مدري انا الغلط ولاهي

مساء الخير
بدخل بالموضوع على طول انا متطلقه من فتره والحمدلله مرتاحه عند اهلي اول ماجيت رحبوا فيني ماشاءلله
وكل شي تمام حتى ارتحت من زوجي ومن اهله ومن المشاكل
بس المشكله من اخوتي المتزوجات بعد مو كلهن من وحده بس دايم تجي لاهلي ومعها اولادها وبناتها وتصير مشاكل مع بناتي وحده عمرها 4 والثانيه سنتين يعني صغيرات بالعمر وماشاء الله عيالها كبار وهي من النوع اللي ماتحب احد يقول لعيالها شي حتى لوكان اخواني وعيالها طايحين ضرب ببناتي وهي تتفرج بدون تعليق واذا راحت لبيتهم تحرضهم وتقول لهم اللي يضربكم اضربوهم ووووو طبعا الكلام هذا سمعته من بنتها لما مسكتها وقلت لها ليش تضربين بنتي كانت تقول امي تقولي
وبنتي الكبيره يوم عمرها 3 سنوات اتعلقت ببنتها وكانت تبكي لما يروحون كل مره فقام زوجها مره واخذها واشوف اختي مو بخاطرها واذا راحت تخليها عندهم وانا ماعندي احد يجيبها منهم ومره نامت عندهم وقام زوجها شال بنته من سريرها عمر بنته 6 سنوات وحطها عند اختي بغرفتهم وشال بنتي وحطها بسرير بنته عند ولدهم مع العلم انه مانام بغرفته وقالت لي بنتهم ذي انها تصرخ بالليل وتبكي لدرجة انه ولدهم اللي نام عندها انزعج ونام عند ابوه ولما ترجع بنتي تكلمني بنت اختي تقول ماما هاوشتها وقالت لها روحي عند بيت كذا تقصد امي مع انها تترك بناتها وعيالها عندنا اذا قالو مانبي نروح انا صرت امنع بنتي تروح معهم وتقعد تبكي كل يوم بس احيانا القى عيالها شايلنها ومركبينها السياره وارجع انزلها وهي تبكي
المشكله انه يوميا تجيب عيالها عند امي لانها موظفه لانها تخاف عليهم من الخدامه وتقعد تتغدا وبالخميس والجمعه يسهرون بالليل وانا والله مايضايقني انها تجي لانها عارفه انه بيت اهلها زي ماهم اهلي بس بيضايقني انها تحرض عيالها وتعلمهم الغلط والشي الثاني بناتي قلقانات يعني ماينامون وهم شايفين احد عندهم ونضطر نحتري كل اللي بالبيت يروحون عشان ينامون وبيت اهلي صغير
والحين اذا جو عندنا يقولو رحنا الملاهي ورحنا مدري وين وتقعد بنتي تبكي تقول ابروح معهم واذا تهاوشو مع بنتي دايما يقولو لها هذا موبيتكم مدري ايش وكل مره يجون عندنا يمرون السوبر ماركت ويشترون لعيالهم ويجونا ومايعطونها شي طبعا هي تسمع وتشوف بس ماتتكلم واذا اجتمعو خواتي بنتها تشتري حلويات وتعطي كل الصغار الا بنتي لا صراحه احترت مدري انا الغلط ولاهي
امي مسكينه فيها ضغط تتحمل عيالها وعيالي وماتقدر تقول لهاشي واذا قالت لها ولدك ذا تعبني وتعب الصغار تقول لاولدي مايسوي شي غلط
احترت مدري كيف اتصرف معها المشكله انها اختي وهي دايمن تقول هذا موبيتكم وانا ودي ننبسط مع بعض وودي اتصرف تصرف صحيح وماودي بنتي تتأثر خصوصا انها صارت عصبيه وتتأثر بسرعه