محتاجيتكم خصوصي بنات المدينة الله يوفقكم.. ريحولي بالي..

السلام عليكم جميعاً خواتي:

أنا عرضت مشكلتي هون بالمنتدى مبارح وفادوني البنات ونصحوني الله يوفقهم كلهم، بس بدي اسأل عن شوية أمور بتهمني وبتصور انو لازم اعرفها فيا ريت تتحملوني لانو مالي غيركم..

قصتي اللي حكيتها سابقاً وباختصار: أنا سعودية من إحدى قبائل المدينة المنورة، امي أردنية، انفصلوا ماما وبابا وأنا صغيرة، ماما رجعت عل أردن وبقيت أنا وأخي فترة معها بموافقة بابا، بعد ما كبرنا شوي بابا كان بدو يرجعنا أنا وأخي ع سعودية.. أخد أخي وسمح إني ابقى لانو كنت كتير متعلقة بماما..

هلأ أنا بالجامعة.. بابا تزوج بالسعودية.. وماما خلص أكيد رح تتزوج بعد فترة قصيرة كتير.. فمشان هيك بابا بدو إياني ارجع ع سعودية مشان ما ابقى مع زلمة غريب.. ما في مجال انو ما اقبل.. بعد أكمن يوم رح ارجع غصبن عني..

المشكلة انو كل حياتي كانت بالاردن ومن وقت ما طلعنا من السعودية ما رجعت إلها ولا بعرف عنها أي شي.. (لما طلعنا ما كنت مطبقة سنة).. وهلأ لسا ما خلصت دراستي الجامعية ورح أروح ع مجتمع جديد بختلف شوي عن اللي عشت فيه بالعادات والتقاليد وغيرو، ورح اشوف أهل بابا اللي ما عمري شفتهم وما بعرف كيف رح يكونوا معي.. بابا قال انو رح اسكن معو ومع مرتو بس أنا خايفة ما تكون منيحة.. أخي كان ساكن عند تيتى ام بابا هو هيك بدو..

أسئلتي بنات الله يخليكم:

*برأيكم وين الأحسن اسكن عند بابا ولا اطلب منو اني اسكن عند تيتى، انصحوني؟
بابا في بيتو هو ومرتو واختي الصغيرة من بابا وخدامتهم،
وتيتى ساكنة مع خدامتها وعمي أصغر واحد وأخي (من إمي وأبي بس هو هلأ برا السعودية بكمل دراسته) / (عمي ما بعرفو لهلأ ولا بعرف شكلو.. وتيتى كنت احكي معها عل موبايل بس بالمناسبات متل الأعياد ورمضان..)

*وأنا بالأردن لما اطلع برا البيت بلبس جلباب وإشار، أو بروتش وإشار.. يعني لبسي طويل ومستر الحمد لله، بس ما بعرف بنفع ألبس هيك بالسعودية فيها مشكلة؟ ولا لازم عبايات سودا؟ مشان أشتري لانو ما عندي؟

*ولازم أغطي وجهي؟ ولا مو شرط بكل المناطق؟

*رح ألاقي عنصرية بالجامعة مع الناس الغريبين عني إزا عرفوا إنو ماما أردنية؟

*وكيف لما أوصل أسلم على الكل من القرايب ولا بس عل بنات قصدي اولاد اعمامي اسلم عليهم؟ أكيد مو بالايد، قصدي سلام عادي بالحكي، ولا ما بصير أو عيب هناك، ما بدي حدا يحكي علي! يمكن البعض يشوف أسئلتي سخيفة بس أنا راسي رح ينفجر من كتر التساؤلات والأفكار اللي بتيجيني أنا أسفة والله..

يمكن بعض الأسئلة رح تحكو ليش ما تسأليها أخوك أو أبوك.. بس أنا مو متعودة عليهم والله.. وبابا زعل مني وعصب لدرجة إنو رح ييجي واحد من اعمامي لياخدني مو بابا! لانو عاندت بالبداية وقلت إني ما رح أرجع ع سعودية لو شو ما صار.. وعندي أسباب وتفصيلات تانية كمان بحب احتفظ فيها لنفسي..

خوفي سببه اني رايحة ع مكان جديد ما بعرف عنو شي.. أنا كتير بحب السعودية.. صحيح ما عشت فيها بس دايما بقول بكل فخر إنو أنا من السعودية ومن مدينة الرسول عليه السلام.. بحبها كتير والله.. بس ما كنت حابة اترك ماما لاني كتير متعلقة فيها وهي متعلقة فيي.. بس متل ما نصحوني البنات امي لازم تشوف حياتها كمان بعد ما ربتني وتعبت علي..

بابا وماما كانو ساكنين بجدة.. بس هلأ بابا مقيم بالمدينة المنورة مدينتو الأصلية واللي فيها أهلو.. ماما كانت تحكيلي عن الحياة بجدة، بس هي بتختلف عن حياة المدينة وبعد 20 سنة تقريبا أكيد الوضع اختلف هلأ.. مشان هيك مالي غيركم ليجاوبني ع هل أسئلة..

شكراً كتير والله ينول كل وحدة بتساعدني كل يلي ببالها.