🌸🌼

يسلمووو يانور ويعطيك العافيهننتظرك 😊

لا ماحرقت القصه هي صحيح تزوجت لكن وشلون ماندري الأحداث لازالت مشوقه أنا أبي أعرف النهايه وش لون تزوجت وكيف حياتها مع زوجها

رفع

تابع
( 6 )
بعد ماتركت الخطابه وموقع الزواج في النت
بديت مرحلة جديده في البحث عن عريس
طرقت ابواب الرقاه وتنقلت بينهم مدة طويله كانت تجربه صعبه جدا جدا ومؤلمه
بحثت عن راقي معروف ورحت له كنت خايفه من جو الرقيه ومن مشاهدت الحالات المرضيه عنده
دخلت عند الراقي وشفته طويل الجسم وصوته جهوري ونظراته مخيفه
جاني كساح واختلفت خطواتي
دفيت نفسي دف حتى وصلت عنده وجلسة متثاقله
قال وش تشتكين منه ..بغيت اقول له ابي اعرس ولاعاد تشوف رقعت وجهي
قلت مشكلتي تاخرت في الزواج
وكل ما جاني خاطب ينحاش او يفقد الذاكره
او يختفي في ظروف غامضه
ومازال البحث عنه جاري حتى هذي الحظه
واذا شفته امسكه وزوجني عليه مشكور وكثر الله خيرك
قال الرفض منك او منهم
قلت اصلاً مايمديني ارفض او افكر ارفض
او احرك شفايفي بكلمه الا هج الخاطب وحطم كل طموحي وحلامي وامالي
قال ابشري بالخير...ابتسمت كانه يلمح بخطبه
او بسبب هوسي اختلطت علي الامور
بدأ يرقيني بالقران بصوته الجهوري
والخوف يتملكني ويح قلبي ويح قلبي
كنت منزله راسي على الارض واستمع للرقيه وعقلي مشغول بحالي واحرك جسمي واطرافي بكثره
بسبب توتري ومن رهبت المكان
وانا متعمقه في خيالاتي ضربني بيده بقوه بين اكتافي
صرخت من الخوف والروعه.. احسب السقف طاح فوقي
وقمت من مكاني ..اشر لي بيده وهو مازال يرقي اجلسي
وجلست وانا اشاهق وقلبي احسه بيطلع من صدري
انتهت الرقيه طلعت من عنده بدون ما اساله ابي بس النحشه وين الباب
رجعت البيت وحسيت بالم فظيع بين اكتافي مدري كسر لي عظمه او مزق العظلات في كارثه عملها لي
الله يستر لايكون سبب لي عاهة مستديمه
يا ناس ابي اعرس ما ابي ادخل مستشفى العظام
جلست في البيت فتره اتالم وعملت اشعه وطلعت سليمه
رجعت لهذا الراقي ..قلت له من يوم ضربتني بين اكتافي
وانا ماحصلت وراك خير ..عيشتي في الم مستمر
قال لا تخافين برقيك وراح يتبين كل شي
بدأ يرقيني وانا جالسه مثل الصنم
اخاف اتحرك ثم يجيني مشعاب يفقع راسي
المشكله جسمي يهز غصب عني
احس بتوتر والم ومغص الخوف
قلت له ماعاد اقدر اتحمل الالم
هز راسه مبتسم يعني عارف الطبخه كلها
صاد السبب وبيجيب راسه...اخذ العصا وانا غافله وجلدني.. ياشيخ ياهو غير بدل ..الرجال حالف وراس سيفه مايوقف
وعطاني الثاني لحقها بثالثه وانا مع كل جلده وجلده انطط من الالم مثل الكنغر
وهو يلحق وراي ويجلد ويرقيني
يحسب نفسه في سباق الهجن المجاهيم
بطلنا ماني عرس لاعاده من عرس ابي اروح بيت اهله سالمه
خلص الرقيه وانا ابكي واتألم... قلت له وش اللي جرا لعقلك يوم تجلدني
قال فيك عين ومس من الجان يؤذيك ويحزنك
ولازم تستمرين على الرقيه
خرجت من عنده متالمه ومصدومه
جلست افكر يعني هو سبب بعد الله في تنفير الخطاب عني وتاخير زواجي
سألت وبحثت عن هذا الموضوع
وقالو لي ( اسمه المس العاشق )
اذا كان الكلام الراقي صحيح لازم استمر على الرقيه
يمكن هذا الجني مرسول بسحر وهو سبب اذيتي
وتنفير الخطاب عني
بعد مده رجعت للراقي ..وقلت اتحمل الجلد والالم
الدعوه فيها عرس محدش ياكلها بساهل
رجعت له وبنفس الطربقه يرقي ويجلدني
وانا اردد احداً احداً..كله في سبيل العريس يهون
اجلد ياشيخ الجني خله يطلع واشوف الخطاب
يركضون لبيت اهلي ركض اللي عاض ثوبه ولا ماسك
شماغه ولا رامي نعاله الكل يتسابق للفوز بي
استمريت عنده فتره طويله
لاشفت جني طلع ..ولا شفت سحر طلع..ولا شفت خاطب
اللي حصلته قطع جلدي من الضرب
وصار كل يوم يتسلى على ظهري
يعني جلست وناسه على العصريه
تركته ورحت الراقي غيره مايضرب واكيد عنده وسيله
ثانيه من التعذيب غير الضرب ..شرحت له حالتي كلها
بداً يرقيني اول ماشافني اتحرك نط في حلقي مثل الاسد
غرس اظافره في حنجرتي وخنقني ...معد تنفست وشفت الموت
بي افتك منه قلت بطلع بطلع المشكله صوتي مايطلع اقولها بنيه
تركني وقال استمري على الرقيه
طلعت من عنده اركض ياروح مابعدك روح
لابوك لاابو العرس لاابو الخطاب معك
رحت لراقي غير وكنت افكر وش ادوات التعذيب عنده
لقيته يستخدم العصى الكهربائيه يكب مويه على المريضه ويرقيها ويضربها بالكهرب عشان المويه موصل جيد للكهرباء.. تذكرت دروس الابتدائي ..اشوف الحريم عنده يكهربون باقي اطق لهم سامري وتكمل
قلت الصبر زين نجرب كم لشطت كهرباء
محد ميت قبل يومه
جاني الدور وعطاني المقسوم جزاه الله خير
قمت ادق رقبه واهز كتوفي وخسري المخرج عاوز كذا
ما استمريت عنده وش الله حادني
رحت لراقي غيرهم لقيته مثبت سلسله في الجدار يربط فيها رجل المريضه عشان ماتنحاش اثناء الرقيه
قلت بسم الله مديت سيقان سلوى استعداد لتربيط
الحمدلله ماربطني واموري طيبه ورقاني بدون تعذيب
ما استمريت عنده
رحت لراقي غير لقيته حاط كراسي حديد كبيره ومنفصله مثبته في الارض وفيها حدايد لتثبيت اليدين والرجلين مثل كراسي الاعدام
وش العظمه هذي والاستقبال بالحفاوه والتكريم
كرسي خاص لسمونا الكريم ..ليلتي كحلي
جلست على الكرسي الملكي
وبعد الرقيه.. قلت للراقي انا اشعر بكل شي حولي وابكي من الالم الداخلي ولا اشعر بوجود مس من الجان
قال ..استمري على الرقيه ويتبين كل شي
تركت الرقيه عنده وصرت اتنقل بين الرقاه مده من الزمن اخر شي تركتهم كلهم
لا شفت جني طلع ولاسحر ولا عريس يركض ركض
لقيت الترويع والضرب والخنق والكهربا والسلاسل
والاغلال الحمدلله كل شي باجره
كل كلام الرقاة مجرد ظن...يوهمون الحريم بالمرض...يخلونهم يعيشونه كانه حقيقه وتقمصون شخصيات وادور حسب تخطيط المخرج
بعد ماتركتهم عشت حياتي طبيعي
واهتميت بجسمي ومارست رياضة المشي
وقربت من رب اكثر ولجئت له بدعاء ليل ونهار
استمريت مدة من الزمن ..وجاني الفرج من حيث لا ادري ولا احتسب
يتبع....