محتاجه مواساتكم يابنات ديرتي

السلام عليكم ورحمة الله وبركاته

اكتبلكم والدموع ماليه عيوني مر علي شريط ذكرياتي من اول ماخذت شهادتي الثانويه وكان وقتها تقديري ممتاز ونسبتي 97ونص اخذتها بجهدي واهتمامي على اساس اني ادخل التخصص اللي اتمناه وهو تربيه خاصه لكن للاسف تم رفضه من اهلي لاني بتزوج واحد عايش بمدينه مافيها هالتخصص وانا كنت بنقل معاه فااظطريت ادخل تخصص مااحبه ودخلت عربي وبعد ماتزوجنا زوجي جته بعثه وسافر وانا جلست اكمل عند اهلي يعني لو داخله التخصص اللي ابيه كان احسن بس خيره
وتخرجت من قسم العربي بتقدير جيد وسافرت لزوجي وقدمت على ماجستير وقبلوني وفرحت لان برا يقبلون جيد عادي وللاسف صارت ظروف ورجع زوجي وراح حلم الماستر:44:رجعنا لمدينة اللي فيها زوجي وقدمت على قراها مع ان الامل ضعيف لان كلها واسطات
مرت الشهور وقررت ادخل معهد حاسب سته شهور وشديت حيلي وعديته وخلصت ومابقى الا اختبار المؤسسه النهائي يكون بعد انتهاء الدوره بكم اسبوع مادقوا علي وفاتني الاختبار والسبب اسمي سقط سهوا!!! وقالو لك كذا فرصه لاتخافين وقبل اسبوع جا اختبار المؤسسه وفاتني للمره الثانيه والسبب اني كنت تعبانه ومقفله الجوال اليومين اللي دقوا علي فيها ولاتوقعتهم يتصلون لان قبلها كنت داقه عليهم قالولي شكل المؤسسه مطوله
للاسف تمنيت ادخل هالشهاده مع جداره لافتح لكن مالي نصيب وخايفه لاختبرت المره الثالثه وطبعا بعد كم شهر توها مطوله ناسيه كل اللي درسته:angry:الله يسامحهم ويعوضني

تعبت يابنات وازديكم من الشعر بيت فيه دوره مهمه محتاجينها بمدينتنا لها علاقه بالطفل دقيت على القائمين على الدوره وقلتلهم احنا مجموعة بنات من المدينه الفلانيه نبي هالدوره قالو نجي من الرياض لكن بشرط يكون عدد البنات فوق 25 لكن للاسف ماقدرنا نجيب العدد المطلوب والغوها:mad:بعد تعب واتصالات وروحه وجيه

لو واعوذ بالله من كلمة لو دخلت تربيه خاصه كان توظفت رياض اطفال برضو كلية اعداد معلمات الابتدائي او فنيه او علم نفس

تخيلو يابنات كل هالتخصصات بوقتي كانت بحاجه لها المنطقه اللي فيها زوجي بس ماكنت اعرف لاني من اهل الرياض
والحين توهم يفتحون هالتخصصات:44:

ماستر وضاع مني معهد وماتيسرت امور الحصول على الشهاده دورات ثانيه وربي ماكتبها لي على كثر ماراكض وراها
ماتوفقت بشي مع اني انسانه طموحه


اكتبلكم لاني حيل متحطمه الكل يقولي انت عربي وتقديرك جيد انسي التوظيف:(حتى مدارس اهليه مافيه عندنا الا اربع مدارس ومكتفين

يابنات قعدة البيت تعب نفسي خاصه لاصار كل قريباتك موظفات الا انتي:44:ومالي احد بهالمنطقه كل ناسي واهلي بالرياض

الحمدالله انا راضيه ربي ياخذ شي بس يعوضنا بشي احسن
هذي مجرد فضفضه لاني مااحب اشكي لااحد الارب العالمين ثم حبيت اشكي لكم خاصه اننا نمر بوقت تقديم وحافز واشياء تضيق الصدر

خلونا ندعي يابنات ان الله قادر على كل شي عسى الله لايحرمكم الوظيفه فالله لايعجزه شيئ

^_^ اعذروني لو طولت عليكم او مللتكم
محتاجه دعواتكم لي ولبنات المسلمين:26::26::26: