{}{}{}:26:السلام عليكم ورحمة الله وبركاته:26:{}{}{}
كيف حالكم يا أحلى بنات
حأدخل في الموضوع على طول
عزيزاتي
مجرد نصايح وكلمات كتبتها لكم من تجربتي المتواضعة في الحياة الزوجية
وأتمنى انكم تستفيدوا منها
وكل اللي أبغاه منكم دعوة حلوة بانه الله يحفظني وزوجي وأطفالي من كل مكروه ويريح بالي
معليش يا بنات يمكن الموضوع يكون طويل حبتين بس صدقوني حتستفيدوا بإذن الله وأتمنى تقروه بتمعن وتركيز
بسم الله نبدأ
حأقسم الموضوع الى ثلاث فترات :
1- فترة الخطبة :
-أهم شي فيها الاستخارة ثم الاستخارة ثم الاستخارة
مو ضروري تشوفي شي في نومك لكن تكون بتيسير الأمور يعني تلاقي كل شي ماشي تمام وبسرعة بدون ما تحسي وبدون مشاكل.
-السؤال عن الخاطب ودا الشي على الأهل (الأب والأخوان)
المفروض يسألوا عنه قد ما يقدروا في العمل أو عن طريق الأقارب.
-حلو انه يقابله أخوك أو أبوك ( شخص يكون عنده بعد نظر ويقدر يحكم على اللي قدامه ويكون عنده أسلوب حلو في الكلام وأكيد تثقي انتي في رأيه) قبل الشوفة ويعطيك انطباعه عنه ويوصفه لك.
- كوني طبيعية ولا تبالغي في لبسك أو المكياج سواء لمن يجوا أهله يشوفوك أو لمن يجي هو ، صدقيني البساطة والذوق هم المطلوبين وبس.
2- فترة الملكة :
-فترة الملكة يفضل تكون فترة معقولة ما تكون طويلة مرة ولا قصيرة مرة أعتقد من 4 الى 6 شهور فترة طيبة عشان تتعرفوا على بعض.
-صحيح انها فترة من أجمل الفترات في حياتك من ناحية الرومانسية والمشاعر الجديدة اللي حتعيشيها لكن حطي دااااااااااااايما في بالك انها فترة مهمة جداً ولازم ما تضيع بدون ما تستغليها و تتعرفوا على بعض كويس وتحكمي على دا الشخص اذا حتعيشي معاه بقية عمرك ولا لأ.
-انتبهي من كثرة الزيارات صدقيني مالها داعي حلو انه تكون الزيارات محددة كثرتها ما تجيب الا المشاكل وحتى لو ما جابت المشاكل حلو انه يشتاق لك ويحس انه ما يقدر ينطلك كل شويه
خليه يشتاااااااااااااااااق كلها فترة وحتكوني معاه على طول.
-افتحوا مواضيع مهمة مع بعض عشان تعرفي رأيه في الأمور الحياتية ووجهة نظره زي ما قلتلك لا يضيع الوقت كله في الغزل والدلع لكل شي وقته مثلا :
* ايش الأشياء اللي تحب انك تلاقيها في زوجتك؟
* ايش أكتر شي ممكن يزعلك مني؟
* اذا صار لك أو لأحد موقف معين ممكن تحكيه وتشوفي تعليقه على الموقف عشان تحكمي هل هو عصبي،غيرته شديدة،شكاك،بخيل...الى آخره.
لكن مو على طول تصدري حكمك انتبهي لكلامه وأفعاله قبل ما تحكمي وأتأني.
* قولي له أنا ما يعجبني الرجال البخيل ..مثلا في الكلام وكدا عشان تبيني له كمان الصفات اللي ما تحبيها.
-انتبهي تبيني له انك تخبي على أهلك شي (يعني انك ممكن تسوي أشياء من ورا أهلك)
مثلا يقولك تعالي نخرج سوا بدون ما يعرفوا وقولي لهم رايحة لفلانة ولا علانه وأنا زوجك وما فيها شي
أبدا أبدا لااااااااااااااااااا توافقي على شي يكون تسويه من وراأهلك قولي له اذا نفسك كلم أهلي أول
وبكدا حتكبري في نظره وحيطمن لك ويثق فيكي وترى الشباب يحبوا يختبروا البنات في دي الفترة بطرق متعددة.
-اذا لقيتي فيه شي منتي متقبلته نهاااااااااااااااااائي أو عرفتي عنه شي ما تحبيه أبدا أبدا مثلا انه ما يصلي
أو يشرب والعياذ بالله أو شي زي كدا كبير لا تقولي بكرا يتغير صحيح في ناس يتغيروا لكن الأغلب ما يتغيروا ومو لازم ترمي بنفسك للتهلكة
بعد الاستخاره والاستشارة لازم تاخدي قرار بانك تكملي معاه أو لا.
3- بعد الزواج :
حبيبتي طبعا كلنا عارفين وسامعين انه أصعب سنة هي السنة الأولى من الزواج وفعلا على قد ما هي حلوة على قد ما هي صعبة
وتكون فيها مشااااااااااااكل كتير لأنه تخيلي يا قلبي كل واحد جي من بيئة مختلفة وبيت مختلف وتعيشوا مع بعض طول اليوم
يمكن تكوني مو متعودة انه أحد يتحكم فيكي قبل الزواج لكن دحين دا الرجال صار زوجك ولازم تطيعيه في غير معصية الخالق طبعاً
وما دام حبيتيه اتطمني حتسوي له كل اللي يرضيه لأنه حتنبسطي لمن تحسيه مرتاح معاك وأكيد على قد ما هو مرتاح معاكي حيحاول يسعدك ويريحك...
الله يسعد كل البنوتات يارب ويرزقهم بالازواج الصالحين..
طيب في دي الفترة خلي بالك من الآتي :
-حاولي تفهميه بتأني وهدوء كأنك بتدرسيه لأنه مهما اتفاهمتوا في فترة الملكة لمن تعيشوا مع بعض غير سبحان الله.
-كمان حاولي تفهميه نفسك بمعنى تساعديه عشان يفهمك
وهنا في نقطة مهمة يا بنات وأحسها تجيب كتييييييييييييييير من المشاكل لمن تستني ردة فعل معينة أو كلمة شكر أو حركة في بالك تستنيها منه وهو ما يسوي اللي في بالك أو يقوله وانتي في نفسك تنقهري وممكن الدموع تنزل أربع أربع وعاد في نفسك تقولي المفروض انه هو يفهم والمفروض انه هو يحس وأصلا لازم يسوي كدا والطبيعي انه يقول كدا
ما في شي اسمه لازم وطبيعي والمفروض انتو لسه بتعرفوا بعض دا (الكلام تقوليه لمن يكون لكم سنين مع بعض لانه وقتها هو عارفك وفاهمك)
هو يكون أحيانا على نياته لكن انتي تاخديها بحساسية
يا قلبي انتي علميه بهدوء ودلع ونعومة كيف يعاملك ايش لازم يقول هنا ايش تحبي انه يسويلك لمن تزعلي وكيف يصالحك وكيف وكيف
كله وصلي له هو بطريق مباشر أو غير مباشر لكن أهم شي بأسلوووووووووووووووب حلو ومو بمضاربة ونكد.
-دائماً بيني له انه عندك رغبة في تحمل السؤولية وانك حابة تتعلمي كل شي بس لازم يصبر عليك ويتحمل ولا يستعجل عليك ودا هو المفروض (انه يكون عندك الرغبة الصادقة).
-لمن يطلب منك طلب مهما كان صغير أو كبير حاولي ما تقولي لا على طول افهمي منه وقولي له طيب
اذا قلتي لا ممكن يعاند أحيانا ويكبر الموضوع لكن قولي له طيب وان شاء الله ، وان سويتيه كان بها وان ما سويتيه ما حيدقق طالما انك قلتي له طيب (هنا أقصد طلبات بسيطة في البيت زي يبغالك دايما تسوي لنا حلى في العصر ، لا تنسي تسوي كدا ، وياريت تسويلنا كدا ويا كتر الطلبات اللي تجي على خاطرهم :) ).
-اعرفي اهتماماته وحاولي تتكلمي معاه في الأمور اللي تهمه وأهم شي تكوني مستمع جيد مع ابداء رأيك في الموضوع وممكن تسأليه عن طفولته وذكريات الدراسة أحس الرجال يحبوا يسترسلوا في الكلام عن ذكرياته.
-اعرفي بذكائك ايش هي الخطوط الحمراء عند زوجك يعني فيه اشياء مع الصبر والمحاولات والنقاشات والعشرة ممكن تغيري رأيه فيها لكن في أشياء عليها خطوط حمراء مهما سويتي ما في فايده واذا قربتي منها ولو بالمزح حتجيبي لنفسك مشكلة انتي في غنى عنها( زي الحجاب أو غطا الوجه اوالاختلاط أو غيره ).
-احترمي أمه وأبوه وقدري أهله عشان هو كمان يقدر أهلك، ودائما خلي في بالك انه أمه ربته وكبرته وتعبت عليه وانتي توك أخدتيه فاذا انتي تحبيه وانتي ما تعرفيه الا كم شهر أو سنة فقد ايش هي تحبه وهي اللي عرفته من يوم جااا على الدنيا ولا تنسي ( كما تدين تدان).
-اعرفي كيف تكسبي زوجك: فيه رجال أهم شي عنده انك ترضي أمه واذا شافها مبسوطة منك شالك فوق راسه فبالغي في رضاها، وفي رجال أهم شي عنده انك تلبسي وتتشخلعي له ، وفي رجال يمووت فيكي اذا اتفننتي في الأكل ومديتي السفر أشكال والوان....
أعرفي كيف تكسبي قلبه وعقله عشان يكون دايما في باله انه ما حيلاقي زيك لو لف العالم.
-حافظي على صورة أهلك قدامه اتكلمي عنهم بكل أدب واحترميهم قدامه عشان هو كمان يحترمهم
ودائما بيني له انهم يحبوه ويمدحوه عشان يحبهم أكتر.
-خلي الزعل عندك درجات حسب الخطأ اللي سواه يعني مو كل مررررررررررة تقومي الدنيا وما تقعديها:09: وبكااا ونوااااااح ونكد لاااااااااااااااااااااااااااا.
حسب الموضوع شي يبغاله زعل عادي بسرعة ارضي وانتهينا وشي لاااا لازم تتكلمي وتناقشي وتاخدي حقك بالأدب والأسلوب الحضاري وشي بالدلع تسوي انك زعلانة وشي وشي (أقصد انك تنوعي في حركات الزعل)
والدموع لاتخليها تنزل على الرايحة والجية عشان لا يتعود عليها وتسير عنده عادي
خليها لوقت ما يكون فعلا الموقف يستاهل الدموع عشان يهتم بيها.
-لا تكذبي مهما كان ، اذا مسك عليك كذبة ماعاد يصدقك أبداً.
-حاولي اذا كنتي من النوع الغيور لا تبيني له غيرتك لأنه للأسف بعض الرجال يستخدموا دي النقطة بطريقة استفزازية.
-من أهم النقاااااط يا حبيبتي:
لا تقارني حياتك بحياة غيرك مهما كان
كل بيت في الحلو والمر وكل رجال له حسناته وعيوبه
وكل وحده متحملة زوجها في أشياء وهو متحملها في أشياء
ارضي واقنعي باللي عندك واحمد ي الله ولا تجرحي زوجك بمقارنة حاله بغيره، حبي زوجك بكل ما فيه وارضي به بكل ما فيه
لأنه حتى انتي مو كاملة لكنك تحبي انه يكون مقتنع بيك ويحبك بكل ما فيك بحلوك ومرك صح ولا لا؟؟:42:
وأخيراً :
أكيد ما حأوصيك وأقولك اتدلعي عليه وسمعيه الكلام الحلو واطلبي منه يسمعك كلام حلو والبسي واتزبطي
وعيشي يومك وحياتك وانبسطي يا قلبي لأنه الحياة والله مو مستاهلة تزعلي نفسك عشانه أو تقاطعي زوجك عشانها.
آسفة طولت عليكم بس حبيت أقول كل اللي عندي وان شاء الله الكل يستفيد
تعبت من الكتابة بس تستاهلوا يا أمورات.
الله يسعد كل متزوجة ويرزق كل بنوتة بالزوج الصالح اللي يسعدها ويقدرها ويهنيها
كل ما أتمناه منك دعوة حلوة
ويا ريت ترفعوا الموضوع عشان البنوتات الحلوات يستفيدوا
والله يرفع قدركم دنيا آخرة
خلصت
:icon28:
-