محتاج مساعدتكم ورأيكم

٢٠ مشاهده ولا رد واحد !!

السلام عليكم ورحمة الله وبركاته
الله يسعدك ياخالد وييسر أمرك ويصلح أمرك
شوف يالغالي، قبل ما ابدا بأي شي، بعض الاحيان مانقدر نحكم على انفسنا
فنحتاج غيرنا يحكم علينا، فبقولك تأكد لو انك مو مقصر معها بشيء، ويمكن تحتاج تتأكد منها ماهو منك
بإنك تسألها مثلاً، لو انك مقصر معها، حتى تعرف شخصيتها ونفسيتها، هذا اولاً، وقبل ما ابدأ بأي شي
وهذا الكلام مثل التأمين، على ان فيه احتمال فيه شي غلط، لعله يتصلح وتبدا الامور تتحسن بينكم
أما بعد :
الناس شخصيات، للأسف الشديد فيه شخصيات تحتاج اكثر اجتهاد من غيرها من الشخصيات
حتى تفهمها، وتبدا تعرف تتعايش معاها وتاخذ وتعطي معها، ففي موضوع الرفض والعناد
لعلك تلقى طريقة تناسب، بما انك اخبر بمرتك، ومايمنع فرض السلطة بطريقة مناسبة وذكيّة
من حين إلى اخر، بطريقة مناسبة وذكيّة مرة اخرى
تذكر شعرة معاوية، إن شدت الشعرة الي بينكم لاتشدها معها
وإن ارختها، تقدر تشدها، اهم شي الشعرة ماتنقطع
مسألة الطبخ، للاسف، ماعندي رأي مفصّل في هذا، لقلة الخبرة
لكن لعلك تمدح طبخ احد فتغار، لعل هذا ينفع، الله اعلم
اهلها، سو الواجب عليه، والمندوب مانت مجبور عليه، وحاول تهجرهم هجراً جميلا
وياليت تتاكد لو كان فيه شي يجعل تعاملهم سيّء، بعض الامور تخفى علينا، فنظن ان مافي سبب
ولو كانت هذي طبيعتهم، حاول تفهم شخصيتهم وتتعامل بطريقة تناسبهم، ولاتفعل المندوبات فيتعودوا عليها
دامهم ماهم مقرّين بأنها مندوبة، يعني أمر تثاب عليه لكن ماتؤثم بتركه، شي من فضل الله ثم فضلك يعني
فعليك بالواجبات، واهجرهم هجراً جميلا لو يزعجوك
اما برود زوجتك، فخذ أهم نصيحة في هذا الموضوع
انتظر وقت، تراه مناسب، مافيه الا انت وهي لايشغلك دوامك ولا دوامها ولا عيالكم الله يصلحهم ويفرحكم فيهم
وفي هذا الوقت اجلسوا وتفاهموا، جلسة مصارحة مهمة، لازم تحصل، لازم تحصل
تجلسون وكل واحد يكّب الي عنده، ايش الي يضايقه من الثاني، حتى لو تزوجت الثانية، فبيجي يوم تحتاج هالجلسة
هذا شي طبيعي، احنا بشر، ونحتاج نتعايش وبعضنا يفقد الطريق الي يوصّله للتعايش مع الطرف الاخر بسلام
فلازم نعرف كيف نوصل لهذي المرحلة، التفاهم والتعايش بين طرفين
فاجلس، اجلس مع كريمتكم وتفاهموا، وصارحها بكل الي يضايقك
ولو ترتب كلامك قبل الجلسة فتعرف كيف تختار كلمات توضح مقاصدك بافضل طريقة ممكنة
فبتكون سويت عين العقل، وفي هالجلسة لازم تجبرها عليها لو رفضت دامها تعاندك مثل ماذكرت
لكن بحيلة ذكيّة ومناسبة
ثم، حاول مره ثانية لو الجلسة ماجابت نتايج تعجبك او نتايج مستمرة
ثم ثالثة، إلى ماترى ان الامور ماعادت تنفع (وحذاري انك توصل هالمرحلة قبل وقتها، حاول بكل شي قبل ماتوصل للاستسلام)
واذا شفت ان الحال ماعاد ينفع معها، اهجرها دون طلاق، ودها في بيت اهلها شهر
لاتسمع منك حس ولايوصلك منها الا حقّها من المصروف وغيره، وكيف تبدا بهالمرحلة؟
خلني اخبرك..
لازم طبعا تشوف طريقة مناسبة ومحترمة، إنتبه تهين، إنتبه تهين.. لازم طريقة محترمة ومناسبة، وذكيّة
لان الطريقة هذي تتمحور حول النفسيّة فلا تخربها بإهانة، او شتايم او هجر قبيح، لازم تكون بأفضل صورتك
في اسلوبك وتعاملك، حتى كل يوم تتذكرك فيه وهي في بيت اهلها تعرف انها ظالمتك، وتتذكر معاملتها معك
فبطريقتك المحترمة المناسبة، تخبرها تروح لاهلها، وتاخذ اغراضها، وتقول لها انك حاولت تصلح الامور بينكم
لكن ماعاد ينفع، وانها لعلها تريّح شوي عند بيت اهلها لين تشوف حل لهذي المشكلة، او انها تعقل وتقوم بواجبك
فتقابلك وتقوم بحقوقك، وانها لو بغت العيال، فيمديها تاخذهم بعد (لاتهاوشها عليهم، تذكّر انها شهر تقريباً بس)
ولكن حذاري، ثم حذاري، ثم حذاري.. تجيب طاري الطلاق، لو هي سألتك وجابت طاريه قل لها انك ماجبت طاريه حتى
فمايحتاج تفكر ان الموضوع متجه لهذي الناحية، اذا قالت ليش تجلس مطولة عند اهلها وغيره، قل لها تجلسين إلى ماتحلين الموضوع هذا وتقومين بواجبك وتعرفي إيش هو واجبك اصلاً، ولاتزيد على سبب غير هذا، ان السبب انها ماتقوم بالواجب، وانها بارده ولاتعاملك تعامل الزوجة الحنونة، إبقى على هذا السبب فهذا مهم،
ثم، لو اتبعت الطريقة وصار هذا، لعل بعد شهر تنحل الامور، ولو كلموك اهلها عن وجودها عندهم
فلاتكثّرلهم عن سواياها، اختصر عليهم بانها ماتقوم بواجبها، وانها ماتقابلك وتعاملك معاملة طيّبة، وانها عندهم عشان تغير جو، إلى ماتقتنع بانها لازم تعدل من تعاملها وتقتنع بان فيه واجبات لازم تقوم بها

هذا رأيي، لعلك تأخذ به، او ان رأيي يعطيك فكرة أفضل
الله يصلح بالنا وبالكم ويجزاكم خير، لو تبحث عن كتاب يعلمك كيف تتعامل مع زوجتك، وتقراه، يكون زين


أرجو أن إطالتي للكلام كانت مفيدة.