محتاجه احد يطمني ع بنت اختي في مجال تجيب نسبه زينه هالسنه

رفع

يا قلبي هي , أسأل الله العظيم أن يشفيها شفاء لا يغادر سقما .

أختي ما قلتي لنا طبيعة مرضها ؟ إذا قولون أو سكر أو ضغط أو إحدى الأمراض المزمنة , فكثير يعاني من هالأمراض و بسم الله عليهن درسن و تخرجن ما شاء الله , الله يجمع لهن الأجر و العافية , إنتن اسألن الدكتور : تقدر البنية على الدراسة ؟ و ضروري تشاورن البنت نفسها , إذا هي حابة تكمل خليها تكمل و تشد حيلها و فالها النجاح , و إذا هي حابة تأجل برضو براحتها , يعني الموضوع يعتمد عليها , و أنا أشوف إنها تشد حيلها , و مفروض مدرساتها يساعدنها عشان ظروفها الصحية , و تكفن ساعدن البنت و اقرن عليها الرقية الشرعية و ادعن لها و خليها تكثر صدقة , على الأقل تكون أرضت ضميرها و عملت اللي عليها , و نسبة الثانوي أكثرها تروح على القدرات يعني المسألة حظ و نصيب , أذكر السنة اللي تخرجت فيها من الثانوي قبلوا كل خريجات الثانوي بلا استثناء مكرمة من الأمير , الواحد ما يدري عن بكرة , و هذا حنا خريجات و فرضوا علينا قياس و كل مالهم يصعبون الأمور , فقولي للبنت لا تشد أعصابها , كلن يبي ياخذ رزقه , و الله يكون بعونها .

الله يرفع قدرك يا ام جنى

..........



معطاءه الله يسلمك يا طيبه ومشكوره على العاء الطيب
فعلا هي معها قولون عصبي وزادها التوتر احنا نقولها لا تستعجلي وهي تقول نا ابي اضيع سنه
هذا قرارها هي وانا بس حبيت اطمن لو تعبها ذا له ثمره او ترتاح هالسنه ودي احد عنده خبره يعنعنا او يقنعها
عموما ما قصرتي ياقلبي ع المشوره تتوقعي لو البنت فعلا جابت نسبه في القدرات يرتفع معدلها

آسفة يا قلبي على التأخير , مشاركاتي خلصن أمس و إلا كنت أبي أرد عليك .

اللي فهمته من كلامك إن البنت ما ودها تأجل السنة , و أنا رأيي من رأيها , و الله ما أبي أغشك أنا أشوف التأجيل مهو حل لأن القولون مرض دائم , لكن أنصحها بالاستخارة ما تدري وين الخيرة , و أرجع أقول على حسب رغبتها , إذا هي حابة تكمل خليها تكمل و إذا هي حابة تؤجل و تكمل بعدين براحتها , الراي يرجع لها أولا و أخيرا .

بالنسبة لسؤالك : و الله العلم عند الله وحده , هي المشكلة نسبتها نازلة بثاني و بثالث , لكن خليها تشد حيلها الفصل الثاني , تحاول تجيب بكل موادها درجات عالية أو كاملة , و لازم تتدرب على القدرات يمكن تقدر تجيب نسبة عالية , و على حسب القسم اللي تبيه بالكلية , فيه أقسام تتطلب نسب عالية و أقسام عادي تقبل أي نسبة , و برضوا من جامعة إلى جامعة تختلف نسب القبول , و بالنسبة لمرضها قولي لها لا تخاف و لا تلتفت له و لا تعتبره مرض أصلاً , صح إن القولون متعب لكن هذا مو معناته إنها ما تعيش حياتها طبيعية , هالمرض تلقين أغلب الناس يعانون منه بس ماشية أمورهم , يتزوجون و يدرسون و ينجبون ( ما شاء الله ) , حتى لا جلست مع صديقاتها لا تقعد حزينة و حالتها حالة , خايفة من المرض , لا خليها تنبسط و تسولف و تضحك , القولون يتدهور مع كثرة التفكير , أما إذا طلعت للناس و غيرت جو و ضحكت و انبسطت فإنه إن شاء الله ما فيها إلا العافية , و أدري إنه صعب إذا هذي أول سنة يجيها القولون , بس بعدين تتأقلم و يصير عادي بس خليها تبعد عن كل شي يضايقها و بعض المأكولات اللي لازم تجتنبهن ( خليها تبحث عنه بالنت ) و أهم شي لا تشد أعصابها و لا تتضايق , هذا مرض مزمن يعني طول العمر بس لا تخاف ما يعتبر مرض خطير , و الله قادر أن يشفي أصعب الأمراض , الله الله بالدعاء و الصدقة , و الله يكتب لها اللي فيه خير و يشفيها .

الله يسعدك يا معطاءه فعلا القولون جايها من قريب وهذا كلام الطبيب لها تبعد عن التوتر
الله يشفيها وكل مريض يارب