محتارة و خايفة

صباح الخير 💕
بصراحة سجلت في هذا المنتدى طبعاً من بعد ما قرأت فيه استشارات البنات و الردود العقلانية من الأعضاء الافاضل


اولاً انا بنت عمري ٣٠
تقدم لي شاب يقرب لنا الكل يشهد بأخلاقه وطيبته
كنت جداً متخوفة من موضوع الزواج ، خصوصاً ان في مجتمعنا انا موظفة الحمدلله معتمدة على نفسي وعايشة حياتي ، ما فكرت في يوم ان الزواج راح يضيف لي لان اعرف انه قسمة ونصيب
المهم تعرفون البنات دايماً يكون عندهم تصور في مخيلتهم عن الشخص اللي بيكون فارس احلامهم! 😅
وانا كنت من هذا النوع
بس الشخص اللي تقدم لي مافيه هاي الصفات (الشكلية)
اعرف ان الشكل مب كل شيء لكن يبقى مهم!
المهم يا بنات
يوم صارت النظرة الشرعية انا توترت وخفت ومن بعدها على طول خبرتهم اني ما ابغي ارتبط
طبعاً اهلي زعلوا لان عندهم ان الشاب ما يتفوت وخبروني اني اعطي نفسي فرصة ثانية وارجع اشوفه
انا وافقت ، وكنت استخير كل وقت ولزمت الاستغفار وتوكلت على الله
في اليوم اللي شفته بعدها استلطفته حتى اني خبرتهم اني موافقة بدون اي ضغوطات (طبعاً الكل يقولي هاي اجابة الاستخارة)


بعدها لما حددنا موعد الفحص رجع لي الخوف والتوتر وكنت متوكله على الله ، المهم ان الموضوع تم بشكل سريع جداً وانا كنت كل يوم الخوف والتردد يزيد عندي ، حتى كنت اخبرهم اني خلاص مابي ارتبط 🤦🏻‍♀️ للامانة هو مب بشع بالعكس هو شكله مقبول ويميل شوي للوسامه بس مب الصوره اللي كانت في بالي
المهم اهلي خبروني ان حددنا موعد الملكة ومافي مجال للتراجع، اللي فيك خوف طبيعي راح يختفي لما تتعرفين عليه اكثر
طبعاً احنا في مجتمعنا فترة الملكة اهيا تعتبر فترة للتعارف ، تصير فيها زيارات وطلعات
المهم انا اللحين صار لي شهرين من ملكت
في ايام اكون سعيدة وفي ايام يرجع لي التوتر واتم افكر في شكله انه مب الشكل اللي تمنيته، مع انه طيب معاي وانا بالعكس لما اكون معاه اخذ واعطي كأننا اصدقاء ، للامانة مافي بينا حب او هالمشاعر لان تونا نتعرف على بعض


بس حبيت اعرف هل وضعي طبيعي؟
هل بيي يوم بحب خطيبي وما بشوفه انه ما يعجبني شكله او مب اللي تمنيته؟
بنات اذا وحدة مرت باللي مريت فيه تفيدني الله يخليكم 💕