محمود سعيد... الدروازة ...كمان سوق عمرين ..عند دوار الدراجة فية كم محل
كمان سوق الشاطئ من الخلف اشياء حلوة وجلسات فخمة انا فصلت عندهم

غرفة المعيشة الأفضل يشتري جاهز من المحلات المعروفة عشان تستحمل ... المطلق كنبه كويس ومتين وأقل طقم ممكن يكون سعره خمسة أو سبعة آلاف أيام التخفيض .. غرف النوم اللي عند المطلق والصبان حلوة بس أسعارها تكون من 16 ألف وانتي طالعة

الكنب المفصل اللي عند محمود سعيد والدروازة ... شكل بس لكن ما يستحمل معيشة لأنهم بيحطوا قاعدة الكنبة شرائط مطاط وبعدين عليه السفنجة .... يعني مع الاستعمال اليومي تهبط ... عشان كده حلو تعملي عندهم الصوالين بس .. وأسعارهم بالنسبة للمحلات الجاهزة أهون بشوية ... لمن تفصلوا عندهم خدوا اسم االقماش والللون وفصلوا الستارة برة عند الهنود لأنها حتكلفكم أقل من لو فصلتيها مع الكنب .. يكلفك الصالون كامل (كنبة كبيرة وكنبة تلاتة وكنبة اتنين وكنبتين شخص واحد وكرسيين ومقعد صغير أو كنبة بدون ظهر) بطاولاته وستارته عندهم ستة آلاف وسبعة وتسعة وكل ما نقصتي كنبة أو كرسي أو طاولات كل ما ينقص عليكي السعر وحسب نوع القماش وشكل الكنب ...

في محلات جنب سوق الدراجة تبيع غرف نوم حلوة أسعارها من 4 آلاف الين تسعة تقريباً .. حسب نوع الخشب والشكل ... وخدوا معاها المراتب الكبيرة والعالية اللي لو جلستي ناحية اليمين ونطيتي ما يحس بيكي اللي في الناحية اليسار ..
عندهم كمان مداخل زي الدواليب ودواليب جزم

الإكسسوارات واللوحات والطاولات والبارتيشنات تلاقيها في سوق محمود سعيد أشكال غريبة وحلوة وأكيد من ايكيا وهوم بلازا


في محلات أثاث كمان في حي الصفا ... تخلي سوق المرجان على يمينك وتمشي على طووووول وتجيكي على يمينك بعد ما تعدي الإشارة .. محلات زي الحربي والسريع وروائع ... عندهم غرف نوم ومكتبات تلفزيون وطاولات وغرف سفرة

سوق عمرين في الصواريخ محلات متنوعة برضو فيها غرف نوم وصوالين وطاولات وأسعارهم تقريبا من خمسة وفوق وجنبهم محلات تانية تبيع الأثاث الوطني وممكن تلاقي عندهم حاجات كويسة من طاولات وكده

سوق الشاطيء كمان فيه محلات تفصل الأثاث وكنب جاهز وأشكال حلوة جداً وأسعارهم في الرخيص وفي الغالي

في محل اسمه بن شيهون أمام سوق البوادي عنده كنب شكل مودرن ينفع صالون بس لأنه يهبط وأسعاره 3 آلاف وانتي طالعة

الأجهزة الكهربائية الأفضل تاخديها من محل واحد زي اكسترا عشان تستفيدي من العروض والهدايا والصيانة

وأخيرا لازم تاخدي لفة في محلات الخردوات المعروفة لأنه ساعات تلاقي عندهم حاجات ما تعطي سعرها زي مهجة والباشوات والهدايا سنتر


بالنسبة ليا أفضل دايماً أخلص في تأثيث الشقة الحاجات اللي تحتاج لدخول عمال في البيت أولاً وبعدين أفرش الباقي عشان لا يتوسخ من شباشب العمال وأياديهم وسجائرهم ولا تواخذوني روائح بعضهم ... يعني البوية أو ورق الحائط , النجف , المكيفات, التسليك والكهرباء, المطبخ, مهندس الدشات والرسيفرات , السباكين, الستائر , بعدين الأثاث الكبير زي غرف النوم والصوالين وبعد كده تجيبي الإكسسوارات واللوحات ولوازم المطبخ والموكيتات ولوازم الحمامات

لا تنسوا قبل لا تبدأو التأثيث تاخدي مقاسات الغرف كلها وكل حائط وترسميه عندك ويصير مرجع لكل حاجة تبغوا تشتروها أو تفصلوها .. وطبعا الأسعار اللي انا حاطتها ممكن تكون مختلفة يعني لا تاخدي على كلامي بس .. روحي وشوفي بنفسك

ومبروك والله يتمم له على خير ان شاء الله

محمود سعيد