محتاره ومحتاجه نصايحكم فلا تبخلون بها علي

انا متزوجه وعلاقتي باهل زوجي الحمد لله تمام ودايم اجتماعات وعزايم وزيارات وكل وحده تساعد الثانيه يعني كاننا خوات طبعا كلنا حريم العيال

اما البنات الي هم عماتنا علاقتنا فيهم عاديه جدا لانهم يسكنون بمنطقه ثانيه ولا نشوفهم الا بالعطل يعني علاقتنا فيهم سطحيه بس كويسه

المهم حريم العيال الي بمنطقه وحده 4 وانا الخامسه وكلنا الحمد لله تمام مع بعض

قبل فتره صارت بيني وين اعز وحده منهم الى قلبي سوء فهم طبعا كنت انا اكلمها بالتلفون وكننا نتناقش عن السالفه الي صارت بيننا فجاه مالقيت الا لقيتها مسكره التلفون بوجهي وكانت شابكه على الماسنجر حولت اكلمها ولا ردت علي برضو رجعت دقيت عليها بالتلفون ولا ردت علي هذا طبعا كله من غلاتها عندي ومن بكره طلعنا للاستراحه العائليه طبعا الكل موجود اول مادخلت للاستراحه لقيتها تتمشى بالحديقه رحت ابي اكلمها واول ما شافتني قالت لي خلاص انتي مره عمنا وبس
المهم انا سكت انا من النوع الي ما اتكلم حتى لو احد جرحني بكلمه اسكت واذا رحت للبيت سكرت علي غرفتي وجلست اصيح
وفي الاستراحه مرره احرجتني بين الجماعه كل ما اجيت اشارك باي سالفه ولا اتكلم باي موضوع والا اعلق على شي تقولي ""لا والله "" "اقول خلاص اسكتي" "ايه ايه ايه تقولها باستهتار" يعني سببت لي انواع الاحراج بين الجماعه وحده من حريم العيال تقول وشفيكم والثانيه تقول شفيكي عليها والثالثه تضحك وانا اتبسم واسكت وكنت ابغى بس اطلع اروح لبيتي بس قلت لو بقول لزوجي بتكبر السالفه بين الرجال وبتصير هوشه وتفرقه قلت خليني ابلع لساني واسكت والله اني طول الجلسه جالسه وانا خانقتني العبره
ومن بكره كنا طالعين نتمشى انا وزوجي دقت علي بالجوال وقالت طالعين قلت ايه ما امداني اقول ايه الا صارت تتكلم وتهزا بعدين سكرة الجوال يعني هذي ثاني مره تسكره وانا ما استوعبت الموقف وزوجي عرف انه فيه شي بيني وبينها طبعا سمع من مكالمتها كل شي قلت مافيه شي قالي الا فيه شي اجل ليش تسوي هالحركه المهم حس ان العبره خانقتني سكت وقال بعرف مع الايام

مشت الايام وصرت انا اتحاشى اروح للاستراحه الا للمناسبات واذا رحت اجلس كاني غريبه ما اتكلم لانها تاخذ المجلس بصوتها العالي وهذرتها الزايده

ومره جت وحده من عماتنا واعزمتها على القهوه وطبعا اعزمت كل حريم العيال وانا برا القائمه وبعدين صارو دايم يجتمعون مع بعض ويعزمون بعض ويتفقون مع بعض ويطلعون منتزهات او يسيرون على احد من الاقارب وانا برا الحسبه مع اني اول اذا كنت ابي ازور احد من اقاربنا ولا بقهوي احد كنت ادق عليهم وحده وحده واقولهم واذا كانت وحده مشغوله اكنسل روحتي واخليها يوم ثاني

حتى بنتي صارت تحس وتقول ليش يا ماما ما تجين واذا برحون للاستراحه يترجوني علشان اروح معهم
ومره كانوا الابهات بيسون نجايح العيال بالاستراحه وكانو البنات بيسون مسابقات ومشاهد المهم كانت بنتها ما بعد ادرست فكانو الي يدرسون هم الي يزينون الحفله وكانت بنتي اصغر وحده من الي يدرسون كانت 2 ابتدائي والبنات مارضو يخلون بنتها تشارك بالاشياء الرسميه بالمسابقات وكانو كل البنات مجتمعين بيت عمنا الكبير علشان يجهزون لحفلتهم الا امها تدق على مرة عمنا وتسولف معها وقالت لها عطيني رنيم الي هي بنتي الا هاتك تهزي وسكرت التلفون بوجها مثل ما سوت معي والله رنيم صارت تصيح وتقول انا وش سويت هذا كله من ضيقها علي طبعا عرف زوجي وقال والله لو تسوي هالحركه مره ثانيه لاخلي اخوي يعفسها بس انا هديته وقلت ما تسوى وكنت بهالحفله انا تعبانه وكنت ببدايه حملي ورحت للمستشفى بعدين سيده على الاستراحه بس علشان بنتي انه حفلتها وتبيني احضرها وكلهم قالو شكلك حامل لانه انا يبين علي علطول التعب وهي ولا كلمه وطبعا من بكره ولا احد يتصل يسال عن الاخبار
وبعد فتره اتفقو كلهم وطلعو لشاليهات اليمامه طبعا بنتي كانت معهم لان بنات عمها يحبونها ودايم يزعجون ابوها علشان يجيبها برضو سوت حركه ثانيه مع بنتي كانت بنتها تقول نبغى نسبح وبنتي ردت عيليها قالت لا مو الحين الحين عماني يقولون بروح ما دري وين بعدين بيسبحونا وامها جالسه تسمع قالت خلاص خلاص رنيم لا تجلسين تراددين بنتي رنيم سكتت وراحت

زوجي شاف انه العلاقات بدت تتفكك راح جمع اخوانه وقالهم الحريم بينهم خلاف وهالشي بياثر على عيالنا وانا بسوي صلحه بيتي قالو الرجال خلاص بصراحه انا فرحه طفشت من المقاطعه وكان هالشي بشعبان قلت علشان يجي رمضان والنفوس متصافيه
وجو للعشاء وكنت مجهزه كل شي الحلا والفطاير والمكسرات وكل شي الا العشاء قال زوجي انا بجيبه من برا علشان ما انشل كثير واجلس معهم واستقبلتهم بصصدر رحب وتكلمت عادي جدا وكانو توهم جاين متمشين مع بعض وماخذين عمره وباركت لهم بالعمره وكانت كل سوالفم عن تمشيتهم وش صار فيها طبعا انا جلست مستمعه لاني ما كنت معهم وحده من حريم العيال قالت لي على جنب حلوه المبادره بس كيف نفتح معها الموضوع قلت انتي خذيها لاي غرفه وتكلمي معها بعدين ناديني قالت طيب وبعد العشاء نادتها للغرفه وهي ما كانت تبغى تروح بس الحرمه الثانيه اصرت انها تجي وراحت لها دقايق بس الا وهي راجعه وطبعا جلست تكمل تقليب بالقنوات وهي معصبه شوي الا زوجها قال يالله عرفت انها جايه مغصوبه وانها ماتبي الصلح وراحت وجلسنا حنا وسهرنا مع بعض وكانت سهره حلوه
ومه عمنا الي كلمتها تقول ياليتني ما كلمتها تقول لاحد يتدخل ومدري وش قالت لها بعد بس ضيقت صدرها بردها وتقول ليش الرجال يتدخلون قصدها زوجي

وبنص الليل اتصلت علي وقالت انتي وش تبين قلت انا ما ابي شي بعدين قالت لي قولي الي عندك قلت انا ما ابي الا الصلح ورمضان جاي ابي النفوس تتصافى قالت طيب وش دخل الرجال قلت زوجي ما تدخل الا ليصلح ويكسب الاجر انه اصلح بين شخصين قالت زوجي جابني غصب قلت عارفه من طريقتك الي انتي جاي فيها قالت طيب ليش ما اتصت علي تباركين لي بالعمره وقلت انتي طيب ليش ما اتصلتي علي تشوفين وش انا مسويه بهالعطله مع الحمل والتعب
قالت يعني انتي ماكنتي تبين هالصلحه تصير قلت الا وايده زوجي عليها والدليل اني ما خليت شي ما جهزتو وقلت بالعكس انا ودي نرجع زي الاول واكثر قالت طيب ليش ما جيتي وطقيتي على بابي قلت وانا وش بيدريني وش بتكون ردت فعلك قالت طيب مع السلامه قلت لها مع السلامه

بعد فتره اتصلت علي علشان تسولف سولفت معها عادي جدا وبعد يوم انا اتصلت عليها وسولفت معها ويوم جت روحت الاستراحه اخزت معي عزبتي وحلاي ورحت بس حسيتها ماتبغى تتكلم معي واي موضوع اتكلم انا فيه هي تسكت بعدين صرت ارسل لها رسايل بالجوال دعاء وصلح وكانت ترد علي بس قليل ومره كلمتها وكانت عند ناس قلت لها خلاص اكلمك بوقت ثاني وبعدين دقيت عليها ولا ردت علي وارسلت لها مباركه برمضان وبرضوا ماردت علي عرفت انها ماتبي هالصلحه تركتها

وصارو يجتمعون برمضان بالويكند بالاستراحه يتسحرون بس انا ما اروح وافطرو مع بعض بس انا ما رحت مارحت الا مرره لسحور بس بعد ما زوجي الح علي رحت والله وانا مالي خلق وجلست وانا ضايق صدري وزوجي عرف لانه كل شوي يشيك علي وقال يالله خلينا نوح للبيت بس قلت له دامنا جينا اصبر على الاقل علشان بناتي ما يتضايقون

ومن بعد العيد ما شفتهم مع انهم يجتمعون مع بعض بس ما يقولون لي

وللمعلوميه هم كلهم اصلهم من منطقه وحده وحتى زوجي واهله وانا الوحيده بالعايله الي من منطقه ثانيه اقول يمكن هذا هو السبب

طولت عليكم بس والله احس اني مخنوقه وتعرفون الحمل وكابته والتعب تزيد الطين بله

انتظر ارائكم