:)منب قايلتن شي اخاف يدبجني ابونا...دايم يقولي فشلتيني بين الله وخلقه....:)

لاتعرفين تكبسين رز ولاتسلقين بيض ولاحتى تعرفين تسكتين...

اتمنى يااخوات تدعون لي الله ييسر لي نشر روايتي الجديدة....

وبيني وبينكم عندي نصيحة لكل وحدة او واحد دايم تجيب سيرة رجا الصانع على لسانها وبالسوء...

يعي ممكن نختلف حول هالروائية ونتفق ...لكن اولا واخيرا هي اختنا وعرضها من عرضنا..

والمشكلة ان اغلب من حكم عليها وعلى روايتها ماقرا روايتها اصلا...وهذا هو اللي حارقني إننا للأسف كمسلمين مأمورين بكف اللسان وكفى بالمرء كذبا أن يحدث بكل ماسمع ....وبئس بضاعة الرجل قالوا...

مع ذلك أثبتت الحوسة اللي دارت حول الاخت رجاء اننا للأسف مانتابع ضميرنا بقدر مانتابع كلام الناس...

واننا للأسف مانحقر نفسنا ومستعدين اننا نقول أشياء كبيرة ورهيبة وثقيلة في ميزان السيئات بدون أدنى تحقق...


انا قرأت بنات الررياض اول مانزلت وانتقدت عليها شيئين فقط: ركاكة الأسلوب في قليل من المواضع...

وكذلك الأحداث بعضها كان مفتعل وشبيه بفلم هندي..وبقية القصة والله كانت عادية واقل من عادية ولااستاهلت كل هالهرج اللي طلع حوالينها...


وانها تروج للفساد والفااااااحشة وال وال...وهي والله المسيكينة والله ماكتبت نص اللي كتبوه ادباء سعوديين صوروا ووصفوا الفاحشة والفساد وحتى الشذوذ الجنسي ومع ذلك ماحد قال لهم ثلث الثلاثة كام....


مااحد حتى ناقشهم مجرد نقاش واقرؤوا اذا شئتم سطوح وسراديب لعبد الواحد الانصاري واقرؤوا صوفيا وسقف الكفاية لمحمد حسن علوان واقرؤوا القرف اللي اسمه كائن مؤجل لفهد العتيق...

من حتى جاب سيرتهم؟؟؟تكفون؟؟
والمسكينة كم واحد اكل في لحمها وقذفها بعرضها وهي كل اللي سوته مجرد كتابة؟؟؟

حتى اللي مايعرفون يقرون ويكتبون تكلموا عنها وعن روايتها اللي كانت رواية بسيطة في نظري واحس ان المجتمع السعودي بحاجة لمعالجة أقوى واقسى من روايتها...

لأن فيه مشاكل كبيرة عندنا ماراح تتعالج بالصمت والتجاهل...بل بمواجهتها وتحديها وفضحها..

لأن القوي هو من يعترف بعيوبه مو العكس..

اصلا الفتنة اللي صارت على رجاء الصانع بحد ذاتها ظاهرة تستحق لنقاش والتوجيه...

فعلا احنا في خطر والواحد منا ككاتب او كاتبة يااما يمشي جنب الحيط ويقول ويردد نفس اللي يقولونه الناس ولا خلاص يقذف في عرضه...

يعني ماعندنا للأسف ادب الخلاف...او احترام من يخالفنا حتى لو كان غير مؤمن...

في القرآن الكريم يأتي نقاش مع ملحدين ومتجبرين وكفار وناس معاندين ومع ذلك يأتي النقاش معهم بمنتهى الرقي ومنتهى البساطة ...


تخيلوا ان الرسول عليه الصلاة والسلام يقول للملحدين ومعاندين قريش: " إنا أو إياكم لعلى هدى أو في ضلال مبين.."
ا

يعني واحد منا صح اما انا يالنبي او انتم يالمعاندين..تخيلوا؟؟؟

وتخيلوا في خطابه لأهل الكتاب : تعالوا الى كلمة سواء بيننا وبينكم...

ولاتجادلوا أهل الكتاب إلا بالتي هي أحسن...


حنا نسأل الله العافية اول مانفكر فيه لما نتخالف مع احد هو أن ناكل لحمه او نقذف ونشكك في ايمانه او عرضه...لاحول ولاقوة الا بالله...

روحوا للأسف للساحات وشوفوا كم واحد هناك يؤكل لحمه ويقذف بعرضه عشان مقال ماعجبهم او عشان قال فكرة فيها شويت تحرر او فكرة فيها حديث عن المرأة ومالمرأة...

وتخيلوا كم واحد يقرا الساحات وكم واحد ينقل هالكلام وكم واحد تتسجل عليه خطيئة قذف وووووووو....

نا اتكلم عنكم انتم يااخوات واني والله لكم من الناصحين...


بأي وجه نبي نواجه ربنا سبحانه وحنا خضنا في عرض اخت مؤمنة حتى لو كانت فعلا كاتبة روايتها عشان تروج للفساد ...حتى لو كانت فعلا كانت نيتها كذاك هل يحق لنا نتكلم عنها بهالطريقة؟؟؟

النبي عليه الصلاة والسلام في حادثة الافك ترا اول من بدأ بإقامة الحد عليهم هم المؤمنين الذين (نقلوا) الحكي مجرد نقل موب انهم صدقوا القصة على السيدة عائشة ..

اذا كان مجرد (نقل) القذف يوجب الحد ...ولايطهره الا الحد....فكيف باللي فعلا يعتقد السوء في أخته المؤمنة؟؟؟وكيف باللي يروّج لهالكلام...؟؟

وكيف باللي خصص مواقع في النت لترويج الكلام عنها؟؟؟


وكيف باللي حرّف اسمها عشان يكون قذف لها؟؟؟

شوفوا وين وصل الحال بالمسلمين لاحول ولاقوة الا بالله...حرفوا في اسمها عشان يكون قذف لها...

انا اعترف ان الرواية كانت فيها شويت بياخة في بعض مقاطعها مثل لما صورت بطلات الرواية يشربون خمر ومثل مشهد البيانو اللي يذكرني بأفلام سعاد حسني:)

لكنها ماتستحق كل هالكلام المرعب عنها بسبب هالمقاطع....

واتحدى اذا واحد مؤمن حقا ويخاف الله قرأها فعلا ودقق في معانيها ماراح يتراجع عن كلامه عنها...



حنا للأسف مانتواني ولانتردد في عمل الخطايا ومن اهمها القذف اللي هو احد السبع الموبقات واللي مايطهره الا الحد زي ماجاء في القرآن الكريم...لكن نتردد في نقد المجتمع ومخالفة مايقوله ...


ومانتردد في نقل الشائعات والآراء العمومية ونقل كل مانسمع...

لكن نتردد في نقل الحقائق اللي نشوفها بعيوننا من أخطاء في المجتمع ...


يفترض اننا نتردد في عمل الخطأ...ونحاسب انفسنا الف مرة قبل نقول كلمة هي من السبع الموبقات وحنا نايمييييييييين في العسل...


موب قالها ربي من قبل؟؟؟


قال ايش؟؟

قال سبحانه"إذ تلقونه بأفواهكم وتقولون بألسنتكم ماليس في قلوبكم....وتحسوبنه هينا وهو عند الله عظيم"

وفعلا كم واحد منا نقل الكلام عن رجاء وبعدين حاسب نفسه آخر النهار وقال ياويلي من الله...انا ارتكبت غلط...ولازم اتوب...


من منا يسوي كذا الله يرحم الحل؟؟؟:)

مع انه المفروض هذا اللي يصير...المفروض كل واحد منا يخصص لو خمس دقايق آخر النهار يحاسب أقواااااااااله ولساااااااانه...

اهم شي لسانه....وش صدر منه وش ماصدر...وهلحين منول نقول الغيبة الغيبة صارت ياحليلها عند القذف...

اللي صاير زي سلام عليكم...

صدقوني يوم القيامة راح يكون من العسير اننا نتراجع عن اخطاءنا...أو حتى نبررها قدام رب العالمين...

لأن لو سألنا يوم القيامة كيف خضتي في الأخت رجا بتقولين سمعت الناس...

طب هل قراتي روايتها؟؟

لا...

طب هل ناقشتيها وكشفتي عما في قلبها لتعرفي ان كان قصدها فعلا افساد المجتمع او اصلاحه؟؟؟

طبعا لا...

اذن تحملي نتيجة خطئك الكبير اللي هو من السبع الموبقات...


ارجو يااخوات مااكون قسيت عليكم لكن يشهد ربي اني اشفق على كل وحدة او كل واحد خاض في رجاء الصانع اكثر مما اشفق على رجا نفسها...


لأنها الاخ رجا الحين دكتورة قد الدنيا وحصدت شهرة وحضور عالمي وشي ماحلمت فيه...


لكن الناس اللي وقعوا في مطب القذف والغيبة...من بيخلصهم من هالشي ومن بينبههم ان اللي يسوونه غلط؟؟؟

والشي الأفظع والاعظم ان بعضهم متدينين وانهم يحسبون هالفعل انه من التدين...

من متى كان القذف عمل صالح؟؟؟ومن متى كانت اساءة الظن بالآخرين ومحاكمة نيّاتهم عمل صالح أو جهاد؟؟


قولوا آمين الله يصلح قلوبنا ياأخوات...


وان شالله لما يحين الوقت اني انشر روايتي راح تكونون اول من يقرأها بحول الله وقوته...


دعواتكم ...وجايتكم بحلقات جاية ومذكرات مضحكة اكثر...

صح لسانك يا بدورة والله يعطيك العافيه على هالكلام الحلو ,,,,بس ارجوا تعطينا اسم روايتك الموجوده علشان نطلع عليها ,,,,, ارجوك

لأنه بصراحه سواليفك في عرض القصه ممتع ........وحنا نبي المتعه مش الفلسفه

ياااااااحبيلتس والله
قسم بالله انتس فنانه قطعتي تسبدي من الضحك
والله يعينتس على الغربه
والله اني أكرهها بريطانيا
وأنا قايله لرجلي إن تسانك ناوي على الدكتوراه في بريطانيا
ولا امريكا انسى انك متزوج حطني عند أهلي وانت الله يستر عليك
ودي يقلعني للصين ولا اليابان ولا يوديني بريطانيا ولا أمريكا
أحس ان بريطانيا قذرررررره وأهلها وصخين موب بالأخلاق لا من ناحية النظافه
وأمريكا كذا سبحان الله ماأطيقها وإذا شفت بوش بالتلفزيون ولا سمعت صوته
يجيني حاطي ماطي وأتهاوش انا ورجلي عشان يغير
مير الله يكتب اللي فيه الخير
وإن تسان رجلي ناوي على الدكتوراه أنا نجلس في كندا يارب
يالله تراني أستنى باقي المذكرات
وبطلع أدور المذكرات اللي قبل
خليني أوسع صدري على كلامتس اللي يشرح الصدر

بدوره اشجعك وبقوه على الكتابه ان شاء الله بيكون لك مستقبل باهر ..وبالنسبه لروايتك المنشوره ليش ماتبين تقولين اسمها وليش زوجك رافض ؟؟عذرا بس انا فعلا مستغربه.المفروض تفتخرين بها وتقولين اسمها حتى عشان توصل لناس اكثر ..

واحنا مو بمجال مناقشة رجاء الصانع وروايتها لكن لي تعليق بسيط ..انا قرأت جزء بسيط من الروايه وهذا الجزء حقيقي بالفعل في مجتمعنا ولكن يااختي ..هل ينبغي لكاتبه اول ماتكتب روايه تكتب أسوأ مافي بنات بلدها وتسمي الروايه باسم بنات بلدها مشيره الى ان محتوى هذه الروايه يمثلهن وهذه هي حقيقتهن .لماذا ؟ ولماذا تقول في احدى لقاءاتها انها تريد تعريه المجتمع وكشف اسراره..
هل هذا هو اول مافكرت به حين تفجرت موهبتها بالكتابه ان تكتب سيره فاضحه لمجتمعها وبناته ..
هل هذا هو دليل محبتها المكنونه لهن ..وهذه هديتها لهن في اول روايه لها ..
لقد جعلت القاصي والداني يتكلم عنا ..وينهش في لحمنا ..والبعض الاخر من المنتظرين لزله من البنات السعوديات يتلذذ بهذه الفضيحه وهذه التعريه التي قامت بها مشكوره الدكتوره السعوديه رجاء الصانع..
لقد قدمت لنا خدمه لامثيل لها في ظل الهجمه الاعلاميه على السعوديات خاصه ..ومعروف ان العيون مفتحه علينا على آخرها...
انا معك في اننا لانسبها ولانقذفها اكيد ..لان الادب لايجب تجاوزه مهما كان ..لكن لاتقولي لاتنتقدوها ..وتدافعي عنها ..فهي لم تقدم لك ولنا في نظري الا ..الفضيحه
وشوهت صورتنا امام الناس ..وجعلتهم يقولون هذه هي المرأه التي تقولون هي الاكثر تمسكا بدينها فالدول العربيه ..هذه هي ..بشهادة ابنتهم ..
وانا اتمنى ..اتمنى ..يابدوره ..انك اذا اصبحت يوما ما كاتبه مشهوره ..اوحتى في بداياتك ان تكتبي عن
الجانب المضيء في بنات مجتمعك ..
كما افكر انا الان..اتمنى ان نرجع للفتاة السعوديه ولبنات الرياض خاصه هيبتهن ..
والله يوفقك..

ياحلـــــــــوك واللله يابدووورة كتاباتك ممتعة بمعنى الكلمة ..

وأنا أقرا ممشغووووولة بس ماقدرت أترك شدتني لما كملتها

وعسى الله يوفقك وتنشرين روايات ناجحة وهادفة بإذن الله

تحياتي :)