باين بتمضي الليل تطبخي يا مسكينه:(

هههههههههههههههههههههه روعه وصفج
احلى شي يوم طريتي فيكي صديقة سالي

في تشرشل سكوير هكالنوبة كانت ثاني مرة نشوف فيها اثنين يتماطخون في الشارع...:)


الحق ماينزعل منه يابنات ...بس المفارقة إنهم كانوا شايب وعجوز...


ويلتفت علي رجلي وهو يعلّق: والخييييييييييبة...بعد شايبن وعجوزه...

زوجي ينطق (عجوز بكسر العين لأسباب شخصية تتعلق بالهوية ...ارجو مراعاة ذلك :) )

قلت هذا بدل ماتقول عقبال مانوصل عمرهم واحنا نحب بعضهم زيهم؟؟؟


مير تف عليتس حامضة...(يعني الي مايطول العنب باللهجة الزلفاوية)...

أول مرة شفناهم فيها عند اشارة مبنى الاطفاء...شكلهم متهاوشين وتراضوا ...


ولما شافهم رجلي التفت علي (مبتسما) وهو يقول بصوت عالٍ:

افااااااااااااااا...خربت الأخلاق ...أماه يابدورة؟؟؟


(أماه مصطلح زلفاوي يعني : ولاّ...أو بالعربي الفصيح أليس كذلك ؟؟؟)...

قلت ياقدمك يامتخلف قد شفته بالتلفزيون على ام بي سي فور يعني موب جديد..نيييييييييييه...


قال ايه بس لما تشوفين شيء (لايف) موب زي لما تشوفين (ريكورد) صح ولا لا؟؟؟

رجلي يعلّق على لوضع هالسنة في برايتن ويقول ان الوضع الاخلاقي ماعاد زي أول...

أول في 2002 يوم كان فيها كان يقول حامت كبدي من المناظر اللي بالي بالكم في الشوارع...

يقول اول مرة انبسطت..بعدها قلت خير وش يبون...وبعدها بغيت اقولهم كفاية عاد تمطيخ قدام خلق الله...


فعلا هالآيام تحسين الانضباط والاحتشام ملحوظ بشكل كبير...صح تشوفين البطن مطلع هذي مفروغ منها..وسيقان سلوى اللي تبي تفضّخ من النعمة...بس ماتشوفين شي يحسب على ثقافتهم قلة أدب...

مرة وحدة بس شفت بنت بلبس فاضح مرة...وغيرها ماحتى حسيت بالغيرة على زوجي...

وفيما بيناتهم انتم يالجنسين صايرين محترمين بشكل ملحوظ ...مادري وشو سالفة...

والاهم من ذلك ماتشوفين الا لابسين صلبان اشكال وانواع خصوصا جيل الشباب فمادري هل هم تدينوا ...ولا ان تحسّن اخلاقهم هداية من الله...

الله اعلم:)

الحاصل اني مرتاحة من هالناحية ولله الحمد ...لكن طرّاه العجوز وشايبها في تشرشل سكوير..

.....................زز


ويوم انا وصلنا لويس رود...وهي هكالحديقة اللي يالله من فضلك ..

ثيلها يلمع ...قلت انا لابونا هذي برستون بارك ؟؟؟

قال وش برستون باركه انتي وخشتس حنا بلويس رود تحسبينتس في السويدي ولاغرناطة انتي...؟؟


ان اماردي عليه يوم انا تونا طالعين ومعينين من الله خير..واسوي نفسي طافرتن بالطلعة قلت طيب شف يابوي...ورا ما نكبّر ونصلي في هالحديقة يالله من فضلك مادام انا على وضو...


وهو يقووووووووم الله لايوريكم....تبينا نصلي قدام هالللي لو يحصلهم كان اكلونا...حناااااااا في دولة علمانية والمظاهر الدينية ممنوعة...


الله من الخرط الفاضي فيك صدق...يعني هلحين لو بصف أصلي بيقبضون علينا؟؟؟

قال ايه وانطمي ولايكثر هرجتس قال تبي تصلي بالحديقة قال...بعدين ماتعرفين القبلة ...

انا أسكت وانطميت فعلا...موب خوف....لكن حسيت ماله داعي اني اعرض نفسي لو لمجرد تساؤل..
الناس ربما يظهرون قدامي متسامحين ولكن ماادري على ماذا تنطوي قلوبهم...

خصوصا وان اغلب من التقي بهم شكلهم ماعندهم ماعند جدتي ثقافيا واغلبهم مايفرقون بين العربي والمسلم...والاسلام والعروبة...والارهاب والاسلام...وهلم جرا...

ولو تبون الصراحة من يلومهم مادام اعلامهم موجّه وغير نزيه؟؟؟

ياكثر ماتعرض برامج في البي بي سي تعرض الحرب على الارهاب والعقلية الارهابية وتربطها بشكل غير نزيه بالمسلمين ...يعني تتعمد تجيب ناس مسلمين ارهابيين من كل الجنسيات (عرب وانغليز وسود) وكيف يتحدثون عن الارهاب كحق مشروع وكجهاد ...

مثل هالعرض غير النزيه والي تعرضه قناة بحجم البي بي سي من يبي يلوم اي احد يتأثر ويربط بين الاسلام والارهاب؟؟

ومن له مصلحة في هالديرة اصلا انه يدور عن الحقيقة ويبحث في حقيقة المسلمين وهل هم فعلا سيئين زي ماتقول بعض البرامج عنهم؟؟

لذلك ماراح الوم اي احد يكرهني ...لو اني مابذلت اي جهد اني اخليه يحبني...

هذا مبدئي ..


..........................


يتبع..

ويوم انا عاد سحبناها من حديقة لويس رود ورجعنا لمنطقة التسوق على الدرب قام الرجال يسحب يدي وان ااقول وين حنا رايحين؟؟يقول ماعليتس...


وندخل مكتبن كبر الحقة (الحقة بكسر الحاء وتشديد القاف...هي مصيدة الفيران بالزلفاوي) وراه رجل اكبر من المكتب ويقول هللو هاو كان اي هلب يو...؟؟

قال ابونا بلهجته المميزة: وي ...وانت....أفلات....وي ونت ...ون بد روم...وي...وي

قلت انا وش عنده جاب العيد....وش تسوي انت ؟؟؟

قال ادور شقة...قلت وش شقته خليها بعدين موب حنا الحين شهر عسل....؟؟؟:(

ويسفهني ويكمل جملته الانغليزية المعوّقة...


قلت يابونا انت انغليزيتك يبيلها (تنتيع) جعلي ماذوق يومك...اجل تتكلم انغليزي الله لايخزينا بمعدل ثلاث كلمات في الدقيقة...؟(التنتيع مصطلح يستخدمونه البنشرية في بلادنا...)

قال عاد هذي حكيي بالعربي كلمتين في الدقيقة شلون عاد انغليزي تبين مثلك بمعدل ثلاثمية كلمة في العشر ثواني...

قلت ايه بس الرجال حامت تسبده....قاعدن ساعة إلامنّك شرقت بالكلمة قام وعطاك اياها..

قال يشوف حجابتس ويشوف خشتي يعني دارين انا اجانب...يبي يشره علينا يعني...؟؟؟؟


المهم وانا من خوفي لااجرح مشاعر رجلي (والله اني اجودية) قاضبتن الارض وساكتة مااحتسي ...

شسوي اخاف اقول آ ينزرني ويفشلني...ولا يجيبون له حقوق الانسان ويشقلونه...

منب فاضيتن اقعد فيذا اطارد ورا توني بلير لين اطلّعه ...

ومن مكتب لمكتب...ومن بدعة لبدعة..ومن مؤسسة لمؤسسة...إلين طحنا على راعون شقتنا...

وهي نشوف أنابيلا...يامال السيييييييل ياأنابيلا...:)

أنابيلا قصتها قصة...صديقتي هلحين ..تشوفين كلما مريت مكتبها (لأنه قريب من شقتنا) ماغير تلوح لي هااااااااي....ياملحها ياناس...

انابيلا هي راعية مكتبن عقاري نشييييييييط بالحيل...يوم نروح لها هكاليوم لنا رابع او خامس ساكنين الفندق...

تشوفينها متصفطة على الكرسي من طولها لاإله الا الله تحيطها...طول طووووووووول...موب اي طول...مااطول منها الا ابوها اللي هو راعي المكتب والمالك...

وهي مع انها بنوتة خارمتن خشتها إلا انها هي الكل بالكل...الابو الله يخلف مايدري عن شي..هي اللي تشيل وتحط وتعرض وتتفاوض وتدق..

شغييييييييلة صدق فعلا...

يوم نروح لها وهي تمط الفرّة (الفرّة يام لقمرين اترك تفسيرها لتس...لاتقصرين عاد :) )....


وش اسوي لكم ؟؟؟

قلت عاد اها...هالمملوحة الطخمة تبي تهرّجها انت...؟؟انطق واقضب الارض ...


واقول لها شوفي ياخيّه...حنا نفر الديرة من الصبح نبي شقيقتن بغرفة نوم وحدة ومطبخ وحمام....

عاد هي فرّت الخشة وقالت أجل به شقتن من دون حمام ومطبخ؟؟؟قلت انا ادري عنكم يالانغليز؟؟؟

لو يحصل لكم تأجرون صنادق ولاشينكو ولابيوت قطاوة ذوليك اللي بافلام كرتون...كان أجرتوا...

قالت ايه نأجر شي زي كذا بس عادة مع عائلة...

:):):)
انتم تبون فلات والفلات لابد فيها مطبخ وحمام...

قلت لايكثر تكفين ترا شفت من بدع بريطانيا حد الحين مايكفيني..انهجي وشوفي ..

وهي تقوم تفر الكمبيوتر....تبونها مؤثثة والا لا...تبونها مع حديقة ولا لا..

احنا في البداية نتدلع....نقول اكيييييييييد نبي مؤثثة من له خلق يأثث صح يابدورة صح يارجلي؟؟

وحديقة اكييييييييييد نبي حديقة....اجل تبونا نقعد تقل جرابيع بكرتون؟؟؟

الا نبي نتنفه...ونبي أرررررررررخص سعر...

واخلصي علينا بكم شقة واعدتنا نشوفها عقب الويك اند...

وهو انت يالويك اند اللي تخبرون يوم اقول لكم اقوّم رجلي الأحد واقول له قم الحق الخطبة والصلاة...والله ياكل ماذكرته اني شوي اطيح من الضحك...


اني صدز قروية قروية مير الله يتقبلني عنده ويرزقني على قدر نيتي الطيبة وقليبي الطويهر...

وتمر الويك اند ويقوم ابونا ويقول انثبري بالفنتق لين اجي واشوف الشقة..قلت طيب وانا..

قال اقعدي طالعي التلفزيون العصر يجيبون افلام كرتون وش زينها...


واسكت وابلع دميعتي وهو يروح ويخليني...

طبعا انا ان مارحت معه من الصبح او الظهر تمشيت معناته خلاص بعد الساعة خمس مافي طلعة...لأن برايتن في الليل مخيفة ومرعبة وكل المحلات تصك ماعدا النايت كلوبز..

معناته هكاليوم راحت علي تمشية...

واقوم انافخ واشيل والبخ في غرفة الفندق اللي متر بمتر...وتلفزيون نص قنواته خربانة...

وهشوى تجي ذيك السعلوّة اللي ببرنامج الحلقة الأضعف وتوسع صدري شوي...

ومن هنا ومن هنا ومن كتاب لكتاب...همن حسبي الله عليه حتى الكتب ماخلاني اشيل كتب يقول تثقلين علينا ونبي نشري مير من لندن ...!!!


والله ماوديتيني تمشيني ببرايتن عشان توديني لندن نشري كتب...مير ياكثر الهرج ...


المهم مرت الساعات الين جا وهو يلهث ...ويقول انه لقى شقتن مؤثثتن تهبل...وسعرها سبعمية باوند ..وانها المالكة حقتها بس تبي اثبات اننا نبي ندفع اول باول ومن هالحتسي...

وعلى كذا قلنا نبي نطلع من الفندق بعد يومين او ثلاث ان شالله...

هذا كان العشم والحلم قبل لانصطدم بالعقبة اللي حومت تسبودنا...


الغارنتووووووووووووووووووووور....



الغارنتور...وماادراك مالغارنتور....

خلوها باتسر....لأنها يبيلها قعدتن صح ....

واتمنى اي وحدة جاية لبريطانيا للدراسة تحط هالحاجة في بالها....


تابعوني باتسر...ان شالله منب مبطيتن عنكم...

لااااااااااااااااااااااااااااا
يابدورة والله انك رائعة في الكتابة
من فين جبتي فكرت انك تكتبي احداث يومك
الله يوفقك ويسعدك
والله احس انك اختي
لان ماحد يقولي كل سوالفة الا اختي
لا واقولك دمك خفيف ما شاء الله
انا كل شوية تضحكيني ولا احلى مسلسل
كله كوم وهذي كوم
؟؟؟؟؟؟؟؟؟؟؟اجل تتكلم انغليزي الله لايخزينا بمعدل ثلاث كلمات في الدقيقة...؟؟؟؟؟؟؟؟؟؟؟؟
بيزعل عليك ابو الشباب بس حلوة روحك المرحة