محتاجه لنصايحكم :(

لسلام عليكم ورحمة الله وبركاته ..
صبحكم الله ب الخير والسرور ..

بدخل بموضوعي .. وابغى رأيكم .. واتقبل نصايحكم وانتقاداتكم بصدر رحب :)

انا لما كنت بنت كنت م اعرف شي اسمه مطبخ ابداً ابدا .. وماكان عندي رغبه في اني اتعلم كنت اشوف ميولي مو ف شغل البيت .. بس كنت اعشق عالم التكنلوجيا وابحر فيه عشان اتعلم .. تقدم لي قريبي وتمت الخطوبه وقضيت سنتين فترة الخطوبه ب مشاكل يعني كنت متوقعه الانفصال في اي وقت وتقريباً كنت فاقده الامل .. عندي قريباتي لما ينخطبوا خلاص يحاولون ان يكون عندهم خلفيه في شغل البيت من كل النواحي ترتيب تنظيف طبخ… .. إلخ ..
وانا دايم ماما تقولي تعلمي لمستقبلك مو لي بس انا نااااادر اسوي شي من الطبخ ...

بس خطيبي واهله يدرون اني مو مره في شغل البيت .. كنت اقوله اني انا م اعرف اطبخ كان يقول عادي بتتعلمين ..

الان تزوجت ولله الحمد وداخلة السنه الثانيه من زواجي .. مو مره اعرف للطبخ احس لما ادخل المطبخ ارتبك ما ادري ايش اسوي احس ب نقص وعدم ثقه ب النفس بما ان سلفتي ماشاء الله خبرة 10 سنوات ف الطبخ وانا هي كان زواجنا ف ليله وحده تبدع ف الطبخ ونفسها حلو وواثقه من نفسها وطبخها ماشاء الله احيانا لما اشوفها تسوي شي احس ب نقص لما اطلب منها الطريقه مع ان هي تقول انتي لسى صغيره في حريم مايعرفوا انتي ف البدايات وتتعلمي ان شاء الله .. وزوجي احياااانا يقول انتي ماتعرفي تطبخي زي الناس والطبخ اللي اسويه ما اهتم من البدايه كيف تطلع او لا اهم شي انهي مهمتي .. وزوجي من النوع اللي يحب الاتكيت والاكلات الغريبه .. لان لما يروح عند اصحابه يجي يمدح لي اكلهم وطبخاتهم واصحابه من النوع اللي اذا زوجاتهم طبخوا طبخه يتفننو ف التصوير ويرسلون له ويوريني بس انا ما اقول شي بس اقول ماشاء الله واحس بنقص اقول ياليت انا بعد اقدر اسوي لك كذا .. انا اشوف طبخات في المنتدى مره تعجبني .. بس المقادير ماتكون متوفره عندي .. واخاف اقول لزوجي يجيب وماتضبط الطبخه .. بس لما اروح عند اهلي اطبق الوصفات اللي اشوفها ف النت او اللي اخذه من سلفتي بثقه .. لما ارجع عند زوجي ما اقدر ما اعرف ليش احب اسوي شي مختلف عند اهل زوجي بس ما اقدر ..ومن الناحيه الثانيه احنا عايله كبيره ماشاء الله وطلبات المطبخ كلها على حماي لما اطلب من زوجي مايجيب لان هو مو مسؤول واذا جاب لازم يجيب كميه كبيره وهو يدفع لاخوه واخوه يتصرف في ادارة البيت وطلباتها بس طلبات ثانيه زوجي مايجيب مايجيب كثير الا الاشياء الاساسيه ..مثل الخبز .. ولما نطلب من ام زوجي شي ناقص في البيت ماتقول لولدها المسؤول ف البيت ولاتقول قولوا لازواجكم يعني مشوها ب اي طريقه بما ان الزيت والرز والبصل والطماط موجود .. احنا نبغى نغير بس مابيدنا .. واخو زوجي مايقصر دايم يسأل إيش ناقصكم .. وامه تقول طماط او بصل يعني اشياء اساسيه .. وتجي ايام او اسابيع الثلاجه فاضيه ماتقول لولدها تقول لزوجي ولدي عزوبي وانتوا متزوجين يعني لازم تجيبوا مقاضي البيت وزوجي في نفسه يقول احنا ندفع من رواتبنا لاخوي وهو المسؤول .. بس لو اخوه يجي ويشوف الثلاجه فاضيه يتهاوش مع امه ليش ما تعلميني .. انا اقول في نفسي يمكن لما يكون لي بيت لوحدي اتغير واقدر اطلب من زوجي على عددنا واتغير بعدين. . بس ايش رايكم .. وايش تنصحوني .. ومن فين تكون نقطة البدايه وشششششكراً لكم ♥