محرومه من كل شي !!

السلام عليكم 

اخباركم يا حلوات ؟







والله نفسيتي تعبانه اليوم 
وحابه افضفض لكم ، عل وعسى ارتاح وألقى حل لوضعي !! 




بداية الحمدلله انا من عيلة متوسطة الحدود ، تعرف الحلال والحرام والعيب ، ولكن نوعا ما اهلي يعيشون بانفتاحيه غير عن بعض عوايل جماعتنا ، ليس الانفتاحية المذمومه !!! 

ولكن تعيش حياتها وتتمتع بالمباحات ، مثلا ابوي واخواني عادي ما يمنعونا نلبس عباية الكتف ، و نطلع اسواق مع اخواني ونتمشى ونروح ملاهي ويخلونا نلعب وهم يحمسونا ونلعب كلنا مع بعض ، 

وابوي الله يحفظه ويخليه لنا ما يقعد يغثنا تغطوا اسكتوا قوموا سووا كذا لا تسوون كذا ، بالعكس ابوي جدا طيب وحنون وما عليه من هالامور اهم شي اننا متغطيات و محترمين حالنا انا وخواتي ، 
وعايشين حياتنا بكل اريحيه ، وبحدود شرع الله الحمدلله .. يعني بالعربي محنا متشددين ..! 



ومرت الايام والشهور وتقدم لي بعلي العزيز ، وافق ابوي طبعا بعد موافقتي ، وتم كل شي الحمدلله على خير ، وتزوجته ، المهم انا عبايتي كانت ع الكتف ومن بداية زواجي اصر علي اغيرها وغيرتها غصب عني ولبست عباية الراس وليتني ما طاوعته !!! 


ماني مرتاحه فيهااا بالمره ، مع العلم ان عبايتي الكتف جدا عاديه ومافيها اي مظاهر زخرفه او زينه ولاهي مطرزه ، عبايه سودا فضفااااضه و ربي يشهد على كلامي 


لكنه اصر اني اغيرها وغيرتها ، و دراستي يا بنات ما كملتها والله اتمنى اكمل دراستي حتى لو انتساب بس برضو مو راضي ، كل شي عنده لا ، يبغاني بس اخدمه واكرف في البيت !! 

يا بنات انا ربي بلاني بعايلة كلهم متشددين ، من الاب للاعمام للاخوان ، الا من رحم ربي منهم ، 


وعلى ايش هالتشدد ما ادري 

والله لا عمي ولا زوجي واخوانه مطاوعه عشان اقول معذورين ، عادي يتابعوا مسلسلات ويسمعوا اغاني و اشيا كثييير يسوونها ، لكن الحرمه عندهم مهمشينها بس للطبخ وللغسيل ولحاجتهم الشخصية بس !!!!! 

والله مانعيننا حتى من التحفيظ ، حتى عمتي مسكينه تبغى تروح التحفيظ مع جاراتها وتحفظ كم جزء من كتاب ربي وتتفقه في دينها بس عمي رافض ، < طيب ليه 

ما ادري !!!!


الحين في دورات عندنا بحي الجامعه يا ناس دورات مجانيه يعني فرصه حلوه 

قلت له ابي اروح اسجل بـ دورة تجميل أو خياطه ، قال لي ماني فاضيلك اوديك واجيبك كل يوم  !! <يا سلام اجل فاضي بس تتنقل من قهوه  لثانيه 




والله يا بنات تعبت ابي اطلع اروح اجي ، الي اختلط بناس ، ابي ارتبط بعلاقات وصداقات جديده ، طفشت من قعدة البيت ، لي ثلاث سنوات وانا بالبيت ، بس اروح لاهلي او اهله 

تخيلوا حتى واحنا بالسياره يقول غطي عيونك ، يااااااربي انا بتجنن 


حتى خرجات عوايل مع بعض ما يطلعووون 
ياربي وش هالناس الكئيبه ؟؟؟


انا تعبانه نفسيا من وضعي 
ارجوكم ساعدوني عشان اقنعه اسجل بدورة او اكمل دراستي 


انا مشكلتي ما ازن عليه اذا قال لا خلاص ما اناقشه ، ازعل واروح غرفتي 

لا ملاهي ولا اي وسيلة من وسائل الترفيه يخلونا نمارس !! حتى النادي قلت بسجل فيه قال لي مافي !! 

اجل ايش اسوي اروح انتحر ؟؟؟؟؟؟
 
حتى محل العطارة والصيدلية يقولي ما تدخلينها ، طيب يالله هذي بمشيها له ، بس فيه اشياء والله ما اقدر اتغاضى عنها .. 

والاغاني يقولي لا تسمعين ، وهو يسمع 


ايش اقول وايش اخلي متشددين مرررررره 
لدرجة ترفع الضغط 

لو اتكلم من اليوم لي بكره احس اني باقي ما طلعت اللي بقلبي .. 


ارجوكم ساعدوني ، والحل مع هالرجال ؟؟؟