مراسلتكم في تركيا :) < يوميات>

السلام عليكم ورحمة الله وبركاته

اهلين بنات
شخباركم مع الصيف ؟ :)
قبل فترة كنت ادور معلومات عن تركيا
وبنفس الوقت كان في اكثر من وحده تسأل عن تركيا
بما اني بتركيا الان , حبيت اساعدكم باللي اقدر عليه ...
ان شاءالله كل يوم قبل لا انام نفس هذا الوقت اعطيكم تقريري
وانطباعاتي عن اي شي اشوفه ..

بسم الله ابدا :)
قبل السفر ...
1- الفيزا :
كنا ماخذين الفيزا من السفاره , تقريبا 200ريال للجواز السعودي و 8 دنانير للجواز الكويتي
خذت معنا وقت 4 ايام
الافضل من وجهة نظري انكم تطلعونا اذا وصلتوا مطار اسطنبول <اتاتورك >
بـ 20 دولار على الشخص ماتاخذ معكم دقايق ان شاءالله
ملاحظة : الفيزا على الشخص مو الجواز , وخلوا معكم صرف ممكن يقولون لكم مامعنا فكه


2- السكن والمواصلات :
كنا متعاملين مع مكتب سفريات بتركيا
* بورصه ..
حجزنا في فندق < ألميرا > 5 نجوم
غرفه مزدوجه + افطار = 105 دولار
* اسطنبول ..
حجزنا في فندق < لارس بارك > 4 نجوم
غرفة مزدوجه + افطار = 100 دولار

* الباص ..
استأجرنا باص 15 راكب ب 275 دولار < هو على سعر مشوار السفره >
من مطار اسطنبول الى بورصه
ملاحظه : خذناه عن طريق البر فقط ماحبينا نركب عباره
وكانت المسافه تقريبا 5 ساعات مع انهم كانوا قايلين اقل هو على حسب الزحمه
< بنص المسافه تقريبا في برجر كنج اذا جعتوا مثلنا :) >

الباص اليومي ب 100 دولار والبنزين عليكم < بنزينهم غالي >
قال المكتب انسب لكم تاخذون الباص على حسب المشوار والرحله مو باليوم
ملاحظة : هذا الى الان ماجربناه

اللي حجز لنا السكن والباصات
مرشد عراقي من مكتب سفريات بتركيا وهو معنا الى الان تمام الحمدلله
اللي تبي رقمه عشان تحجز او تستفسر ترسلي على الخاص ..


( اليوم الاول )

بعد تعب مشوار امس ماصحينا الا 10 الصبح
افطرنا وتمشينا داخل الفندق نستكشفه :)
لقينا فيه :
1- بالسرداب سونا , جاكوزي , مساج < مافي الا رجال يدلكك هههه > , غرفة رياضه , تنس طاوله , حمام سباحه
بس حسيت ان المكان كتمه ومافي احد :09:
2- بالدور الثامن في حمام سباحه خارجي بالهواء الطلق
هذا حلو مكانه وشرح
3- في باللوبي كوفي يطل على الشارع
4- الاوتيل كله فيه نت < وايرلس> بس لازم معك اللاب توب طبعا مجانا

العصر على 3.30 رحنا نتغدا كان شمس
الجو بشكل عام حلو بس مو بارد < يعني اللبس صيفي >
مكان المطعم :
( اول ماطلعنا من باب الاوتيل لفينا يمين ومشينا خطوتين تلقون في نفق مشاة
نزلوا منه واطلعوا على الجهه الثانيه خلوا المحلات على يساركم وامشوا يمهم
يعني بيكون الاوتيل بظهركم
كملوا الى ان تطلعون درج صغير < رفعه > بعدها خذوا يسار وكملوا
راح تمرون على صراف ومترو ومحلات ملابس عاديه وسوبرماركت صغير
كملوا الى ان توصلون لشارع السيارت وينتهي فيكم الشارع
لفوا يمين < تعبرون شارع سيارات بس انتبوها تراهم مايوقفون >
بعد ماتلفون يمين في مطعم بالزاويه روحوا المطعم اللي بعده )
اسمه (( DIVAN )) كبابه حلو مدري احنا جوعانين :)
في عادي واسمه < كباب ادانه > وفي حار وهذا عجبنا اكثر < كباب اورفا >
الباقي حلو بس الكباب عجبنا اكثر
اوصال لحم < كوشي ياشي > , شيش طاووق نفس الاسم , شاورما < دونر >

بعدها رجعنا الاوتيل وريحنا شوي وتقهوينا بالاوتيل
على 10 رحنا لمدينة ملاهي صغيره على مستوى ملاهي الحكير الصغيره اللي بالربوه
اسمها < لونا بارك > ورحنا لها مشي :7_5_131:
مكان الملاهي :
اول ماتطلعون من الاوتيل نفس الشي انزلوا نفق المشاه
اذا طلعتوا من الجهه الثانيه امشوا عكس طلعت الدرج
< يعني لو واقفين عند باب الاوتيل بتلفون يمين>
وكملوا على طول على طول بتعبرون كم شارع بعدهم شارع سيارات رئيسي
كملوا بعده وبتلقون بوابه على يساركم هذي دفعوا عندها شي رمزي
يعني احنا 14 دفعنا 2.50 ليره < قدرنا على شكل المجموعه >
اذا دخلتوا البوابه بتشوفون باب على يمينكم , طبعا الملاهي تشوفونها من بعد

الملاهي يشكل العام حليوه
فيها جلستين والمكان فيه خليجين ,احنا جلسنا نتفرج على الناس والاطفال يلعبون
يعني تنفع تغيرون جو فيها بالليل اذا توهقتوا وين تروحون
تقريبا 12 قفلت الالعاب لكن الجلسات موجوده يعني شاورما فطاير ايسكريم
12.30 طلعنا منهم وهم بعدهم
رجعنا مشي بعد , كان الطريق رايق شوي
ترى كنا كلنا حريم وبنات واطفال بس ماحسينا خفنا
يعني المسافه تقريبا 15 الى 20 دقيقه مشي
ترى الجو كان يحمس للمشي هواء بارد
< كان مكتوب درجة الجراره 28 بالروحه و25 بالرجعه >

* سوري على الوصف اللي مدري وش يبغى
بس لو بقولكم اسماء الشوارع بتتوهقون وانا مااعرفها اساسا :)

هذا يومنا الاول حبيناه يكون خفيف لانه تعبانين بعد مشوار سفرة امس
وبشكل عام الاتراك ماشفنا منهم شي
وكانوا طيبين و يجابونا لما نسألهم عن الاماكن

اشوفكم بكره ان شاءالله بيوم حافل بالمغامرات :)
تصبحون على خير

بنات الله يجزاكم خير ادعوا لنا الله يتمم سفرتنا على خير
:26: