مالعب علي ابليس واطالعه اقصده ولفيت وجهي ورحت اكمل شغل ولدي ماما شفيك تصيحين قلت تعبانه صلحت شاي وتقهوى ومعاها كنافة جايبها من برا انا من يومين اقول مشتهيه كنافه وعندي كولسترول وقال كلي معنا قلت ما اشتهي صار يأكلني ويقول شكلك حلو ويحاول يخدعني بكلامه  انا قضيتها شغل وترتيب احاول اتهرب منه ما ابي اطالعه وهو طلع ووجا وتعشينا ونومت العيال وجا الليل وما كأن فيه شي عطيته حقوقه وازود تزينت وتعطرت قلت اليوم انا عروستك قال من جد عروس ونمنا وراح الدوام وانا نايمه واتذكر انه لحاله ويمكن يراسلها يقولها انه انكشف او يشوف خطة منها احترقت بتفكيري ارسلت رسالة واتس اب صباح الورد و قصيدة عن الخيانة والجرح اللي حاسه فيه طبعا ما خذتها من النت ارسل انا اسف بس بينا هالكلمتين وان رافضه اصدق كلامه  قلت احنا ما سكرنا الموضوع وما انتهى يقول خلاص انسي قال اذا جيت تفاهمنا قولوا لي شوروا علي وش الدبرة لي ساعة اكتب الموضوع بالملاحظات وش اسوي اذا جا ابتصدد إلين اشوف ردودكم يا بنات فيكم بنات حكيمات اتمنى يفيدوني ادعو لي انا بحاجه لهالشي انا ما ادري وش حجم العلاقة وموب عارفة السبب اللي خلاه يخون وخايفه انه باب وانفتح تدرون من اسبوعين مر يوم زواجنا ذكرى ال7 سنوات واقوله بالعادة يسولف عنها هالمرة اسولف انا وهو عيونه بالايفون 
محبطة محطمة بس بحاول اشغل نفسي الين ما يفرجها الله نسيت شي يوم ناقشته بالمغرب قلت كان تبيها تزوجها ولا تسوي حرام وانا ب اصبر وان ما قويت كل واحد يروح بطريق وانا الحمدلله ما يعيبني شي وصغيرة وحلوة وألف من يتمناني عشان يفهم اني موب ميته عليه بس بالكلام بس الصدق شي ثاني 












طولت عليكم وتعبتكم بالقراءة  بس مأملة فيكم خير ما ودي اشتكي ل امي او اختي امي تعبانه واختي ما تزوجت وما ابي اكرها بالزواج اكثر هي تكره العرس وسيرته تقول الرجال لوتحرقين نفسك ما بين بعيونهم ما عندي استعداد احرق نفسي وما ابي افضح زوجي عندهم والا تكبر السالفة ساعدوني 
بريح شوي وارجع اشوف ردودكم