محتــارهـ ومتأكدهـ عنـــدكم الجــواب .. الله يرزقكم الجنه تدخلون

السلام عليكم ورحمه الله وبركاته


مــســــاء الخيـــــر لجميع الاخوات بالمنتــــــدى ,, بدايه حابه اقول انه هذه اول مشاركه لي بالمنتدى بس هذا ما يعني اني جديده انا متابعه قديمه جدا لعالم حواء وفخوره فيه وبكل الي فيه ويمكن ما سجلت الى الحين لاني شفت اني استفدت اكثر مما كنت راح افيـــد ... ولكن الان انا امر بموضوع حساس بحياتي ومحتاجه وقفتكم ومساعدتكم ومشورتكم وما خاب من استشار .. ,,



بدايه انا فتاه لي من العمـــر 25 سنــهـ متخرجه تقريبا من سنتين من قسم بكلوريوس حاسب الي , عملت بمدرسه بعقد لمده هالسنتين وهالسنه ولله الحمد والمنـــه ترسمت وتوظفت حكومــي , في فتره وجودي السنتين الي فاتوا بالمدرسه تعرفت على معلمه واصبحت من خيرة الاصدقاء لي وهالانسانه قبل اسبوع تقريبا كلمتني في انها تريد خطبتي لاخيها وقالت لي وحلفت والعهده عليها بانه شخص خلوق وطيب وعشان كذا كانت فخوره تخطبه لي وسعيده ..

تقدم على طول الشاب واخوه وابوه وخطبوني رسمي من الوالد , والوالد الان في بحث جاري للسؤال عن اخلاقيات الولد وسلوكياته للحين سأل شخصين قالوا بان ظاهره شخص طيب ومحترم ولكن بما ان المسأله زواج راح يسهبون في السؤال عنه عن صلاته وعن اخلاقه ويردون للوالد بعد يومين ..


انا يمكن عرفتوا تقريبا مواصفاتي اضافه بلا فخر الى اني فتـــــاه على قدر عالي من الجمـــــــال وخطبني كثير كثير ولكن ما صار نصيب لدرجه ان خالاتي صاروا يتخيلون انه مستحيل كل الي خطبوني فيهم عيب اكيد انه انا دلوعه واتشررط وانا والله مو كذا ابداا بس سبحان الله ما يصير نصيب يطلع في الخاطب عيب صريح ومو شوي بس الله يهديهم هما هزوا ثقتي في حظي لدرجه حسسوني اني منحوســه او اني عايشه بعالم ثاني .. الحين انا قلت لكم هالشي لانه مأثر على نفسيتي واخاف يأثر على قراراتي ..

الحين الشخص الي خطبني يفوقني بالعمر بقرابه 9 او عشر سنوات يعني تقريبا للحين عرفت ان عمره 35 او 34 سنه تقريبا هو مو خريج بكلورويس خريج ثانويه عامه يعمل مدير قسم بقطاع خاص ,راتبه صراحه للحين ماعرف شخص قال انه وظيفته زينه وله بدل سكن والوالد يقول ان القطاع الخاص يخوف ممكن يستغني عن هالشخص باي وقت غير ان راتبه للحين ما عرفت عنه وعن ظروفه الماديه اي شي , طبعا اخته تقول انه تأخر بالزواج لانه ما صار نصيب وتوه توظف من 4 او 5 سنوات .. طبعا للمعلوميه أنا من قبيله وهو من قبيله بس مو بعاد عن بعض كثير والصراحه ان قبيلته واهله الكل يذكرهم بالخير ومعروفين بطيبتهـــم ..


انا يا اخوات جدا محتــــــــــــــــــاره ما اعرف اذا الاشخاص الي يسألهم الوالد عنه ذكوره بالطيب اوافق ؟؟ أو انه لا يزال عدم التكافؤ العلمي , وعدم وجود تقريبا الامان الوظيفي , وفارق العمر راح يشكل عائــــــــق أو لااا ؟؟


والله محتاره مره مره مره , كل شوي استخير وكل شوي ادعي صارت الاستخاره اكثر من الفرض نفسه والبارح كانت نفسيتي مره تعبانه والضيقه والله بتذبحني ..

والي يحفظكم ويكتب لكم العتق من النار والسعاده بهالشهر الكريم تدعون لي وتساعدوني بالمشوره واتخاذ القرار انا اخواتي كلهم اصغر مني وخالاتي الله يهديهم احسهم يبغون يزوجوني وبس ووالدتي كذلك .. عشان كذا مافيه احد بيساعدني باتخاذ القرار غير الله ثم أنتـــــم ...


الله يكتب اجركم ويجزاكم كل خير ..


اختكم / أمنيــهـ