محتاجه نصايحكم بالافضل الله يسعدكم

السلام عليكم،،، مسائكم خير يارب

بنات انا تخرجت من الثانويه بنسبه حلوه ودخلت كليه قسم علمي وكنت احب هذا القسم لكن من دخلت الكليه انقلبت حياتي التفوق والنشاط اللي بالثانوي اختفى اكره اروح الكليه الاختبارات مااحضرها كل مااتذكراحزن ع نفسي لكن الحمدلله ع كل حال طبعا درست مستويين وكنت حامله مواد معاي وانخبطت اهلي لما شافوا مستواي كذا وافقوا قالوا اذا بتكملين كملي بعد الزواج وتزوجت وداومت بعد الزواج اسبوعين تقريبا لكن مازالت الحاله اكره الكليه وابكي بمجرد التفكير فيها وتركتها و كل ماجيت اقدم اعتذار او تأجيل شي يردني عنها واكره دخولها طبعا من اول ماتركتها حسيت راحه نفسيه غريبه ولا ابي احد يذكرها قدامي بعد سنه فكرت اكمل ورفض زوجي وانا اقنع فيه و فالاخير وافق وبمجرد ماوافق راح كل الحماس وتضايقت وندمت اني فاتحته بالموضوع وسكت ماعاد جبت طاري دراستي بعد اربع سنوات رجعت قلت لزوجي بكمل ورررفض علشان اولادي ويقول موناقصك شي وابغى اجي البيت الاقي زوجه تستقبلني ومن هالكلام وانا احاول فيه واقنعه تععععبت المهم قبل اسبوع قلت له بكمل دراستي وقالي ابشري بس انتظري هالفتره لانه يمر بظروف بس المشكله من اول ماوافق ندمت اني فاتحته بالموضوع وجاني الكره للكليه والضيقه وانواع النكد مدري اش السالفه وصراحه سكت عن الموضوع ماعاد قلت له شي خايفه يابنات اتفشل قدامه واروح الكليه ومااستمر وترجع لي الحاله اللي قبل الزواج كنت ابكي وابكي وابكي من الكليه وبدون اي سبب... وجاتني فكره فكرت ادخل تحفيظ قرآن وبنفس الوقت نفسي في الدراسه!! قولوا لي الافضل وكيف اتغلب على مشكلة الضيقه من الكليه

للمعلوميه الحمدلله زوجي مومقصر بشي وانا مالي هدف محدد من اكمال دراستي بس اتحمس اذا تكلمت مع صاحباتي وكذا وتخيلوا لي مكافئه 12 الف حقت المستوى الثاني مااستلمتها ونزلوا اسمي بالجامعه ومع كذا مارحت استلمها بمجرد التفكير فيها اكرهها واحسها ماتسوى شي والله لحد الآن لها اكثر من اربع سنوات مااستلمتها
طبعا اول مادخلت الكليه ماكان فيه حسابات بالبنوك كانوا نهاية السنه يعطونا 12 الف حقت السنه كامله يسلموناها كاش

و الدراسه عن بعد ماحبيتها لان اقسامها مو حلوه ولا احب الحفظ
يارب تكتب لي الخيره في هالموضوع قبل كنت اشوف ان رفض زوجي لدراستي خيره لكن بعد ماوافق تلخبطت افكاري