محتاجه مشورتكم بموضوعي الاشراف التربوي

بسم الله الرحمن الرحيم

عندي مشكله مسببه لي قلق في حياتي مع زوجي مده زواجنا اكثر من 15سنه وزوجي محافظ لكن تغيرت حياتنا من تغير عمله

مجال عمله في الاشراف التربوي

وطبعا معروف صار في دمج بين اقسام البنين والبنات

يعني في تواصل بينهم وانا متأكده من هالشي مع انه مضايقني بس ساكته

لكن اكثر من مره اكون معه مستأذنه من دوامي وتجيه اتصالات احساسي يقول انها مره واسأله يقول ايه شسوي اللي بالمكتب يعطونهم جوالي بخصوص العمل طبعا

واعصب ويقنعني ان يحاول مايرد عليهم الا بالايميل ويتجنبهم لكن رئيسه يحولهم عليه وصارت مشاكل كثيره منها صديقتي قالت لي شفت وحده مشرفه وجبت طاري بنتك وقالت اي فلان بنته (....) ودنا نشوف شكله
وواجهته وانكر وقال انا برئ ولا لي دخل فيها طيب ايش عرفها بإسم بنتنا !!!

ودائما كلمته انت ماتبين تصدقيني واذا صار غصب عشان العمل

من فتره جاه اتصال من شخص يبي منه خدمه ورد زوجي (بكره بكلمها واسألها)
وانا كنت قريبه وسمعته وهو يدري اني اسمع

ثاني يوم شفت جواله قدامي وفتحته واشوف مخزن ارقام المشرفات استاذه /.... واستاذه/........

طبعا انفجرت ماقدرت اتحمل وكلمته على طول وقلب السالفه علي ليش تفتحين جوالي
قلت موضوعنا الاساسي وصلت انك تخزن ارقام حريم وزوجي من النوع الحكر مو اي شي عنده عادي

ايش تتوقعون رده على التخزين !!!

قال عشان اذا اتصلو علي ماارد عليهم

طبعا مو مقتنعه ابدا ولاصدقته الى هاللحظه وقام يحلف انه يفقد عياله اذا هو يكذب

حتى انا في مجال عملي فيه اختلاط لكن مااسمح لهم عشان هو اعرفه مايرضى

ومحترمته بحضوره وغيابه

ابي منكم تشورون علي ايش العمل النار شابه بقلبي

ومنقهره

احيانا اقول اسفهه ولا ابين اني ميته عشان هالموضوع

واحيانا اقول لازم احط حد

لو انا اللي مخزنه ارقام رجال كان ذبحني

ايش تنصحوني💔💔💔💔💔