محتاجه لدعائكم

السلام عليكم ورحمة الله وبركاته
مساء الخير اخواتي

مدري كيف ابدأالقصه قصه معقده بعض الشيء لكن بختصرها لكم

فيه قرايب لنا حاقدين علينا بشده واشك إنهم مسويلنا اعمال واختي قبل شوي تسولف معي وتحكيلي عن حالة كل واحد من اخواني ولاحظت إن حالتهم ساءت كثير من بعد ما تزوجت

اخوي الكبير صار يتكلم مع نفسه ويضحك لحاله وعنده افكار غريبه وماهو طبيعي ابد الى خوفني تطورت حالته للأسوأ تقريبا يمكن الى عنده اعراض سحر او مس وقبل كان طبيعي
المشكله اخوي الى اصغر منه بدت عنده نفس اعراض اخوي الكبير صار يتكلم مع نفسه بس بشويش
وهذا الى خوفني اكثر
واخوي الثالث دائم شارد ذهنه ماهم طبيعين ابدا
حتى انا ما اقول اني طبيعيه تماما اشك فيني دائم كوابيس وافكار غبيه تجيني وعلى فكره الكوابيس هذي غالبا اشوف قرايبنا هذولا فيها
خلوني اقولكم عن قرايبنا هذولا

إذا سمعو خبر حلو عنا يتغير لون وجههم ونبرة صوتهم وكأنهم مخنوقين
ودائما وحده منهم دائما تسولف مع شغالتنا وإذا دخلت عليهم يسكتون
إذا رحت عندهم دائما افقد نقابي واحيانا ملابس خاصه لأن احيانا ننام عندهم
كثير اشوفها في الحلم مع جن واحيانا اتحلم إنها جنيه
يوم انخطبت ماعلمناهم لكن جا اخوهم في نفس اليوم وماسلم عليه وكان صوته مخنوق للغايه
احيانا يتكلمون عن اشياء تصير في بيتنا وماعلمناهم كأنهم يلمحون إنهم بعرفون كل شي يصير في بيتنا
احس انهم يعرفون حتى وش نفكر فيه القى كل افكاري عندهم لكن يجيبونها بطريقة كأنها سوالف عاديه
وإذا شافوني مصدومه من انهم تكلمو في شي من افكاري يبتسمون واحيانا يضحكون
يكرهون عائلتنا وانا بالذات يتعمدون تجريحي قدام الناس او لوحدي ويجيبونها بطريقه مزح يتعمدون يضايقوني يفرحون إذا شافوني مهمومه ومتضايقه ويغغضبون إاذ كنت مبسوطه او جاني خير
ايام ماكنت مملكه كانت تسألني وحده منهم كيف مشاعرك مع خطيبك ؟وش تحسين فيه ؟يعني تحسين إ،ك حبيتيه وإلا متضايقه ؟تكرهينه وإلا عادي؟ ويوم ملكتي قالتلي وحده منهم ترا يمكن يجيك حالة تكرهينه قلت لها ليه قالت لأن انا واختي جاتنا الحاله هذي ويمكن تكرهينه لدرجة إنك تبغين يطلقك
قالت إذا جاك كذا ترا طبيعي لأن أنا واختي وبنت عمي وفلانه وعلانه كلنا جاتنا نفس الحاله

المهم استمريت عالاذكار وكذا والحمدلله انا بخير لكن خايفه مره على اخواني وخاصه اخوي الكبير
الله يوفقكم ويجزاكم خير ادعوووو لأخويه إن سحره ينفك ويرجع طبيعي وادعو لنا كلنا

وقولولي كيف اتعامل مع الناس هذولا

اهم شي الدعاء ارجوكم لا تنسونا منه بالذات اخويه الكبير