محشي البصل على طريقتي

السلام عليكم ورحمة الله وبركاته

هذي أول مره أكتب بقسم الطبخ وأتمنى يعجبكم

محشي البصل

المكونات : بصل حجم كبير + رز منقوع نص ساعه + تمر هندي منقوع بالماء لمده نص ساعه ويصفى

الحشوه : لحم مفروم + ثوم مدقوق + بصل مفروم + شبت مفلاوم + كزبره مفرومه + كرفس مفروم + فلفل أسود + ملح + مكعب ماجي

المقادير على حسب رغبتج وعلى حسب الكميه اللي تبينها

الطريقه :
تاخذين البصل بالقشره لاتنزعينها وحطيها بالعرض واجلسي على الأرض وأضربيها ضرب خفيف عالأرض :) بتقولون ليش مو على الطاوله بقول لكم الأرض قاسيه وتلين البصله
لفيها من جميع التجاهات بس مو حيل تضربينها خفيف بتلاقين البصله صارت طريه ولينه الحين اخذي بصله ثانيه وكرري جيبي عيالج وخدامتج خليهم يساعدونج هههههههههههههههههه
والله هالطريقه علمتني عليهاجدتي الله يعطيها العافيه لأن طريقة سلق البصل ما أحبها
المهم
قشري البصل وأغسليه وسوي فيه شق بالسكين بأحد جانبي البصله لين توصلين لنص البصله
أنزعي طبقات البصله برفق علشان لاتتشقق لأنها بتصير طريه ولينه

طريقة تحضير الحشوه :
أحمسي البصل لين يصير أشقر وضيفي الثوم وأحمسي وبعدين حطي اللحم المفروم وأحمسيهم وبعدين أضيفي البهارات والماجي والفلفل الأسود والملح وأحمسيهم عدل وبعدين أضيفي الخضار المفرومه وأحمسيهم لين تشمين ريحة الخضار المحموسه وبعدين اذا بردت حطي عليها الرز المنقوع

طفي النار من الحشوه وأنطريها لين تبرد لاتحطينها حاره تتمزق البصله
حشي البصله بالحشوه وسكريها وصفيهم بالقدر لاتنسين تحطين زيت ذره بقاعدة الجدر واذا خلصتي تصفيف البصل حطي عليه صحن مصنوع من الصين مو من الزجاج لأن الزجاج ينكسر :angry:
أما الصين يتحمل الحراره وعلشان يحتفظ البصل بشكله وماينفتح
حطي القدر على النار بدون أي اضافات ولا شي حطيه على نار هاديه ولاتروحين عنه بعيد علشان لايحترق غسلي مواعينج :angry: لين تشمين ريحة البصل طلعت مو ريحة الحريقه :42:
أقصد ريحة البصل تبين بتشمينها عقب عشر دقايق الحين حطي على البصل منقوع التمر الهندي
لين يغطي نص الصحن اللي فوق البصل لاتخلينه يغطي الصحن كله

الحين خلي النار على الحراره المتوسطه وأول مايغلي القدر خففي النار وخليها هاديه وحطيه على العين الصغيره أقصد الشعله الصغيره مو الكبيره
واذا نشف الماء وخري الصحن شيليه وخلي القدر على النار بعدها ربع أو عشر دقايق

وبعدين تاخذين صينيه أكبر من القدر وتحطينها فوق القدر وتقلبينها واذا قلبتيها اضربي خفيف على أسفل القدر علشان ينزل البصل اللي لازق بالقدر
وبالعافيه عليكم

بنات بتلاقون بدليات واجد بكتابتي مره قدر ومره جدر شسوي مره أكتبها بالكويتي ومره بالسعودي علشان الكل يفهمني :)
عاد هذي أول مره أكتب بقسمكم وان لقيت تفاعل ان شاء الله بفيدكم

نو طنش مي