مخي وحملي وولدي :(

السلام عليكم ....كيفكم امهات
ولدي الوحيد صار عمره سنه وشهرين وطلعت حامل الحمدلله...اكتشفت حملي قبل يومين بتحليل في البيت ومن الفرحه سجدت شكر لله وكاني حامل لاول مره.
اليوم الثاني كنت فرحانه بس مهمومه اكثر ...يعني ان شاء الله الولاده راح تكون وولدي عمره سنه الا شهرين.. انا في امريكا مع زوجي وولدي للدراسه واهلي طبعا في السعوديه...
شايله هم انه خلال الحمل ايش ممكن اعلم ولدي عشان يعتمد على نفسه اكثر وما يتعبني لما اولد...
هو دحين يشرب الحليب من الرضاعه واللهايه لازم وقت النوم...وسريره مفتوح على سريرنا ...وقبل لا ينام اهزه وحتى لما يدوخ واحطه في السرير لازم يمسك يدي الين ينام وعادي اقعد واقفه نص ساعه الين ينام.
نفسي انه يبطل اللهايه
وينام لوحده في سريره من غير هز ولا يدي
وما اولد الا وهو يعرف يستخدم الملعقه
وشي رابع بس ما ادري وقته ولا لا....متى ممكن اعلمه على الحمام
المواضيع ده كلها طيرت الفرحه وصرت بس افكر...مش عارفه ايش اسوي...حتى المذاكره من التفكير مش قادره اركز
صحيح الحمل والحمدلله جا بدون تخطيط ..وبالعكس كنت على وشك استخدم مانع...بس ما تتخليون كيف فرحت لما شفت الخطين
اللي جربت او اللي عندها فكره لا تبخل علي...اختكم محتاجتكم