يمكن البعد انسب حل @ymkn_albaad_ansb_hl

عضوة جديدة

مدري وش اكتب عنوان .. لكن لكل من سال عني هذا الي صار لي

السلام عليكم ورحمة الله وبركاته
اول شي اسفه على التاخير لكن ضروفي ماسمحت لي ادخل المنتدى اليومين الي فاتو والله اعلم بالحال :(

ثاني شي اشكر كل من ردت علي ودعت لي او ارسلت ع الخاص جعله الله في ميزان حسناتكم

فيه من البنات مستغربين من وضعي ويقولون فيه ناس كذا
اقولهم فيه ناس اقسى من وضعي موظفه بالجامعه مطلقه حاليا تقول ام زوجي كانت تضربني اذا جت وحصلتني نايمه او ماخلصت شغلي

ووحده من البنات تقول بنات نجد يرضون يسكنون مع اهالي ازواجهم بقولك للمعلوميه انا الوحيده من عائلتنا الي ساكنه مع اهل زوجي لا اخواتي ولا وحده من الي يقربون لي ساكنه او جربت تسكن حتى الي عايشين بمناطق ثانيه بعيده عن اهل ازواجهم لما يروحون لهم يسكنون بشقه وهي زياره

خواتي ماشاء الله تبارك الله من تزوجو ببيت بروحهم وملك بعد ولاتتوقعون رجالهم كبار لا صغار بس وضعهم المادي ممتاز ماشاء الله

وانا اول شرط شرطناه بيت بس قالو البيت يبغى له وقت واحنا نبغى الزواج بالعطله عشان اهله كلهم مجتمعين بالاجازه عشان كذا سكنت معهم
على اساس الوضع مؤقت

والي تقول طايره على الزواج ومدري كيف هذا نصيبي وجاني مو انا الي اخترته :(
يعني تتوقعين اني راضيه بالي يصير لي
عمري 23 سنه وكل هالمشاكل عندي
الحمدلله على كل حال

استغرب من تفكير بعض الناس انا وش اسوي الحين يعني ارجع اعيد السنين واذا خطبوني ارفض ياليت :09:
وصدقوني كم وحده مثلي بترفض لان كل الي توقعته شافت عكسه بس هذا الي مقسوم لنا

مثل لما تجي وحده تكون زوجة ثانيه وتشتكي من جارتها يردون عليها ليه تتزوجينه هي تزوجت وخلاص
اذا ماعندك حل ادعي لها وخلاص :44:

الله يهدي الجميع ويصلح الحال :44:

يلزم عليك تسجيل الدخول أولًا لكتابة تعليق.

تسجيل دخول

يمكن البعد انسب حل • 15 سنة

المهم

بالنسبه لموضوعي للاسف تازم الوضع :(

كثير من البنات نصحوني اذا مو الاغلبيه اكلم زوجي واخبره عن الحمل

بنفس اليوم دقيت عليه وقلت له يجي بصراحه هو فرح يحسبني برجع معاه لانه قال هداك الله
ماقلت له شي انا وقلت تعال ويصير خير :angry:

وبنفس الوقت بعد ماسكرت منه رحت لامي وخبرتها بالي صاير كله وعن الحمل وعصبت علي

ابوي عرف بالموضوع من امي وبعد هو عصب علي يقولي ليه ساكته كل هالوقت

تحسبين اننا بنرضى انك تنهانين ومن هالكلام

المهم قال بيكلم زوجي وقلت له اصبر انا بالاول بقوله عن حملي وبعدين انت تفاهم معاه

ماابي اخرب فرحته بالحمل وابغاه يسمع الخبر مني
لبست وبعد ماجاء زوجي طبعا جلسو معه ابوي واخواني شوي وراحو وجيت انا

{ يعلم الله ان اهلي يحترمون زوجي كثير مثله مثل ازواج اخواتي الثانيين ومن يسمعون انه بيجي اخواني اذا طالعين يرجعون وحتى ابوي هو الي يستقبله اذا جاء يحترمونه احترام مو طبيعي حتى زوجي يقول استحي اروح لهم احس يعطوني اكثر من حقي }

المهم اول ماجلست معه قالي جهزتي اغراضك قلت لا عندي لك خبر احلي قال مااعتقد فيه خبر احلى من رجعتك
قلت له الا فيه بمجرد حطيت ايدي على بطني هو فهم والله قام وضمني قال صدق بصوت عالي اتوقع اهلي سمعو صرخته
سالني من متى وقلت له قال يالله البسي للمستشفى
بالبدايه خفت قلت ليه لاني حسيت انه شاك او فيه شي مارد علي قام وطلع قال يالله انتظرك بالسياره وبدون جدال انا لبست وطلعت معه

وبالسياره كان يتكلم مبسوط ويقول يارب ولد وباخذه معي وبسوي له وبلعب معه وانا بس اقوله ان شاء الله

رحنا لمستشفى خاص وانا للحين اتسائل بيني وبين نفسي ليه قال بتطمن عليك وبنفتح لك ملف عشان المراجعات
وكان يقولي خلاص ترجعين معي الليله ومافيه شغل بالبيت خلك بغرفتك وكل شي بيجيك انا بغيت اقوله ابغى بيت
بس ماابي اخرب فرحته لاني من اخذته ماشفته بهالفرحه حتى يوم زواجنا مااتوقع فرح نفس كذا

طلعنا من المستشفى الساعه 9 ورحنا تعشينا { اول مره احس اني متزوجه ومع زوجي بروحنا } باستثناء ايام السفر الي بشهر البصل

رجعت لبيت اهلي وكان يقولي جهزي اغراضك يالله نرجع للبيت
دخلت بيت اهلي وخبرت ابوي بالي قاله لي وابوي رفض ارجع وقالي دقي عليه خليه ينزل بكلمه

تكلم معه ابوي عن موضوع البيت وهو قال خلاص بس ترجع معي الحين على بال مادور بيت واجهزه

وابوي رفض قال قلتوها قبل وجلست 3 سنوات ومايهم لو اهلك محترمينها لاكن صبرت على اهانات ومستحيل ارضى لبنتي هالشي

كنت جالسه معهم وساكته وزوجي اذا تكلم ابوي يطالعني وانا انزل راسي

وابوي كان يتكلم معه باسلوب حاد وبالفعل كان معصب
ابوي قال زوجي اذا ماتقدر تفتح بيت انا بساعدك عشان بنتي مو عشانك والاغراض الي بحطها بالبيت لبنتي مو لك
زوجي طلع من عندنا وهو يقول خلاص باخذ قرض وباجر شقه وباثثها

وصلته عند الباب وكان يقولي ارتاحي وانتبهي لنفسك ماحسيت انه زعلان او متضايق من كلام ابوي

ثاني يوم الظهر دقت خالتي { ام زوجي } على امي

ولمعلوميه هي ماتدق حتى لو تعب احد او تزوج احد من اخواني او بعيد او غيره مستحيل تدق
امي لو يصير عندهم اي شي دقت لو تولد وحده من بناتهم تدق وتهديهم ولو يمرض احد تزوره
لاكن هي مستحيل توجب اهلي بشي
اهلي طبعم كذا حتى مع اهل زوجة اخوي او رجال اخواتي تلاقونهم طلعات واتصالات مره علاقتهم حلوه مع بعض
يقولون خلاص صرنا اهل الا مع اهل زوجي لان هم مايفتحون مجال

المهم دقت عجوز النار على امي ولا باركت ولا هم يحزنون وتهاوش تقول بتسرقون ولدي مني ومن هالحكي
قالت لامي ولدي خلاص بيطلقها والحمل اذا تبيه تحتفظ فيه واذا ماتبيه تنزله واذا تخاف تصبر لين تولد وتعطينا اياه
طبعا مو حب ولا هي بتربيه لان عندها عيال ولدها الثاني
الي حسرت بمرته لين طلقها والله يابنات انهم ماخذينهم من امهم غصب
عناد فيها بس ويضربونهم ومايحبونهم ويدعون على امهم قدامهم المشكله هم ضغار بس يسكتون
تضربهم هي وبناتهم وتدعي عليهم حتى زوجة ابوهم صارت تضربهم الله لايولينا لاحد من خلقه
المهم تقول عطوني الولد بعطيه عمة فلان الي هو زوجي
{ عمته مره كبيره ربي مارزقها عيال زوجها متزوج عليها وعنده عيال} تقول بعطيها اياه تربيه اكيد بتفرح فيه حسبي الله عليها

كاني بجيب الولد من الشارع اوبكح وبولده ماكاني راح اتعب بحمله ولادته

ولا تخاف الله تقول نزليه

امي ضاق صدرها مره انا ماكلمت زوجي ولا قلت له شي عن كلام امه دق العصر يسلم وقال اني طالع ادور شقه انا استغربت

وقلت له عن اتصال امه وكلامها بعد ماعرف سكر وجاء عندي للبيت كلم ابوي قال باخذ شقه وبنسكن فيها وامي بترضى مع الوقت

ابوي رفض قال امك ابدى ومستحيل ارضى تقاطع اهلك اذا ارضيتهم خير وبركه غير كذا الله يساعدك وبنتي عندي

طلع زوجي وقال بروح ادور شقه ماعلي من كلام امي وكلام ابوك وبنطلع الي بيجينا الله يحيه والي مو جاي براحته اهم شي راحتنا

ولما قلت ابوي صعب اعصيه ومااتخيل نفسي عصب وقال انا تركت امي هذي حياتنا مايتدخلون فيها وانا ماراح اخلي ولدي يتيم وانا موجود

انا بين نارين ابوي وزوجي والي ببطني

انا قلت لابوي بروح معه وعصب علي وماادري وش اسوي
زوجي الحين يدور شقه واليوم قالي بمرك تختارين الاثاث وقلت له تعبانه مااقدر وانا اكذب بس خايفه من ابوي
امي تايدني تقول روحي معه وبالنسبه لامه لاتقطعون عنها روحو لها وزورها ولو سكرة الباب ان شاء الله مع الوقت بتلين
وبالنسبه لابوي تقول خليه علي واذا جهز البيت يصير خير

اروح مع زوجي .. اخاف ماترضى امه مع الوقت واكون تسببت له :(
او اسمع كلام ابوي واجلس لين هو يقنع اهله ويصير كل شي بالرضا
واخاف اهله مايقتنعون وتطول السالفه ويروح حماس زوجي ويصير بعدي عادي عنده :09:
محتااااره
ياررب فرج همي وفرح قلبي

افنونة • 15 سنة

اقنعي ابوكي وروحي لزوجك مدام هو شاريكي

بس حاولي ترضي ابوكي ومع الوقت امه راح تلين

وادعي انو الله يهديها

@الحمدلله@ • 15 سنة

روووووووووووووحي مع زوجك ..وأبوك مصيرة يرضى ..صدقيني أذا شافك مبسوطة ماراح يتضايق أبدآ ..

حبي راسة ,ابكي عنده ..تحنني قلبة ..قولي زوجي شاريني ..ويبي يسوي لي كل اللي أبية ..وهذا اهم شيء عندي ..

أمه مصيرها تقتنع وترضخ لاشافت ولدها مبسوط ..واحنا بنتحمل زعلها ..وبنطول بالنا عليها ..

وأستخيري يالغلا قبل كل شيء ..والله يوفقك ويساعدك ..

امل دنياه • 15 سنة

صح كلام افنونه اهم شي زوجك وابوكي راضيه وخليه يعرف كل شي عن حياتك حتى يتطمن مالك غناه عنهم وام زوجك راح ترضى مع الوقت والله يكون بعونك

سمراء حالمة • 15 سنة

روووووحي لزوجك