محلات الكلف بدبي ...سؤال

الله يجزيك كل خير أختي ........
انا كلما طلبت كمية كبيرة من الكرستالات من محلات الكلف بابوظبي ،قالوا لي استني بنجيبه من دبي ..واحس يعطوني بسعر شوي ارخص ..بس يرفعون السعر علي ..وانا ما اعرف السعر الاصلي عشان اناقشهم... ان شاء الله خير ,,

اختي احبكم في الله
بتحصلينها في سوق نايف عمارة الكويتي في النوعيات الجيده ونوعيات رخيصه بس هناك تقدرين تكاسرينهم بالسعر
وخاصه المحل اللي من تدخلين عمارة الكويتي والباب بيكون في ظهرج هو بيكون شوي جدام بس على اليسار عنده اشكال كثيره ومنوعه اكثر من فضل الله اللي بيكون على يمينج
وبعد في محلات برع العماره في جهة المحلات اللي تبيع القطع والخلاجين في محلات اتبيع بالجمله
واذا بغيتي اغلى نوع بتحصلينه في محل والله نسيت اسمه بس موجود في برجمان والسيتي يبيع ماركه شورزسيفكي اسمحيلي ما عرف انطقها عدل
عاد اسمحيلي انا ما حفظ اسامي المحلات زين مني ادلهم:27:

فهمت قصدك أختي الغالية ...وجزاك الله كل خير ...ومشكورة على الوصف الدقيق ...
ما قصرتوا خواتي :)

صراحه اختى انا امس رحت محل يبيع ادوات الخياطه بس بالجمله اسمه عبدالله بستكي او عبدالرحمن بستكي ما ركزت على الاسم زين بس المهم بستكي
مكانه عند سوق الذهب بعد ما تطلعين من سوق الذهب بتلقين لفه يسار خذيها وبعدين يمين وبتلقينه جدامج اللافته لونها اصفر وهو محل كبير يبيع كل شي وصراحه تبيلج يوم كامل عندهم تنبشين ودورين على اشياء وايد ...انا صراحه سحبوني سحاب من عندهم والا جان باتيت في المحل بس على فكره تراهم يصكون من وقت اعتقد الساعه 7 المساء فسيري احسن من الصبح عشان تخلصين..
في بعد محل اسمه ازرار في الرقه بس غالي شوي
ومحل كيوتو في السيتى سنتر
على فكره المحل الي اسمه الوشيعه تراه فرع من بستكي بس يبيعون بالحبه مش بالجمله وهو في مركز وافي..
على فكره انا اموت على محلات الخياطع وجان حد بعد ساعدج لا تنسين تخبرينى عشان اسير محلات ثانيه اتعرف على الاشياء الي عندهم

أختي الغالية ....انجلينا...
ما شاء الله توفقت بكم أخواتي ... مشكورة يالغالية ... زين عطيتوني وصف دقيق لأني ماأعرف دبي كثير ...
عاد انا أهلي من يشوفوا محل أدوات خياطة يبعدون لأنهم يعرفوني أطول كثير :) ما أحب أطلع الا وانا راضية عن اللي خذيته ... بس مشكلة الاسعار والطلب عندي وايد على الاكسسوارات ، يعني أحتاج كمية بالجملة ... وعادة أروح محلات مالك وشهيد الفرع بالسوق والثاني جنب مركز مدينة زايد ...غير انه حول المركز محلات كثيرة بس مشكلة الاسعار فرق درهم أو درهمين ... ما استفيد وايد .....الله المستعان .
وناوية أروح الاماكن اللي دليتوني عليها ... وجزاك الله كل خير :)