اول شي اهنيكم على هالمنتدى الرائع
انا دايما ادخل واتصفح
وعاجبني النجاح الكبير للمنتدى والله يديمه عليكم يارب
انا جايتكم اليوم محتاجه افضفض
اتمنى من كل قلبي تقرون موضوعي بتمعن ويمكن بعضكم بيشوف الموضوع بسطحيه او تحسون الموضوع تافهه بس صدقوني كل كلمه كاتبتها انا صادقه فيها
الموضوع
فيه ناس جايين يخطبوني الموضوع عادي جدا وماهو اول مره يصير لي كم مره انخطبت وكم مره زارونا ناس يشوفوني
انا هالموضوع عادي بالنسبه لي الحمدالله واثقه من نفسي
بس اللي متعبني ومو مخليني انام الليل
امي
اول مايصير في البيت موضوع خطبه احس بضغط كبييييييييييييييير فوق ماتتصورون
امي طيبه وحنونه ومستحيل تغصبني على شي ماابيه
بس انا مو صغيره ونفسي افرحها واريحها لانها مريضه وشايله همي لان خواتي كلهم تزوجوا الا انا واختي الصغيره
ودايما عينها علي ونفسها تفرح فيني
ممكن تقولون وين المشكله
مشكلتي في الرجال اللي يخطبون
انا ماعندي شروط تعجيزيه
صدقوني كل اللي اتمناه في زوج المستقبل طلبات بسيطه جدا
و دايما ادعي ربي انه يحقق لي هالطلبات عشان اتزوج وانا مقتنعه تماما بالانسان اللي برتبط فيه
وعندي يقين وايمان تام ان ربي بيرزقني باللي اتمناه
وعندي ثقه كبييييييره في ربي
بس دايما احس بضغوط من اللي حولي مع انهم مايتكلمون و دايما يقولون لي على راحتك
بس احس بشي بداخلهم يخوفني
يقولي ان الفرصه مو دايما تجي
يقولي مو كل شي يبيه الانسان يحصل عليه
دايما اخاف اقول لا
اخاف ان هالفرصه تكون احسن فرصه احصل عليها
الحين الناس اللي جايين مواصفات ولدهم المبدئيه زينه
بس دايما افكر في اخلاقه في دينه في شخصيته في شكله
اخاف انصدم في شي من هالاشياء و احطم اهلي والفرحه اللي في عيونهم
انا من عرفت بالموضوع وانا اصلي واستخير
وطول الليل اصيح ماادري ليه
او تبون الصراحه انا عارفه ليه اصيح
لاني اتمنى ان يكون هالرجال فيه خير ويطلع مثل مااتمنى
بس اصيح من الاحباط اللي احس فيه لو صار هالرجال فيه عيب مثل غيره
عارفه بتقولون لا تتشائمين
صدقوني انا مو متشائمه
بس صرت اخاف من الاحباط
و عارفه بتقولون
لو هالرجال فيه خير لك بيكون من نصيبك
ولو
مافيه خير لك ماراح تتم هالخطوبه
صدقوني انا عارفه هالشي زييييييييين
ومؤمنه ايمان تام بهالشي
بس من هنا الى الوقت اللي بيتقرر فيه كل شي
صدقوني اعصابي محروووووووووقه
مانيب عارفه شلون اعبر او اطلع اللي بخاطري كله
ممكن بعضكم يحسون الموضوع سخيف او تافه
بس احلف لكم بالله ان هذي مأساتي مع كل خطبه
صياح وبكى وتوتر وقلق
على الرغم من اني الحمد الله اصلي بالليل وادعي واستغفر بس ماادري ليه نفسيتي تتعب من هالموضوع كثييييير
ياليت اللي تمر بنفس حالتي لما تنخطب تشاركني بنصايحها
و اللي عندها اي نصيحه أو طريقه اخفف فيها على نفسي تساعدني فيها الله يساعدها
وصدقوني ماراح انساكم وبدعي لكم
امي كانتتقول لنا الي يتعيف كثير يوقع اشر وقعه
انتي ياحبي استخيري واكيد ربي بيهديك للخير بس حطي فبالك مافي احد كامل مستحيل تلقين احد كامل واذا اخذتي واحد فيه نقص من احد الجوانب اكيد بعون الله بتعدلينه لا تيأسي الرجال على ما عودتيه الموضوع ابسط بكثييير مما تتصوري لا تعطينه فوق حجمه
الله يوفقك ويكتب لك الي فيه الخير ..
يارب يارب يسر امرها لمافيه صلاحها يارب يسر لها الخير اينما كان ثم ارضها به ياسامع الدعاء ياكريم
اللهم صلي وسلم على سيدنا محمد وعلى اله وصحبه اجمعين