مدري اضحك على نفسي معهم ولا اتضايق منهم

السلام عليكم
قبل اسبوعين مريت بموقف لا احسد عليه يمكن بعضكم مايصدقني فيه بس اقسم بالله صادقة بكل حرف قلته
بدايتها كنا بمزرعة اهل زوجي كلنا اخواته وسلفاتي جميعا مجتمعين هناك وبتنا ليلة بالمزرعة
ويوم طلعنا راجعين لبيوتنا الصباح طبعا زوجي مو موجود طلع قبلي عنده شغل مهم وركبت اول شي مع اخو زوجي وحرمته وبناته وبالطريق السريع وانا عيني تغفى ما شفته الا لبق على يمين وحرمته تقوله شفيك يارجال يقولها صبرك دقيقة اما تاري حرارة سيارته ارتفعت لدرجة عالية وكل مايشغل ويمشي نفس الشي ترتفع درجة الحرارة لحد ماطفش ووقف الين كان لاحقنا اخوه الثاني ونزل يشوف الموضوع
وانا حامل وابني معاي مو راضي يهدأ يبغى يرجع للبيت وحسيت انه موال اخو زوجي مطول ولسا بينتظر سواق بيتهم يجي بالسيارة الثانية وعلى قوله عشر دقايق بس وانا ما اقدر اصبر وكان اخوه خلاص بيمشي اتصلت على سلفتي الثانية لي قاعدة بالسيارة وطلبت منها ب لطف اني اركب معاهم انا وابني والحرمة جزاها الله خير وافقت رغم انه فيه مشاكل بيننا وركبت معاهم انا وابني وحسيت زوجها متضايق بس ماعلي منه طنشته واحنا ماشيين بالطريق


بنشر الكفر حقه
ونزل يصلحه ويركب واحد ثاني وعلى بين ما هو يركبه مر من قدامنا اخوه الثاني لي كانت حرارة سيارته مرتفعة وسحب عليه ماوقف له
بهالوقت مدري كيف حسيت نظرات ولده ابو ١٢ سنة
لف وجهه وعطاني نظرة وهو لابس نظارة شمسية نظرته كانت مدري كيف لي ورجع لف راسه ورجع عطاني النظرة ثاني
وعدا عن نغزات سلفتي بالكلام وانا اطالع بالنافذة مرت سيارة زوجي من قدامنا على الطرف الثاني وكان مسرررع وانا ضحكت وقلت لولدي شوف سيارة بابا مرت من هنا وذاك بدأ صياح لانه متعلق ب ابوه حد الموت
وذاك ركب كفره الجديد ورجع للسيارة معصب ويسب ويصرخ الين رجعت لبيتي ودخلت شقتي لغرفة النوم على طول ميتة من التعب والحرارة وسخونة الحمل
بالعصر رجع لي زوجي معصب يلعن يقولي عجبك اليوم غرزت سيارتي بالرمل وبالموت لا جاو اخواني طلعوها من تحت الرمل
قلت له اي ساعة غرزت حبيبي قالي الصباح حوالي الساعة ١٠
يا الله يعني بعد ما اشرت له بيدي وقلت هذي سيارة بابا بنصف ساعة
المهم من ذاك اليوم اخوات زوجي وسلفاتي ماسكين هالموقف علي ميتين ضحك وانتي وجهك نحس ووجه الشؤم واعوذ بالله منك ويوم اتضايق منهم يقولون لي نمزح لاتصيرين نفسية
لحد اليوم ذاكرين هالموقف ونازلين ضحك فيني وحتى عالقروب اليوم اخت زوجي تقول اعرف وحدة من نظرة تخلي كفر السيارة يطير بالشارع !!!